ខេត្តកំពង់ស្ពឺ ៖ រថយន្តហ៊ីយ៉ាន់ដាយដឹកកម្មករ១គ្រឿង បើកលឿនបានជ្រុលចង្កូតបុកម៉ូតូ១គ្រឿង ជិះដោយយុវជន២នាក់ចំពីមុខខ្ទាតជនរងគ្រោះចេញពីម៉ូតូ បណ្តាលឲ្យអ្នកបើកម៉ូតូម្នាក់ស្លាប់ភ្លាមៗ និងម្នាក់ទៀតរបួសធ្ងន់។ ចំណែកម្ចាស់រថយន្ត បានរត់គេចខ្លួនចោលកម្មករ និងរថយន្តនៅកន្លែង កើតហេតុ។ គ្រោះថ្នាក់ចរាចរណ៍រវាងរថយន្ត និងម៉ូតូនេះ បានកើតឡើងកាលពី ម៉ោង៤ និង៥០នាទីល្ងាចថ្ងៃទី៦ ខែកញ្ញា ឆ្នាំ២០១៨ តាមដងផ្លូវជាតិលេខ៤១ ក្នុងភូមិខ្លែងពណ៌ខាងជើង ឃុំព្រៃញាតិ ស្រុកគងពិសី ខេត្តកំពង់ស្ពឺ។
តាមប្រភពព័ត៌មានពីសមត្ថកិច្ចចរាចរណ៍ បានឲ្យដឹងថា គ្រោះថ្នាក់ចរាចរណ៍នៅបណ្តាលឲ្យស្លាប់ម្នាក់ ឈ្មោះ មុយ ចាន់ណា ភេទប្រុស អាយុ២៥ឆ្នាំ រស់នៅភូមិក្រាំងឃ្នង ឃុំព្រៃញាតិ ស្រុកគងពិសី ជាអ្នកបើកម៉ូតូ និងម្នាក់ទៀតឈ្មោះ ជួន ម៉ៅ ភេទប្រុស អាយុ២៨ឆ្នាំ រស់នៅភូមិជាមួយគ្នា ជាអ្នករួមដំណើរ របួសធ្ងន់។ ដោយឡែកភាគីរថយន្ត របួសស្រាលម្នាក់ឈ្មោះ សេន ស្រីមិត្ត ភេទស្រី ជាកម្មការិនី បោកក្បាលនឹងរថយន្ត។
ប្រភពដដែលបន្តថា មុនកើតហេតុ គេឃើញជនរងគ្រោះ បើកម៉ូតូ១គ្រឿងម៉ាកវីស្តុន ពណ៌ទឹកប៊ិច គ្មានស្លាកលេខដឹកគ្នាពីជើងទៅត្បូងគ្មានពាក់មួកសុវត្ថិភាពទាំង២នាក់។ លុះបើកមកដល់ចន្លោះ គីឡូម៉ែត្រលេខ១៧-១៨ ក្នុងភូមិកើតហេតុ ស្រាប់តែមានរថយន្តដឹកកម្មករ១គ្រឿងម៉ាកហ៊ីយ៉ាន់ដាយ ពាក់ស្លាកលេខ កំពង់ស្ពឺ ២A-៩៣១៤ បើកបញ្ច្រាសទិសពីត្បូងទៅជើង ជ្រុលបុកម៉ូតូចំពីមុខ ខ្ទាតជនរងគ្រោះចេញពីម៉ូតូ បណ្តាលឲ្យអ្នកបើកម៉ូតូស្លាប់នៅកន្លែងកើតហេតុ និងអ្នករួមដំណើរ របួសធ្ងន់។ ក្រោយបង្កហេតុអ្នកបើកបរ បានរត់គេចខ្លួនចោលរថយន្តនៅកន្លែងកើតហេតុ។
ក្រោយកើតហេតុ សមត្ថកិច្ចបានចដល់កន្លែងកើតហេតុ ប្រញាប់បញ្ជូនអ្នករបួសទៅមន្ទីរពេទ្យ និងសាកសពប្រគល់ឲ្យសាច់ញាតិយកទៅធ្វើបុណ្យតាមប្រពៃណី។ ដោយឡែកវត្ថុតាងរថយន្ត និងម៉ូតូសមត្ថកិច្ចយកមករក្សាទុកនៅអធិការដ្ឋាន៕
ចែករំលែកព័តមាននេះ