ខេត្តព្រះសីហនុ ៖ នៅស្នងការដ្ឋាននគរបាលខេត្តព្រះសីហនុ នារសៀលថ្ងៃទី៧ ខែកញ្ញា ឆ្នាំ២០១៨នេះ លោកឧត្តមសេនីយ៍ត្រី កុល ផាល្លី ស្នងការរងទទួលការងារព្រហ្មទណ្ឌ…
ខេត្តព្រះសីហនុ ៖ នៅស្នងការដ្ឋាននគរបាលខេត្តព្រះសីហនុ នារសៀលថ្ងៃទី៧ ខែកញ្ញា ឆ្នាំ២០១៨នេះ លោកឧត្តមសេនីយ៍ត្រី កុល ផាល្លី ស្នងការរងទទួលការងារព្រហ្មទណ្ឌ នៃស្នងការរដ្ឋាននគរបាល ខេត្តព្រះសីហនុ បានធើសន្និសិទព័ត៌មានបង្ហាញមុខអ្នកលេងឆ្លងដែនជាជនជាតិចិនចំនួន០២នាក់ ដែលជាជនដៃដល់ធ្វើសកម្មភាពប្រើប្រាស់អាវុធខ្លីបាញ់ជនជាតិចិនដូចគ្នា បណ្តាលឲ្យរងរបួស ចំនួន៤នាក់ នៅក្រុងព្រះសីហនុ កាលពីយប់ថ្ងៃទី១៦ ខែកក្កដា ឆ្នាំ២០១៨កន្លងទៅ។
ហើយត្រូវបានកម្លាំងនគរបាលនៃស្នងការរដ្ឋានខេត្តព្រះសីហនុបានបើកការស្រាវជ្រាវរហូតឈានដល់ការចាប់ឃាត់ខ្លួនបានជនសង្ស័យចំនួន០២នាក់ ក្នុងនោះនគរបាលដកបានវត្ថុតាងកាំភ្លើងខ្លី ចំនួន០២ដើម ផងដែរ។ លោកឧត្តមសេនីយ៍ត្រី បានបន្តឲ្យដឹងទៀតថា ក្រោយពេលជនសង្ស័យបានបង្កហេតុតាម ពេលវេលាខាងលើ ដោយអនុវត្តតាមបទបញ្ជារបស់លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិក៏ដូចជាបទបញ្ជាដ៏ម៉ឺងម៉ាត់ របស់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ធ្វើយ៉ាងណាត្រូវតែបើកការស្រាវជ្រាវ លើកកម្ពស់ក្នុងការយកចិត្ត ទុកដាក់ស្វែងរកជនសង្ស័យឈានទៅឃាត់ខ្លួនឲ្យខាងតែបាន។
លោកឧត្តមសេនីយ៍ស្នងការរង ទទួលការងារព្រហ្មទណ្ឌបានបន្តឲ្យដឹងទៀតថា លុះដល់ល្ងាចថ្ងៃទី០៦ ខែកញ្ញា ឆ្នាំ២០១៨ នេះក្រោយពីការស្រាវជ្រាវជិតពីរខែរបស់នគរបាលជំនាញទើបកម្លាំងនគរបាលឈានដល់ការឃាត់ខ្លួនបាន។ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានឲ្យដឹងនាពេលកន្លង មកថា នៅវេលាម៉ោង៧ និង៣០នាទីយប់ ថ្ងៃទី១៦ ខែកក្កដា ឆ្នាំ២០១៨ កន្លងមកនៅភោជនីយដ្ឋាន យីហោ(ស៊ីហ៊ួ)តាមបណ្តោយវិថី២៨មិថុនា ស្ថិតនៅក្រុម០៩ ភូមិ១ សង្កាត់៣ ក្រុង-ខេត្តព្រះសីហនុ មានជនសង្ស័យជាជនជាតិចិនចំនួន០២នាក់មិនស្គាល់អត្តសញ្ញាណ ជិះម៉ូតូ០១គ្រឿងម៉ាកស្គូពី ពណ៌ក្រហម ប្រើស្កុតបិតពីលើស្លាកលេខជិត ពាក់មួកសុវត្ថិភាពពណ៌ខ្មៅ និងពាក់អាវរងារខ្មៅធំ ដៃវែងទាំង០២នាក់ បានធ្វើសកម្មភាពបាញ់គំរាម ជាច្រើនគ្រាប់ទៅលើជនរងគ្រោះជាជនជាតិចិន ០៤នាក់។
ខណៈពេលដែលជនរងគ្រោះកំពុងអង្គុយហូបអាហារនៅហាងខាងលើ បណ្តាលឲ្យ ត្រូវរបួសជើងទាំង០៤នាក់រួចជនសង្ស័យបាននាំគ្នាជិះម៉ូតូគេចខ្លួនបាត់។ លោកឧត្តមសេនីយ៍ ស្នងការបញ្ជាក់ថា ជនរងគ្រោះទាំង០៤នាក់ ដែលត្រូវគេបាញ់ឲ្យរងរបួសមានឈ្មោះដូចខាងក្រោម៖ ១-/ឈ្មោះ ZHANG KUN ភេទប្រុស អាយុ៣៩ឆ្នាំ ជនជាតិចិន ត្រូវចំភ្លៅខាងស្តាំ។ ២-/ ឈ្មោះ YANG HUAIHUN ភេទប្រុស អាយុ៤១ឆ្នាំ ជនជាតិចិន ត្រូវចំក្បាលជង្គង់ខាងស្តាំ។ ៣-/ឈ្មោះ YANG JUN GING ភេទប្រុស អាយុ២៧ឆ្នាំ ជនជាតិចិន ត្រូវចំចុងភ្លៅស្តាំ និងដើមកំភួនជើងខាងឆ្វេង។ ៤-/ឈ្មោះ LIU WEIMIN ភេទប្រុស អាយុ៣៣ឆ្នាំ ជនជាតិចិន ត្រូវចំភ្លៅខាងស្តាំ។ ជនរងគ្រោះខាងលើស្នាក់នៅបណ្តោះអាសន្ននៅវិមានខ្សាច់មាស ជាអ្នកទេសចរណ៍ ចូលមកកាលពីថ្ងៃទី១៤ ខែកក្កដា ឆ្នាំ២០១៨។
ក្រោយកើតហេតុបានរថយន្តគ្លីនិកដឹកបញ្ជូនទៅព្យាបាល នៅគ្លីនិកសេតេ បច្ចុប្បន្នបានត្រឡប់ទៅប្រទេសកំណើតវិញអស់ហើយ ។ លោកឧត្តមសេនីយ៍ស្នងការ បានបន្តថា ក្រោយធ្វើសកម្មភាពក្រុមជនសង្ស័យបានបន្សល់នៅវត្ថុតាងនៅកន្លែងកើតហេតុរួមមាន៖-សម្បកគ្រាប់ ចំនួន០៩ និងគ្រាប់មិនទាន់បាញ់ចំនួន ១គ្រាប់។ លោកឧត្តមសេនីយ៍ស្នងការបាន សង្កត់ធ្ងន់ថា ក្រោយរឿងហេតុកើតឡើងភ្លាម ស្នងការដ្ឋាននគរបាលខេត្ត បានបង្កើតគណៈកម្មការមួយ ធ្វើការស៊ើបអង្កេតស្រាវជ្រាវជាបន្ទាន់។ ដោយមានការចង្អុលដឹកនាំផ្ទាល់ពីលោក រួមជាមួយកម្លាំងជំនាញ ផែននគរបាលព្រហ្មទណ្ឌ ធ្វើការស្រាវជ្រាវស៊ើបអង្កេតយ៉ាងយកចិត្តទុកដាក់ និងឈានទៅឃាត់ខ្លួនបាន ជនសង្ស័យនៅវេលាម៉ោង១០ និង៣០នាទីយប់ ថ្ងៃទី០៥ ខែកញ្ញា ឆ្នាំ២០១៨កន្លងមក។
លោកឧត្តមសេនីយ៍ស្នងការ បានបញ្ជាក់ថា ជនអ្នកលេងឆ្លងដែនដៃដល់ជាជនជាតិចិនក្នុងការ បាញ់គំរាមទាំង០២នាក់ដែលកម្លាំងនគរបាលឃាត់ខ្លួនបានមានឈ្មោះដូចខាងក្រោម៖ ១-/ឈ្មោះ REN HAI JUN ភេទប្រុស អាយុ៤៦ឆ្នាំ ជនជាតិចិនកាន់លិខិតឆ្លងដែនលេខ E០១១១៥៤៣៤ មុខរបរ មិនពិតប្រាកដ មានទីលំនៅមិនពិតប្រាកដ។ ២-/ ឈ្មោះ WU HAI ZHU ភេទប្រុស អាយុ៣០ឆ្នាំ ជនជាតិចិន កាន់លិខិតឆ្លងដែនលេខ E៩២១១១៩៨៥ មុខរបរ មិនពិតប្រាកដ មានទីលំនៅ មិនពិតប្រាកដ។ វត្ថុតាងដែលសមត្ថកិច្ចនគរបាលដកហូតបានមាន៖ -កាំភ្លើងខ្លី០២ដើម៖ ១,ម៉ាក BERETA លេខ G643652 បង់១គ្រាប់ចំនួន០២គ្រាប់។ ២,ម៉ាក GLOCK19 លេខ WBEN763 បង់១ គ្រាប់០៤គ្រាប់។
តាមចម្លើយសារភាពរបស់ជនសង្ស័យទាំង០២នាក់ខាងលើបានឲ្យដឹងថា ពួកគេពិតជាបានធ្វើសកម្មភាពដោយប្រើភ្លើងខ្លី០២ដើម បាញ់ទៅលើជនរងគ្រោះពិតប្រាកដមែន ព្រោះពួកគេខឹងនឹងជនរងគ្រោះដែលបាននិយាយប្រមាថមើលងាយពួកគេថា ពួកគេជាមនុស្សដើរមិនត្រង់ផ្លូវ មិនមែនជាមនុស្សល្អ ពេលដែលពួកគេទៅផឹកនៅក្នុងក្លឹបមួយកន្លែង ដែលនៅចំណុចឧតុនិយមកាលពីថ្ងៃទី១៥ ខែកក្កដា ឆ្នាំ២០១៨កន្លងមក ទើបនៅថ្ងៃកើតហេតុពួកគេ បាញ់ទៅលើជនរងគ្រោះតែម្តង។
ចំពោះកាំភ្លើងរូបគេបានទិញពីជនមិនស្គាល់អត្តសញ្ញាណ ក្នុង១ដើម តម្លៃ៣,៨០០ដុល្លារ ហើយពេលធ្វើសកម្មភាពរួច ពួកគេបានយកទៅកប់នៅក្នុងដីស្ថិតនៅក្រុម២២ ភូមិ៣ សង្កាត់៣ ក្រុងព្រះសីហនុ។ បច្ចុប្បន្នជនសង្ស័យទាំង២ត្រូវបានកម្លាំងនគរបាលខេត្តព្រះសីហនុ កសាងសំណុំរឿង បញ្ជូនទៅសាលាដំបូងខេត្តព្រះសីហនុនៅរសៀលថ្ងៃទី០៧ ខែកញ្ញា ឆ្នាំ ២០១៨ ដើម្បីផ្តន្ទាទោសទៅតាមច្បាប់ ៕
ចែករំលែកព័តមាននេះ