រាជធានីភ្នំពេញ ៖ ការប្រកួតជាថ្មីរបស់កីឡាករបង្គោលក្រហម មុត ខ្លឹមខ្មៅ កាលពីយប់ថ្ងៃទី៨ កញ្ញានោះ បានធ្វើឲ្យអ្នកទស្សនាជាប់ចិត្តហួសប្រមាណ ដោយសារតែពេញ៥ទឹកក្នុងការប្រកួតរបស់កីឡាកររូបនេះប្រើអស់ថាមពល និងធ្វើឱ្យគូប្រកួតស្ទើរមិនមានពេលដកដង្ហើមបានស្រួលឡើយ។
អ្នកគាំទ្រប្រដាល់នៅក្នុងសង្វៀនទូរទស្សន៍អាស៊ីអាគ្នេយ៍ បានបង្ហាញពីការសរសើរមិនដាច់ពីមាត់ បើទោះជាកីឡាករវ័យក្មេងមកពីក្លិបមកុដរាជសីហ៍រូបនេះ មិនអាចវាយបុកឲ្យគូបង្គោលខៀវជាគូប្រកួតសន្លប់ ឬបោះបង់ការប្រកួតមុនទឹកទី៥ តាមការចង់បាន។ អ្នកទស្សនាជាច្រើនបានហៅជ័យជម្នះរបស់កីឡាកររូបនេះថា បានមកដោយសមត្ថភាព និងសមជាទំពាំងស្នងក្នុងវិស័យប្រដាល់ ស្របគ្នាដែលកីឡាករប្រដាល់ជើងចាស់ៗជាច្រើនឡើងកាន់តែបាត់ភាពលេចធ្លោ។
តាំងពីទឹកទី១ បើកឆាកបង្គោលក្រហម មុត ខ្លឹមខ្មៅ បានវាយបំបុកកីឡាករបង្គោលខៀវ ប៊ី ចាន់ណា មកពីក្លិបខេត្តស្វាយរៀង ធ្វើឲ្យម្នាក់ៗហើបគូទពីកៅអីនឹងប្រឹងតាមដានតែម្ដង។ ទាំងកណ្ដាប់ដៃ កែង និងជង្គង់ កីឡាកររូបនេះមានភាពរស់រវើកព្រមគ្នា ដោយការវាយចេញក្នុងមួយទឹកៗភាគច្រើនត្រូវចំគោលដៅ សូម្បីតែអ្នករៀបចំការប្រកួតក៏សរសើរពីភាពស្វាហាប់នេះ។
យ៉ាងណាមិញ កីឡាករបង្គោលខៀវ គឺជាកីឡាករខ្លាំង និងរឹងមាំម្នាក់មិនធម្មតា ទើបការវាយបំបុកតាំងពីទឹកទី១ របស់កីឡាករ មុត ខ្លឹមខ្មៅ មិនអាចបង្ខំឲ្យបង្គោលខៀវបោះបង់ការប្រកួតបានឡើយ។ មួយគូនេះ វាយគ្នាពេញកម្លាំងដល់៥ទឹកពេញ ទើបអាចធ្វើឲ្យអ្នកគាំទ្រកាន់តែលាន់មាត់ នៅពេលភាគីណាមួយឈ្នះពិន្ទុចុងក្រោយ។
លោក ញាណ សុធី អ្នករៀបចំការប្រកួតប្រចាំទូរទស្សន៍អាស៊ីអាគ្នេយ៍អះអាងថា ការប្រកួតមួយគូនេះ គឺធ្វើឡើងនៅចន្លោះការប្រកួតអន្តរជាតិ២គូ ដែលតែងដាក់ប្រកួតសម្រាប់ការប្រដាល់នៅយប់ថ្ងៃសៅរ៍។ ប៉ុន្តែលោកមើលឃើញថា ការប្រកួតមួយគូនេះទទួលការចាប់អារម្មណ៍ខ្លាំងជាង២គូខ្មែរ និងបរទេសនៅយប់នោះផង ដោយសារតែ មុខ ខ្លឹមខ្មៅ និងចាន់ណា ប្រឹងអស់ពីសមត្ថភាពរៀងខ្លួន ហើយវាយបាន៥ទឹកពេញ មិនដូចកីឡាករភាគច្រើនដែលល្អមើលតែទឹក ឬ៣ទឹកបើកឆាក ក៏អស់កម្លាំងស៊ុហ្វ។
យ៉ាងណាមិញលោកថា ភាពខ្លាំងរបស់កីឡាករបានល្អតែពេលដំបូងៗ មិនទាន់ល្បីប៉ុណ្ណោះ ដល់ពេលមានឈ្មោះបានបន្តិច ច្រើនតែមិនសូវប្រឹងហាត់ ហើយធ្លាក់ដៃមិនខុសគ្នាទេ។
ចែករំលែកព័តមាននេះ