ខេត្តកំពង់ចាម ៖ ក្នុងចំណោម១០ស្រុក-ក្រុងរបស់ខេត្តកំពង់ចាមដែលសំបូរទៅដោយភ្នំច្រើនជាងគេ រួមមានដូចជា ៖ទី១ – ស្រុកបាធាយ ២-ស្រុកជើងព្រៃ ៣ – ស្រុកកំពង់សៀម ៤-ស្រុកចំការលើ ៥-ស្រុកស្ទឹងត្រង់ ហើយនៅលើភ្នំខ្លះមានប្រសាទបុរាណទាក់ទាញភ្ញៀវជាតិ និងអន្តរជាតិមកកម្សាន្តលេង ឫវត្តអារាមសម្រាប់ពុទ្ធសាសនិកគោរពប្រណិប័តន៍បួងសួងសុំសេចក្តីសុខសាន្តផងដែរ ។
លោក ចក់ សុខគង់ ប្រធានការិយាល័យវប្បធម៌ស្រុកបាធាយប្រាប់ឲ្យដឹងនៅព្រឹកថ្ងៃទី០៧ កញ្ញា ២០១៨ថា នៅក្នុងស្រុកបាធាយទាំងមូលមានភ្នំជាច្រើនរួមមាន ១-ភ្នំធំ ស្ថិតនៅឃុំជាលា ក្នុង តែធ្វើអាជីវកម្ម ២-ភ្នំជាលាក្នុងឃុំជាលា មានវត្តនៅលើកំពូលភ្នំ ៣- ភ្នំបែកពាង មានអមភ្នំតូចៗជាច្រើនទៀត មានផ្ទះទាហាននៅជើងភ្នំ ៤-ភ្នំតាំងស្រែ មានវត្តនៅលើកំពូលភ្នំ ក្នុងឃុំតាំងក្រាំង មួយផ្នែកនៃភ្នំបានធ្វើអាជីវកម្ម ៥-ភ្នំជើងឆ្នុក មានវត្តនៅលើកំពូលភ្នំ ៦- ភ្នំដិល មានវត្តនៅលើភ្នំ ក្នុងឃុំតាំងក្រាំង ៧-ភ្នំបាធាយ មានវត្តនៅជើងភ្នំ ក្នុងឃុំបាធាយ ៨-ភ្នំទ្រព្យមានប្រសាទបុរាណ ដែលនៅជើងភ្នំ មិនត្រូវបានអនុញ្ញាតឲ្យធ្វើអាជីវកម្មនោះទេ ។
លោក អូត ឈាងលី អភិបាលស្រុកជើងព្រៃប្រាប់ថា នៅក្នុងស្រុកជើងព្រៃមានតែភ្នំជើងព្រៃ ឫភ្នំប្រុស ភ្នំស្រី ស្ថិតនៅឃុំគោករវៀង ស្រុកជើងព្រៃ ដោយមានប្រសាទនៅលើភ្នំទាំងរដូវប្រាំង និងវស្សាមានពលរដ្ឋជិតឆ្ងាយបាននាំគ្នាមកលេងជាហូរហែរ ។ ហើយនៅជុំវិញភ្នំក្នុងរង្វង់៣០០ម៉ែត្រត្រូវបានការពារជាសម្បត្តិរបស់រដ្ឋ ដោយមិនបានចេញ ប្លង់ឲ្យពលរដ្ឋណាម្នាក់នោះទេ ។
លោក លឿង រ៉ាម៉ូ អភិបាលរងស្រុកចំការលើឲ្យដឹងថា ក្នុងស្រុកចំការលើមានភ្នំចំនួន០៤ ក្នុងនោះមាន១-ភ្នំទែត (ភ្នំប្រុសភ្នំស្រី) ២-ភ្នំអណ្តូងប្រេង ៣-ភ្នំកៃកើត ក្នុងឃុំបុសខ្នុរទាំង៣កន្លែង ៤-ភ្នំពេញថ្មី នៅលើភ្នំនេះមានវត្តក្នុងឃុំចំការអណ្តូង ។
លោក ជួន សុផាត ប្រធានមន្ទីរវប្បធម៌ និងវិចិត្រសិល្បៈខេត្តឲ្យដឹងថា នៅស្រុកកំពង់សៀមមាន១- ភ្នំប្រុស- ភ្នំស្រី ដែលនៅលើភ្នំប្រុសមានវត្តដោយមានព្រះសង្ឃគងនៅជាច្រើនអង្គ ហើយក៏ជាទីកន្លែងទេសចរណ៍ដោយបានស្រូបយកភ្ញៀវជាតិ និងអន្តរជាតិមកកម្សាន្តជាហូរហែរ ។ ក្រៅពីនេះក៏មានភ្នំតូចៗជាច្រើនទៀត នៅជាប់នឹងភ្នំស្រីផងដែរ ។ ២- ភ្នំហាន់ជ័យ ស្ថិតនៅក្នុងឃុំហាន់ជ័យមានប្រាសាទបុរាណ នៅលើនោះ និងមានវត្តថែមទៀត ហើយនៅចង្កេះភ្នំក៏មានប្រសាទបុរាណ១ នៅទីនោះជាកន្លែងតំបន់ទេសចរណ៍ ដោយមានភាពទាក់ទាញភ្ញៀវជាតិ និងអន្តរជាតិមកលេងរាល់ថ្ងៃ ។
លោក អ៊ូ វេង ប្រធានការិយាល័យវប្បធម៌ស្រុកស្ទឹងត្រង់បានប្រាប់ថា នៅក្នុងស្រុករបស់លោកមានភ្នំដូចជា ១- ភ្នំបឹងដែងមានប្រសាទព្រះមហោសថសុវណ្ណគិរីបឹងដែង ២- ភ្នំបឹងកេត នៅនឹងចង្កេះភ្នំ មានប្រាសាទព្រះអង្គគុហ៌ នៅទីនោះ ឲ្យតែដល់រដូវបុណ្យទានម្តងៗមានមនុស្សមកលេងច្រើនកុះករ ៣ – ភ្នំចារនៅលើភ្នំមានវត្តបុរាណដែលបានជួសជុលដោយមានព្រះសង្ឃគង់នៅក្នុងឃុំអារក្សត្នោត ហើយត្រូវបានពលរដ្ឋតែងតែនាំគ្នាគោរពប្រណិប័តន៍ផងដែរ ៕
ចែករំលែកព័តមាននេះ