ខេត្តសៀមរាប ៖ ក្មេងប្រុសស្រីចំនួន៣នាក់បងប្អូនបង្កើតកំពុងលេងនៅក្រោមផ្ទះត្រូវរន្ទះបាញ់ ខណៈមានភ្លៀងធ្លាក់មួយមេធំលាយឡំខ្យល់ និងរន្ទះបណ្តាលឱ្យសន្លប់ស្តូកស្តឹង ។ ហេតុការរន្ទះបាញ់៣នាក់បងប្អូនបង្កើតនោះបានកើតឡើងនៅម៉ោង០៤និង៣០នាទីល្ងាចថ្ងៃទី៧ ខែកញ្ញា ឆ្នាំ២០១៨ ស្ថិតនៅភូមិព្រៃឆ្កា ឃុំពង្រលើ ស្រុកជីក្រែង ខេត្តសៀមរាប ។
លោកវរសេនីយ៍ឯក សុខ សទ្ធាវុធ អធិការស្រុកជីក្រែងបានប្រាប់ភ្នាក់ងារ កោះសន្តិភាព នៅវេលាម៉ោង៣និង៥០នាទីរសៀលថ្ងៃទី៨ ខែកញ្ញា ឆ្នាំ២០១៨ នេះថាក្រោយពេលកើតហេតុមានប្រជាពលរដ្ឋបានរាយការណ៍មកប៉ូលិសប៉ុស្តិ៍មូលដ្ឋានថា មានករណីរន្ទះបាញ់ត្រូវចំក្មេងប្រុស ស្រីចំនួន៣នាក់ក្នុងនោះស្រីម្នាក់បណ្តាលឱ្យសន្លប់ស្តូកស្តឹង នៅក្រោមផ្ទះជនរងគ្រោះឈ្មោះ ណុន ណន ភេទប្រុស អាយុ៣៤ឆ្នាំ ដែលត្រូវជាឪពុក បង្កឱ្យមានការភ្ញាក់ផ្អើលពេញភូមិត្រូវបានឪពុកម្តាយ និងអ្នកជិតខាងជួយដឹកយកទៅសង្គ្រោះនៅមណ្ឌលសុខភាព ឃុំពង្រលើ ស្រុកជីក្រែង ខេត្តសៀមរាប ។
ខណៈពេលនោះឪពុកជនរងគ្រោះកំពុងនៅលើផ្ទះមិនបានដឹងទេលោកបានឱ្យកម្លាំងជំនាញចុះទៅដល់កន្លែងកើតហេតុភ្លាមៗផងដែរ ប៉ុន្តែត្រូវបានឪពុកម្តាយ និងអ្នកជិតខាងជួយដឹកយកទៅសង្គ្រោះនៅមណ្ឌលសុខភាពឃុំពង្រលើ ។
លោកបានបញ្ជាក់ថា ជនរងគ្រោះទាំង៣នាក់មានទី១-ឈ្មោះ ណន នី ភេទប្រុស អាយុ១១ឆ្នាំ, ទី២-ឈ្មោះ ណន ណុន ភេទប្រុស អាយុ៦ឆ្នាំ និងទី៣-ឈ្មោះ ណន ស្រីដាវ ភេទស្រី អាយុ៣ឆ្នាំ រស់នៅភូមិកើតហេតុខាងលើត្រូវជាកូនបង្កើតដែលនៅក្រោមផ្ទះរបស់ខ្លួនហើយត្រូវបានបញ្ជូនទៅសង្គ្រោះនៅមណ្ឌលសុខភាពឃុំពង្រលើ ។
បច្ចុប្បន្នកុមាររងគ្រោះប្រុសស្រីទាំង៣នាក់ដែលត្រូវរន្ទះបាញ់នោះបានដឹងខ្លួន និងបានត្រឡប់ផ្ទះវិញហើយ ខណៈក្រុមគ្រូទេព្យជួយសង្គ្រោះបានទាន់ពេលវេលាផងដែរ ៕
ចែករំលែកព័តមាននេះ