ប្រទេសកូរ៉េខាងជើង ៖ បើតាមកាកបាទក្រហមបានរាយការណ៍កាលពីថ្ងៃទី៦ កញ្ញា ឱ្យដឹងថា ទឹកជំនន់ធ្ងន់ធ្ងរបំផុតនៅកូរ៉េខាងជើង បណ្ដាលឲ្យមនុស្សស្លាប់យ៉ាងតិច៧៦នាក់ ហើយមនុស្ស៧៥នាក់ទៀតបាត់ខ្លួន ក្នុងនោះមានកុមារច្រើននាក់។
មនុស្សជាច្រើនពាន់នាក់បច្ចុប្បន្នគ្មានទីជម្រក ក្រោយពីភ្លៀងធ្លាក់ខ្លាំងបណ្ដាលឲ្យមានការបាក់ដី និងទឹកជំនន់ ដោយបំផ្លាញអគារជាង៨០០ ក្នុងនោះមានផ្ទះសម្បែង មន្ទីរពេទ្យ និងសាលារៀន នៅខេត្ត HWANGHAE ខាងជើង និងខាងត្បូង នាភាគខាងត្បូងប្រទេស។ បណ្ដាសមាជិកកាកបាទក្រហមប្រមូលគ្នាតាមរុករកពួកអ្នកអាចនៅរស់រានមានជីវិត។
លោក JOHN FLEMING សមាជិកសាខាសហព័ន្ធកាកបាទក្រហម និងអឌ្ឍច័ន្ទក្រហមអន្តរជាតិប្រចាំកូរ៉េខាងជើងអះអាងថា មនុស្សច្រើនពាន់នាក់បាត់បង់ផ្ទះសម្បែង ហើយត្រូវការបន្ទាន់សេវាកម្មសុខាភិបាល ជម្រក ស្បៀង និងទឹកស្អាត។ ជាមួយរដូវត្រជាក់មកដល់ យើងមានការបារម្ភចំពោះបណ្ដាផលវិបាកប្រកបដោយគ្រោះមហន្តរាយ ទាក់ទិននឹងបញ្ហាសុខភាព និងអសន្តិសុខស្បៀងក្នុងសហគមន៍មួយចំនួន។
កូរ៉េខាងជើងជាប្រទេសក្រីក្រមួយដែលតែងជួបប្រទះនឹងគ្រោះមហន្តរាយធម្មជាតិនានា។ មនុស្សជាង១៣០នាក់ស្លាប់ក្នុងខេត្ត HAMGYONG ខាងជើង កាលពីឆ្នាំ២០១៦ដោយសារទឹកជំនន់ដែលបំផ្លាញអគារជាច្រើន ហើយញ៉ាំងឲ្យមនុស្សច្រើនរយពាន់នាក់ គ្មានទីជម្រកនឹងគ្មានស្បៀង។
ដែនដីកូរ៉េខាងជើងភាគច្រើនជាតំបន់ភ្នំ និងកូនភ្នំ ដែលព្រៃឈើរងការកាប់បំផ្លាញ ដើម្បីយកឈើមកដុតកម្ដៅ ឬក៏ប្រែក្លាយទៅជាផ្ទៃដីសម្រាប់ការដាំស្រូវលើទីខ្ពស់។ ការបំផ្លាញព្រៃឈើអស់បែបនេះនាំឲ្យទឹកភ្លៀងងាយហូរចាក់លឿន។ ទឹកជំនន់ និងគ្រោះរាំងស្ងួតជាបន្តបន្ទាប់នាំឲ្យមានគ្រោះអត់ឃ្លានដែលសម្លាប់មនុស្សច្រើនរយពាន់នាក់ រវាងឆ្នាំ១៩៩៤ទៅ១៩៩៨ ចំណែកការគ្រប់គ្រងសេដ្ឋកិច្ចមិនល្អរបស់ប្រទេស និងការបាត់បង់ការជួយទ្រទ្រង់របស់រុស្ស៊ីធ្វើឲ្យសភាពការណ៍កាន់តែធ្ងន់ធ្ងរ៕
ចែករំលែកព័តមាននេះ