ខេត្តពោធិ៍សាត់៖ យ៉ាងហោចណាស់មនុស្ស២នាក់បានស្លាប់នៅនឹងកន្លែងកើតហេតុ និង៤នាក់ទៀតរងរបួសយ៉ាងធ្ងន់ធ្ងរ ក្នុងហេតុការណ៍គ្រោះថ្នាក់ចរាចរណ៍ចំនួន៣ករណីរយៈពេលតែមួយថ្ងៃក្នុងឃុំតែមួយ គឺកើតឡើងកាលពីថ្ងៃទី៦ ខែកញ្ញាឆ្នាំ២០១៨ នៅឃុំស្នាមព្រះ ស្រុកបាកាន។
ករណីទី១-ប៉ូលីសបានឲ្យដឹងថា កាលពីវេលាម៉ោង១១ព្រឹកថ្ងៃទី៦ ខែកញ្ញា ឆ្នាំ២០១៨ នៅលើកំណាត់ផ្លូវជាតិលេខ៥ ចន្លោះគីឡូម៉ែតលេខ១៩២ ១៩៣ ស្ថិតក្នុងភូមិកំពែងស្វាយ ឃុំស្នាមព្រះ ស្រុកបាកាន មានករណីម៉ូតូបុកមនុស្សដើរឆ្លងថ្នល់ បណ្ដាលឲ្យរបួសធ្ងន់ទាំង២នាក់ ។
ម៉ូតូមួយគ្រឿងម៉ាកហុងដា ធុនសេ១២៥ ពណ៌ខ្មៅ ពាក់ស្លាកលេខ ពោធិ៍សាត់ ១D-៦១៥២ បើកបរដោយឈ្មោះ ហេង សម្បត្តិ ភេទប្រុសអាយុ៥៣ឆ្នាំ រស់នៅភូមិដំណាក់អំពិល ឃុំផ្ទះរុង ស្រុកភ្នំក្រវាញ ។ ចំណែកអ្នកថ្មើរជើងឈ្មោះលិញ ធី ភេទប្រុសអាយុ៥៩ឆ្នាំ រស់នៅភូមិស្វាយអាត់ឃុំស្នាមព្រះ ស្រុកបាកាន បានរងរបួសធ្ងន់។
ករណីទី២-កាលវេលាម៉ោង៥និង៣០នាទីល្ងាចថ្ងៃទី៦ កញ្ញា ឆ្នាំ២០១៨ នៅលើកំណាត់ផ្លូវជាតិលេខ៥ ចន្លោះគីឡូម៉ែតលេខ១៩៥ ១៩៦ ស្ថិតក្នុងភូមិក្រពើរោទិ៍ ឃុំស្នាមព្រះ ស្រុកបាកាន មានគ្រោះថ្នាក់ចរាចរណ៍រវាងរថយន្ដបុកអ្នកជិះម៉ូតូបណ្តាលឱ្យរងរបួសធ្ងន់២នាក់។
រថយន្ដមួយគ្រឿងម៉ាកឡិចស៊ីស RX300 ពណ៌ទឹកមាស ពាក់ស្លាកភ្នំពេញ ២A-៨៦៦៩ អ្នកបើកបរមិនស្គាល់អត្តសញ្ញាណបានរត់គេចខ្លួនបាត់។ ចំណែកម៉ូតូម៉ាកវ៉េវអាល់ហ្វា ពណ៌ខ្មៅ គ្មានស្លាកលេខ។ អ្នកបើកម៉ូតូឈ្មោះ ផុន រិទ្ធ ភេទប្រុសអាយុ២៦ឆ្នាំ រស់នៅភូមិស្រីបណ្ឌិតឃុំស្នាស្រុកសំរោងខេត្តតាកែវ បានរងរបួសធ្ងន់ រីឯអ្នករួមដំណើរម្នាក់ឈ្មោះ រ៉េត រ៉ន ភេទប្រុស អាយុ២១ឆ្នាំ រស់នៅភូមិក្រពើរោទិ៍ ឃុំស្នាមព្រះ ស្រុកបាកាន បានរងរបួសធ្ងន់។
និងករណីទី-៣ កាលពីវេលាម៉ោង៧និង១០នាទីល្ងាចថ្ងៃទី៦ កញ្ញា ឆ្នាំ២០៨ នៅលើកំណាត់ផ្លូវជាតិលេខ៥៥ ចន្លោះគីឡូម៉ែតលេខ០០១ ០០២ ស្ថិតក្នុងភូមិកំពែងស្វាយ ឃុំស្នាមព្រះ ស្រុកបាកាន បុរស២នាក់បានជិះម៉ូតូឌុបគ្នាទៅបុកគូទរថយន្ដដែលចតស្ងៀម បណ្ដាលឲ្យស្លាប់ទាំង២នាក់នៅនឹងកន្លែងកើតហេតុ។ ជនរងគ្រោះជាអ្នកបើកម៉ូតូឈ្មោះ សាក់ កែវ ភេទប្រុសអាយុ២៥ឆ្នាំ រស់នៅភូមិជម្រុមសៀម សង្កាត់លលក.ស ក្រុងពោធិ៍សាត់ បានស្លាប់នៅនឹងកន្លែង ចំណែកជនរងគ្រោះម្នាក់ទៀតជាអ្នករួមដំណើរឈ្មោះ ម៉ៅ សារ៉ាន់ ភេទប្រុស អាយុ៣១ឆ្នាំ រស់នៅភូមិដង្កៀបក្ដាម ឃុំស្នាមព្រះ ស្រុកបាកាន បានស្លាប់នៅនឹងកន្លែងកើតហេតុ។
ក្នុងករណីគ្រោះថ្នាក់ចរាចរណ៍ទាំង៣ករណីខាងលើ រថយន្តនិងម៉ូតូត្រូវបានសមត្ថកិច្ចយកមករក្សាទុកនៅប៉ុស្ដិនគរបាលរដ្ឋបាលស្នាមព្រះ ដើម្បីដោះស្រាយទៅតាមច្បាប់ចរាចរណ៍ផ្លូវគោក។ ចំណែកជនរងគ្រោះកំពុងសម្រាកព្យាបាលនៅមន្ទីរពេទ្យ រីឯសពត្រូវបានប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណីរៀងៗខ្លួន៕
ចែករំលែកព័តមាននេះ