ខេត្តត្បូងឃ្មុំ ៖ ជនសង្ស័យ២នាក់ រួមនឹងរថយន្តកាមរីបាឡែន១គ្រឿង បានត្រូវសមត្ថកិច្ចចាប់ខ្លួនកាលពីវេលាម៉ោង១រសៀលថ្ងៃទី៦ ខែកញ្ញា នៅចំណុចហាងកាហ្វេយើង ក្នុងភូមិស្លាបក្តោង ឃុំជប់ ស្រុកត្បូងឃ្មុំ ពីបទជាប់ពាក់ព័ន្ធនឹងករណីលួចរថយន្តពីខេត្តព្រះសីហនុ ។
លោកវរសេនីយ៍ត្រី សេង ម៉ិ អធិការរងនគរបាលស្រុកត្បូងឃ្មុំបានឱ្យដឹងថា ជនទាំង២នាក់នេះ ម្នាក់ឈ្មោះ ធឿន ចាន់ថា ភេទប្រុស អាយុ២៥ឆ្នាំ នៅភូមិ៤៤ ឃុំព្រះធាតុ ស្រុកអូររាំងឪ ខេត្តត្បូងឃ្មុំ និងម្នាក់ទៀតឈ្មោះ ឈុន ភាល័យ ភេទប្រុស អាយុ២៨ឆ្នាំ នៅភូមិអន្លង់ស្លែង ឃុំសំបួរមាស ស្រុកមុខកំពូលខេត្តកណ្តាល ។ ជាមួយនឹងការចាប់ឃាត់ខ្លួននេះ សមត្ថកិច្ចក៏បានដកហូតរថយន្តកាមរីបាឡែនមួយគ្រឿង
ពណ៌ទឹកប្រាក់ ពាក់ផ្លាកលេខ ភ្នំពេញ ២N-២៩២៣ ដែលក្រុមជននេះលួចពីភូមិ១ សង្កាត់លេខ៤ ក្រុងព្រះសីហនុ ខេត្តព្រះសីហនុ កាលពីថ្ងៃទី២១ ខែសីហា កន្លងទៅ ។
លោកអធិការរងឲ្យដឹងទៀតថា មុននឹងចាប់ខ្លួនក្រុមចោរខាងលើនេះ ដំបូងសាច់ញាតិរស់នៅស្រុកមេមត់ ចង់រកទិញរថយន្តកាមរីបាឡែន១គ្រឿង ដោយបានណាត់ឱ្យយករថយន្តមកមើលនៅមុខហាងកាហ្វេយើង នៅឃុំជប់ ។ លុះពេលថតរូបរថយន្តទៅឱ្យបងប្អូននៅឯខេត្តព្រះសីហនុពិនិត្យក៏ដឹងថា រថយន្តខាងលើនេះពិតជាមានម្ចាស់ឈ្មោះ ស៊ីន សុខ ភេទប្រុស អាយុ៥០ឆ្នាំ ដែលបាត់នោះមែន ដោយការពិនិត្យផ្លាកលេខនិងកាតគ្រីដូចគ្នា១០០ភាគរយ ក៏រាយការណ៍ទៅសមត្ថកិច្ចឱ្យចាប់ខ្លួនជនសង្ស័យទាំង២នាក់ខាងលើ ។
នារសៀលថ្ងៃដដែលនោះ ជនទាំង២នាក់ ត្រូវបានបញ្ជូនទៅកាន់ស្នងការដ្ឋាននគរបាលខេត្តដើម្បីសាកសួរបន្ត ។ លោកឧត្តមសេនីយ៍ត្រី ប្រាក់ ប៊ុនណុន ស្នងការរងនគរបាលខេត្តទទួលផែនព្រហ្មទណ្ឌ ឱ្យដឹងថា ក្នុងករណីខាងលើនេះលោកស្នងការបានទាក់ទងទៅលោកស្នងការខេត្តព្រះសីហនុ ឱ្យមកទទួលយកជនសង្ស័យទាំង២នាក់ ដើម្បីចាត់ការតាមច្បាប់ហើយ ៕
ចែករំលែកព័តមាននេះ