ខេត្តកំពត ៖ សំណង់អនាធិបតេយ្យដែលសង់រំលោភចុះទៅក្នុងទឹកព្រែកដែល អនុក្រិត្យរបស់រាជរដ្ឋាភិបាលបានហាមឃាត់នាពេលបច្ចុប្បន្ននេះយ៉ាងទូលំទូលាយដល់ប្រជាពលរដ្ឋគ្រប់មជ្ឈដ្ឋានដើម្បីបានជ្រួតជ្រាបអំពីអ្វីដែលជាសម្បត្តិរដ្ឋ អ្វីដែលជាកម្មសិទ្ឋឯកជន ទាំងថ្នាក់ដឹកនាំ ទាំងមន្ត្រីរាជការរួមទាំងប្រជាពលរដ្ឋផង ដែរសុទ្ឋតែបានយល់ដឹងនូវការផ្សព្វផ្សាយអនុក្រិត្យរបស់រាជរដ្ឋាភិបាលទាំងអស់គ្នា ។
ជាក់ស្តែងសំណង់អនាធិបតេយ្យជាច្រើនកន្លែងដែលកំពុងសង់រំលោភចំណី ព្រែក និងសង់ចុះទៅក្នុងទឹកព្រែក ដោយចាក់ធ្នឹមបេតុងយ៉ាងរឹងមាំចុះទៅក្នុងទឹកនាពេលនេះ បើតាមអាជ្ញាធរភូមិសង្កាត់ឲ្យដឹងថា សំណង់ទាំងនេះមិនមានច្បាប់អ្វីទាំងអស់ ហើយកន្លងមកអាជ្ញាធរភូមិសង្កាត់បានហៅម្ចាស់មកធ្វើការណែនាំជាច្រើនលើកច្រើនសារឲ្យបញ្ឈប់ការសង់នូវសំណង់ដែលខុសច្បាប់ខាងលើនេះដែរ ប៉ុន្តែពេលណាអាជ្ញាធរមកបញ្ឈប់គឺផ្អាកបានតែមួយរយៈខ្លីប៉ុណ្ណោះ ។
ពេលណាអាជ្ញាធរជាប់រវល់កិច្ចការផ្សេងៗមិនសូវបានមកតាមដានមើលម្ចាស់សំណង់ខាង លើតែងតែលួចបញ្ជាជាងនិងកម្មករឲ្យធ្វើរបៀបកញ្ឆក់កណ្តៀតជួនកាលមានពេលយប់ក៏មានផងដែរ នេះបើតាមប្រភពពីប្រជាពលរដ្ឋដែលរស់នៅក្បែរតំបន់ នេះផ្តល់ព័ត៌មានដល់អ្នកសារព័ត៌មានយើងកន្លងមក ។
នៅពេលថ្មីៗនេះដែរក្នុង អង្គប្រជុំគណបញ្ជាការឯកភាពខេត្តលោក ជាវ តាយ អភិបាលនៃគណៈអភិបាលខេត្តបានលើកឡើងផងដែរអំពីការកែលម្អតំបន់ឆ្នេរ ការហាមឃាត់មិនឲ្យបុគ្គល ណាម្នាក់រំលោភយកចំណីព្រែក ឬសង់សំណង់រំលោភចូលចំណីព្រែកជាដើម ។
ចំពោះសំណង់ដែលកំពុងសង់រំលោភចុះក្នុងព្រែកដែលស្ថិតក្នុងភូមិអណ្តូងខ្មែរ សង្កាត់អណ្តូងខ្មែរ ក្រុងកំពតនាពេលនេះ បើតាមលោក លាង រឿនសុទ្ធី អភិបាលក្រុងកំពតបានថ្លែងប្រាប់អ្នកយកព័ត៌មានយើងកាលពីរសៀលថ្ងៃទី៨ ខែកញ្ញា ឆ្នាំ ២០១៨ នេះថាសំណង់ខាងលើនេះក្រុមការងារសាលាក្រុងធ្លាប់បាន ចុះទៅបញ្ឈប់ការសាង់មួយលើកជាពីលើករួចមកហើយដោយហៅម្ចាស់មកណែនាំឲ្យឈប់សាងសង់ ម្ចាស់ក៏បានសន្យាជាមួយក្រុមការងារថា ឈប់សាងសង់ដែរ ។
ក្រោយមកលួចសាងសង់បន្តទៀតហើយនៅថ្ងៃទី២ ខែសីហា ឆ្នាំ២០១៨ អាជ្ញាធរក្រុងបានដឹកនាំមន្ត្រីជំនាញចុះមកហាឃាត់ម្តងទៀត ដោយហៅម្ចាស់មកធ្វើកំណត់ហេតុចុះកិច្ចសន្យាបញ្ឈប់ការសាងសង់ និងរង់ចាំអនុវត្តបទបញ្ជាពីរដ្ឋបាលខេត្តដើម្បីរុះរើចេញ ដោយក្រុងបានធ្វើរបាយការណ៍រាយជូនទៅរដ្ឋបាលខេត្ត ជាចុងក្រោយរួចទៅហើយរង់ចាំចំណាត់ការរបស់ខេត្តដើម្បីមានវិធានការរុះរើ ។
ស្រាប់តែនៅថ្ងៃទី៨ ខែកញ្ញា ឆ្នាំ២០១៨ នេះគេឃើញម្ចាស់សំណង់ខាងលើផ្គើន និងការបញ្ឈប់នៃការសាងសង់របស់សាលាក្រុងដោយយកកម្លាំងកម្មករ និងជាសំណង់ មកធ្វើការសាងសង់បន្តទៅទៀតយ៉ាងគគ្លើនមិនគោរពកិច្ចសន្យា ដែលក្រុមការងារសាលាក្រុងបានបញ្ឈប់ ។
លោកបន្តថា បើម្ចាស់សំណង់ខាងលើនៅតែផ្គើនដូច្នេះលោកនឹងរាយការណ៍ជូនលោកអភិបាលខេត្តនៅរសៀលនេះ ដើម្បីលោកអភិបាលខេត្តលោកមានវិធានការបន្តលើករណីការសង់រំលោភចុះក្នុងទឹកព្រែកកំពង់បាយនេះ ៕
ចែករំលែកព័តមាននេះ