រាជធានីភ្នំពេញ ៖ ស្រីស្អាតដ៏មានរូបសម្រស់ម្នាក់ទៀតហើយនឹងចូលរួមប្រជែងភាពក្លាហានព្រមទាំងធ្វើឲ្យមហាជន និងអ្នករៀបចំកម្មវិធីមានការរំពឹងថា តារាម៉ូដែលកូនខ្មែរកាត់បារាំង Marianne Clais ហៅម៉ាយ៉ា វ័យ១៥ឆ្នាំ ពិតជាមានឱកាសសាងភាពលេចធ្លោពីមួយដំណាក់កាលទៅមួយដំណាក់កាលជុំវិញគម្រោងចេញទៅបង្ហាញមុខក្នុងព្រឹត្តិការណ៍បង្ហាញម៉ូតអន្តរជាតិ…
រាជធានីភ្នំពេញ ៖ ស្រីស្អាតដ៏មានរូបសម្រស់ម្នាក់ទៀតហើយនឹងចូលរួមប្រជែងភាពក្លាហានព្រមទាំងធ្វើឲ្យមហាជន និងអ្នករៀបចំកម្មវិធីមានការរំពឹងថា តារាម៉ូដែលកូនខ្មែរកាត់បារាំង Marianne Clais ហៅម៉ាយ៉ា វ័យ១៥ឆ្នាំ ពិតជាមានឱកាសសាងភាពលេចធ្លោពីមួយដំណាក់កាលទៅមួយដំណាក់កាលជុំវិញគម្រោងចេញទៅបង្ហាញមុខក្នុងព្រឹត្តិការណ៍បង្ហាញម៉ូតអន្តរជាតិ នាសហរដ្ឋអាមេរិក ដែលប្រព្រឹត្តិទៅនៅអំឡុងខែតុលា ឆ្នាំ២០១៨ខាងមុខនេះ។
មួយរយៈនេះមានការកត់សម្គាល់ថា ស្រីស្អាតជាច្រើនរមែងឆក់បានឱកាសទៅបង្អួតសម្រស់នៅក្រៅស្រុកនាឆាកអន្តរជាតិ។ ទាំងអស់នេះធ្វើឲ្យប្រទេសកម្ពុជាកាន់តែមានគេស្គាល់គ្រប់ទិសទីតាមរយៈវប្បធម៌ប្រពៃណី ក៏ដូចជាវិស័យកីឡា។
កញ្ញា Marianne Cliais ត្រូវបានការយកចិត្តទុកដាក់ពីអ្នកជំនាញផ្នែកច្នៃម៉ូដកំពុងខិតខំរចនាមកុដដ៏ស្រស់ស្អាតទាក់ទាញបំផុតសម្រាប់នាងគ្រងក្នុងព្រឹត្តិការណ៍ដ៏កក្រើកនេះដូចជា លោកRemy Hou, លោកអ៊ី សុខជា, លោកធឿន ចាន់ថា ជាអ្នកច្នៃមកុដរី ឯលោកលី តារា ជាអ្នកឌីហ្សាញម៉ូដមកុដ និងសំលៀកបំពាក់ ដោយរួមសហការគ្នាគិតពិភាក្សាយកចំណុចល្អសាងឲ្យតារាបង្ហាញម៉ូដតំណាងកម្ពុជាមានការកត់សម្គាល់។
តាមការបញ្ជាក់លោក Remy Hou លើកឡើងថា ដើម្បីរចនាគ្រឿងលម្អខ្លួន ពិសេសមកុដដែលនឹងឲ្យតារាបង្ហាញម៉ូតគ្រងដើម្បីឲ្យប្រាកដថា ទាំងម៉ូតសម្លៀកបំពាក់ និងគ្រឿងលម្អខ្លួនរបស់ នារីខ្មែរលើទឹកដីសហរដ្ឋអាមេរិកលើកដំបូង នេះនឹងក្លាយជាទីចាប់អារម្មណ៍នៅលើឆាកអន្តរជាតិ។ មកុដនេះធ្វើពីស្មាច់ និងស្ពាន់ជ្រលក់ដោយទឹកពណ៌មាស ហើយគំរូបានចេញជារូបរាងហើយ គឺនៅតែពេលចាក់ពុម្ពតុបតែងឲ្យកាន់តែស្រស់ស្អាតក្នុងរចនាបទខ្មែរ ពោលគឺអាចនឹងរួចរាល់ក្នុងអំឡុងចុងខែកញ្ញានេះ។
លោកថា ទាំងស្បែកជើង សម្លៀកបំពាក់ និងគ្រឿងអលង្ការកំពុងតែលេចរូបរាងមកបណ្តើរៗហើយដើម្បីចូលរួមកម្មវិធីលំដាប់អន្តរជាតិដែលមានអ្នកបង្ហាញម៉ូត និងអ្នកច្នៃម៉ូតមកពី៥ប្រទេសចូលរួមមាន ប្រទេសឥណ្ឌា ឌូបៃ ប៉ាគីស្ថាន សហរដ្ឋអាមេរិក និងកម្ពុជា។ ហើយកញ្ញា Marianne Clais ហៅ ម៉ាយ៉ា នឹងចេញដំណើរទៅកាន់ទឹកដីនៃសហរដ្ឋអាមេរិកនៅថ្ងៃទី១២ ខែតុលា ខាងមុខនេះ។
តារាម៉ូកូនកាត់ខ្មែរបារាំង Marianne Clais ហៅម៉ាយ៉ា ធ្លាប់បានធ្វើឲ្យទស្សនិកជនចាប់អារម្មណ៍កាន់តែខ្លាំងក្រោយពីនាងបង្ហាញមុខក្នុងឈុតសម្លៀកបំពាក់បុរាណ រហូតដល់ថ្នាក់គេហទំព័រកម្មវិធីប្រកួតសម្រស់កញ្ញាឯកល្បីមួយសរសើរ និងស្នើឲ្យនាងចូលរួមប្រកួតប្រជែងផ្នែកសម្រស់ផងដែរ៕
ចែករំលែកព័តមាននេះ