រាជធានីភ្នំពេញ ៖ គណៈប្រតិភូវិនិយោគដែលដឹកនាំដោយទីភ្នាក់ងារអភិវឌ្ឍន៍ទេសចរណ៍បារាំង Atout France និងប្រតិបត្តិករទេសចរណ៍ធំៗរបស់បារាំង នឹងមកបំពេញទស្សនកិច្ចនៅកម្ពុជានៅអំឡុងខែតុលា ឆ្នាំ២០១៨ខាងមុខនេះ ដើម្បីពង្រឹង និងពង្រីកកិច្ចសហប្រតិបត្តិការ…
រាជធានីភ្នំពេញ ៖ គណៈប្រតិភូវិនិយោគដែលដឹកនាំដោយទីភ្នាក់ងារអភិវឌ្ឍន៍ទេសចរណ៍បារាំង Atout France និងប្រតិបត្តិករទេសចរណ៍ធំៗរបស់បារាំង នឹងមកបំពេញទស្សនកិច្ចនៅកម្ពុជានៅអំឡុងខែតុលា ឆ្នាំ២០១៨ខាងមុខនេះ ដើម្បីពង្រឹង និងពង្រីកកិច្ចសហប្រតិបត្តិការ ក៏ដូចជាសម្លឹងរកឱកាសវិនិយោគនៅកម្ពុជា។ នេះបើតាមការថ្លែងរបស់មន្ត្រីជាន់ខ្ពស់នៃស្ថានទូតបារាំង ប្រចាំនៅកម្ពុជា ។
នៅក្នុងជំនួបពិភាក្សាការងារជាមួយលោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ កាលពីពេលថ្មីៗនេះ លោក Laurent Triponey ភារធារីស្តីទីនៃស្ថានទូតបារាំង ប្រចាំកម្ពុជា បានឲ្យដឹងថា ការពង្រឹងនិងពង្រីកទំនាក់ទំនងសហប្រតិបត្តិការលើវិស័យទេសចរណ៍រវាងប្រទេសទាំងពីរកម្ពុជា-បារាំង នឹងត្រូវជំរុញឲ្យកាន់តែរីកចម្រើនខ្លាំងក្លាថែមទៀត ។
លោកថ្លែងថា ៖« នៅអំឡុងខែតុលាឆ្នាំ២០១៨ ខាងមុខនេះ ដំណើរទស្សនកិច្ចនៃគណៈប្រតិភូវិនិយោគដែលដឹកនាំដោយទីភ្នាក់ងារអភិវឌ្ឍន៍ទេសចរណ៍បារាំង Atout France និងប្រតិបត្តិករទេសចរណ៍ធំៗរបស់បារាំងដូចជាក្រុមហ៊ុន Club Med, Airfrance, CroisiEurope នឹងមកកម្ពុជា ដើម្បីសម្លឹងរកឱកាសវិនិយោគ »។ លោកបណ្ឌិត ថោង ខុន ក៏បានសំដែងនូវការរីករាយ និងស្វាគមន៍ដំណើរចំពោះការរៀបចំដំណើរទស្សនកិច្ចរបស់គណៈប្រតិភូវិនិយោគបារាំងនៅខែតុលាខាងមុខនេះ និងបានជម្រាបជូនភាគីបារាំងអំពីសារសំខាន់នៃវិស័យទេសចរណ៍ក្នុងការទ្រទ្រង់សេដ្ឋកិច្ចជាតិដែលទាមទារនូវការគាំទ្រ និងចូលរួមពីគ្រប់ភាគីពាក់ព័ន្ធ ពិសេសដៃគូអភិវឌ្ឍន៍ និងសហប្រតិបត្តិការនានា ។
លោករដ្ឋមន្ត្រីក៏បានលើកឡើងនូវចំណុចជាយុទ្ធសាស្ត្រសំខាន់មួយចំនួន និងបានស្នើឲ្យភាគីបារាំងយកចិត្តទុកដាក់លើវិស័យអាទិភាពមួយចំនួន ដើម្បីរួមចំណែកអភិវឌ្ឍន៍វិស័យទេសចរណ៍នៅកម្ពុជាប្រកបដោយនិរន្តរភាព និងការទទួលខុសត្រូវផងដែរ ។ លោករដ្ឋមន្ត្រី ថោង ខុន បានបញ្ជាក់ថា ៖« ជាអាទិភាព រួមមានសារសំខាន់នៃជំនាញវិជ្ជាជីវៈទេសចរណ៍តាមរយៈការដាក់ចេញនូវយុទ្ធនាការ « សេវាមួយ ស្តង់ដារមួយ » (One service, one standard ) , « បុគ្គលិកម្នាក់ ជំនាញមួយ » ( One person, one skill ) ដើម្បីរួមចំណែកពង្រឹង និងលើកកម្ពស់គុណភាពសេវាកម្មទេសចរណ៍ »។
លោកបណ្ឌិតរដ្ឋមន្ត្រីបន្តថា ការពង្រឹងការសិក្សាទីផ្សារ និងផ្សព្វផ្សាយទេសចរណ៍ ក៏ជាការងារសំខាន់ផងដែរ ខណៈដែរបច្ចុប្បន្ន ក្រុមប្រឹក្សាសិក្សាទីផ្សារ និងផ្សព្វផ្សាយទេសចរណ៍ត្រូវបានបង្កើតឡើងដោយមានការចូលរួមយ៉ាងសំខាន់ពីគ្រប់ភាគីពាក់ព័ន្ធរដ្ឋ និងឯកជន ដើម្បីជំរុញ និងទ្រទ្រង់ការផ្សព្វផ្សាយទេសចរណ៍កម្ពុជាឲ្យកាន់តែខ្លាំងក្លាថែមទៀត ពិសេសគឺ ការពង្រឹងការគ្រប់គ្រង និងផ្សព្វផ្សាយទេសចរណ៍តាមប្រព័ន្ធបច្ចេកវិទ្យា និងប្រព័ន្ធអនឡាញ ។
លោករដ្ឋមន្ត្រី ក៏បានជម្រាបជូនអំពីសារសំខាន់នៃវិស័យកីឡាទេសចរណ៍ដែលបានដើរតួនាទី និងចូលរួមយ៉ាងសកម្មដែលរួមចំណែកដល់ការបង្កើតផលិតផលទេសចរណ៍ និងការផ្សព្វផ្សាយកម្ពុជាផងដែរ តាមរយៈព្រឹត្តិការណ៍កីឡាទេសចរណ៍នានាកន្លងមក ដូចជា កីឡា Half marathon, Triathlon និងបានស្នើភាគីបារាំងជួយជំនួយបច្ចេកទេស ដើម្បីត្រៀមលក្ខណៈទទួលទេសចរក្នុងព្រឹត្តិកាណ៍កីឡាទេសចរណ៍ធំៗដែលកម្ពុជាត្រៀមរៀបចំ ដូចជា Asian Beach Games នៅឆ្នាំ២០២២ និងកីឡាSEA Games នៅឆ្នាំ២០២៣ ។
គួរបញ្ជាក់ថា កិច្ចពិភាក្សានេះ ភាគីទាំងពីរបានឯកភាពត្រៀមរៀបចំសេចក្តីព្រាងអនុស្សរណៈនៃយោគយល់យោគគ្នា ស្តីពីសហប្រតិបត្តិការលើវិស័យទេសចរណ៍រវាងព្រះរាជាណាចក្រកម្ពុជា និងសាធារណរដ្ឋបារាំង ដើម្បីចុះហត្ថលេខានៅពេលខាងមុខ ។
យោងតាមរបាយការណ៍ក្រសួងទេសចរណ៍ ក្នុងឆ្នាំ២០១៧ ទេសចរបារាំងដែលមកទស្សនាកម្ពុជា មានចំនួន១៦៦.៣៥៦នាក់ កើនឡើង ១០,៧% ឈរលំដាប់លេខរៀងទី១០ ហើយក្នុងរយៈពេល៦ខែដើមឆ្នាំ២០១៨ កម្ពុជាទទួលទេសចរបារាំងចំនួន៨៥.៩០៦នាក់ កើនឡើង៣% ធៀបនឹងរយៈពេលដូចគ្នាឆ្នាំ២០១៧ ឈរនៅលំដាប់លេខរៀងទី៨ ៕
ចែករំលែកព័តមាននេះ