រាជធានីភ្នំពេញ ៖ ពិតជាគួរឱ្យសង្វេគ ដែលបុរសជាឪពុកយំឱបសពកូនប្រុសជាទីស្រឡាញ់ និងជានិស្សិតផ្នែកអគ្គិសនី ទើបតែប្រឡងចប់មិនទាន់បានប៉ុន្មានថ្ងៃផង ក៏ត្រូវរថយន្តមិនស្គាល់ម៉ាកមួយគ្រឿងបើកបរស្របទិសគ្នា បុកពីក្រោយពេញទំហឹង ពេលកំពុងបណ្ដើរម៉ូតូអែបផ្លូវ បណ្តាលឲ្យបើុងទាំងម៉ូតូ និងមនុស្ស បែកក្បាលហូរឈាមបាក់កស្លាប់ក្នុងថ្លុកឈាមយ៉ាងអាណោចអាធ័ម កាលពីវេលាម៉ោង៩និង៣០នាទីយប់ថ្ងៃទី៥ ខែកញ្ញា នៅផ្លូវឌួង ងៀប ភូមិឌួង ងៀបសង្កាត់អូរបែកក្អម ខណ្ឌសែនសុខ ។
និស្សិតដែលជួបគ្រោះអកុសលនេះឈ្មោះ គង់ មុន្នី អាយុ២៣ឆ្នាំ ជានិស្សិតនៅវិទ្យាស្ថានបណ្តុះបណ្តាលវិជ្ជាជីវៈអគ្គិសនីកម្ពុជាចំការដូង ស្នាក់នៅផ្ទះលេខ៤៥D ផ្លូវលេខ៧០ ភូមិ២៤ សង្កាត់ស្រះចក ខណ្ឌដូនពេញ។ប្រភពព័ត៌មានពីអ្នកឃើញហេតុការណ៍នៅកន្លែងកើតហេតុ បានឲ្យដឹងថា គេឃើញជនរងគ្រោះបណ្តើរម៉ូតូម៉ួយគ្រឿងម៉ាកស្គូពី ពណ៌ក្រហម ពាក់ផ្លាកលេខ ភ្នំពេញ ១BB-៥១៣៨ ដែលមិនដឹងថា ម៉ូតូនោះខូចឬក៏អស់សាំងទេ បានបណ្តើរតាមផ្លូវឌួងងៀបពីខាងត្បូងទៅខាងជើង ។
លុះទៅដល់ចំណុចខាងលើ ស្រាប់តែមានរថយន្តស៊េរីទំនើបមួយគ្រឿងមិនចាំម៉ាក ធ្វើដំណើរស្របទិសគ្នាក្នុងល្បឿនលឿន បុកពីក្រោយពេញទំហឹង បណ្តាលឲ្យបើុងទាំងម៉ូតូនិងមនុស្សជាច្រើនម៉ែត្រ បោកក្បាលស្លាប់ក្នុងថ្លុកឈាមយ៉ាងអាណោចអាធ័ម ចំណែកម៉ូតូខូចស្ទើរទាំងស្រុង ។ ភ្លាមៗនោះ រថយន្តបានបន្ថែមល្បឿនបើករត់ទៅផ្លូវលេខ២០០៤បាត់ស្រមោល ដោយមិនមានអ្នកណាស្គាល់ភិនភាគរថយន្តនោះច្បាស់លាស់ទេ ។
បន្ទាប់ពីកើតហេតុ សពយុវជនខាងលើត្រូវបានទាក់ទងហៅក្រុមគ្រួសារឲ្យមកទទួល លុះមួយសន្ទុះក្រោយឃើញមានក្រុមគ្រួសារសពរួមទាំងឪពុក បើករថយន្តមកដល់កន្លែងកើតហេតុបើកទ្វាររថយន្តចេញរត់មកឱបសពកូនយំសោកបោកខ្លួន ស្តាយស្រណោះជីវិតកូនប្រុសជាទីស្រឡាញ់របស់គាត់ជាពន់ពេក ធ្វើឲ្យស្ថានភាពនោះមើលទៅគួរអោយសង្វេគ និងក្ដុកក្ដួលបំផុត ។
ប្រភពពីសាច់ញាតិសពបានឲ្យដឹងថា ជនរងគ្រោះទើបតែប្រឡងចប់ផ្នែកអគ្គិសនីថ្មីៗ និង សព្វថ្ងៃបម្រើការងារឲ្យក្រុមហ៊ុនអគ្គិសនីឯកជនមួយកន្លែងនៅចំការដូង ខណ្ឌដង្កោ ។ យុវជនរូបនេះបម្រុងចេញទៅរៀននៅក្រៅប្រទេសនាពេលឆាប់ៗខាងមុខនេះទៀត តែពេលនេះជីវិតរបស់គេត្រូវបានបញ្ចប់យ៉ាងអាណោចអាធ័មបែបនេះ ៕
ចែករំលែកព័តមាននេះ