ខេត្តរតនគិរី ៖ អយ្យការអមសាលាដំបូងបញ្ជាឲ្យសមត្ថកិច្ចឃាត់ខ្លួនស្ត្រី២នាក់យកទៅដាក់ពន្ធនាគារនៅរសៀលថ្ងៃទី៥ ខែកញ្ញា ឆ្នាំ២០១៨ ពីបទរំលោភលើទំនុកចិត្តពាក់ព័ន្ធនឹងប្រាក់ជំពាក់មេទុងទីនកាលពីអំឡុងឆ្នាំ២០១៤ ឆ្នាំ២០១៥ ដោយយោងតាមពាក្យបណ្ដឹងរបស់ឈ្មោះ អ៊ាក សុណា ជាមេតុងទីនបានដាក់ពាក្យប្ដឹងកាលពីឆ្នាំ២០១៧កន្លងទៅ ។
ស្ត្រី២នាក់ដែលតុលាការយកទៅឃុំខ្លួននោះទី១-ឈ្មោះ ការីម ធីតា អាយុ៣៤ឆ្នាំ ជនជាតិខ្មែរ មានទីលំនៅភូមិជ័យជំនះ សង្កាត់ឡាបានសៀក ក្រុងបានលុង មានមុខរបរលក់គ្រឿងទេសនៅផ្សារបានលុង និងម្នាក់ទៀតមានឈ្មោះ ការីម ស៊ុនលី អាយុ២៩ឆ្នាំ ជនជាតិខ្មែរ មុខរបរកសិករជាស្ត្រីមេម៉ាយកូន២នាក់មានលំនៅភូមិសង្កាត់ជាមួយគ្នា ។
ការឃាត់ខ្លួនស្ត្រីទាំង២យកទៅឃុំនៅពន្ធនាគារនេះបន្ទាប់ពីស្ត្រីទាំង២នាក់បានចូលខ្លួនទៅសាលាដំបូងខេត្តតាមដីកាបង្គាប់ឲ្យចូលខ្លួនជាលើកទី៣ ថ្ងៃទី៥ ខែកញ្ញា ឆ្នាំ២០១៨ ដែលចុះហត្ថលេខាដោយលោក ឃិន វិសិដ្ឋ ចៅក្រមស៊ើបសួរសាលាដំបូងខេត្ត កាលពីថ្ងៃទី២១ ខែសីហា ឆ្នាំ២០១៨ ។
តាមការរៀបរាប់ទាំងទឹកភ្នែកសុំរកយុត្តិធម៌របស់ប្ដីស្ត្រីដែលត្រូវឃុំខ្លួននោះមានឈ្មោះ ទូច ចំណាប់ បានឲ្យដឹងថា ប្រពន្ធគាត់ពិតជាជំពាក់លុយមេតុងទីនគេចំនួន១៥លាន៩០ម៉ឺនរៀលពិតមែន ហើយតុលាការបានកោះហៅឲ្យចូលខ្លួនចំនួន២លើកមកហើយ ដោយប្រពន្ធគាត់សុំសងគេតាមលទ្ធភាពប្រចាំខែ ក៏ប៉ុន្តែម្ចាស់បំណុលគេមិនព្រម រហូតដល់ដីការកោះលើកទី៣នេះប្រពន្ធគាត់ចូលខ្លួនមកត្រូវតុលាការបញ្ជាឲ្យឃុំខ្លួនតែម្ដង ។
លោកបានបន្តទៀតថា ជំពាក់ប្រាក់ក្នុងការលេងតុងទីនពួកគាត់មិបានបដិសេធថា មិនសង ឬរត់គេចទៅឯណាទេ គ្រាន់តែពួកគាត់គ្មានប្រាក់ក៏ប៉ុន្តែពួកគាត់ខំប្រឹងរកសងតាមលទ្ធភាពបណ្ដើរៗ ហេតុអីបានជាចាប់ប្រពន្ធគាត់ដាក់គុក ។
ពាក់ព័ន្ធករណីនេះលោក កែវ ពិសិដ្ឋ អ្នកនាំពាក្យអយ្យការអមសាលាដំបូងខេត្តបានឲ្យដឹងថា ការឃុំខ្លួនស្ត្រីខាងនេះតំណាងអយ្យការបានសម្រេចឃុំខ្លួនចោទពីបទរំលោភលើទំនុកចិត្ត ។ លោកបានបញ្ជាក់ទៀតថា សំណុំរឿងពាក្យបណ្ដឹងនេះដើមបណ្ដឹងបានដាក់មកព្រះរាជអាជ្ញាតាំងពីចុងឆ្នាំ២០១៧មកម្លេះ ហើយព្រះរាជអាជ្ញាទើបតែបញ្ជូនមកអយ្យការ ក្នុងខែ៨, ខែ៩ ឆ្នាំ២០១៨ ម្យ៉ាងវិញទៀតប្រហែលជាមិនបានគោរពកាតព្វកិច្ចណាមួយពាក់ព័ន្ធ និងការសងហើយបានជាព្រះរាជអាជ្ញាធ្វើការចោទប្រកាន់ពីបទរំលោភលើទំនុកចិត្ត ។
គួរបញ្ជាក់ថា ការឃុំខ្លួនស្ត្រីទាំង២នាក់ខាងលើនេះក្នុងនោះមានស្ត្រីម្នាក់ឈ្មោះ សារីម ស៊ុនលី ជាស្ត្រីមេម៉ាយដែលមានកូនតូចៗ២នាក់បានទៅដេកក្នុងពន្ធនាគារជាមួយម្ដាយដែរដោយពុំមានអ្នកមើលថែរ ។ ចំណែកលោក អ៊ាក សុណា ដើមបណ្ដឹងភ្នាក់ងារ សារព័ត៌មាន កោះសន្តិភាព មិនអាចសុំការបំភ្លឺបានទេ នៅរសៀលថ្ងៃទី៧ ខែកញ្ញា ឆ្នាំ២០១៨ ។ ដោយឡែកមន្ត្រីពន្ធនាគារខេត្តបានអោយសារព័ត៌មាន កោះសន្តិភាព ដឹងថា ឈ្មោះ ការីម ស៊ុនលី ជាស្ត្រីមេម៉ាយកូន២ពិតជាបានយកកូនតូចៗទាំង២នាក់ទៅដេកនៅពន្ធនាគារពិតមែន ៕
ចែករំលែកព័តមាននេះ