ខេត្តបន្ទាយមានជ័យ ៖ ពលករជាច្រើននាក់បានសម្តែងការខឹងសម្បានឹងនគរបាលម្នាក់ពាក់ព័ន្ធរឿងធ្វើប័ណ្ណឆ្លងដែន Border Pass នៅការិយាល័យច្រកចេញចូលតែមួយ ក្នុងសាលាខេត្តបន្ទាយមានជ័យ ដោយចោទថា ទទួលប្រាក់ពួកគាត់ម្នាក់ជាង២០០០បាត គិតជាប្រាក់ខ្មែរ…
ខេត្តបន្ទាយមានជ័យ ៖ ពលករជាច្រើននាក់បានសម្តែងការខឹងសម្បានឹងនគរបាលម្នាក់ពាក់ព័ន្ធរឿងធ្វើប័ណ្ណឆ្លងដែន Border Pass នៅការិយាល័យច្រកចេញចូលតែមួយ ក្នុងសាលាខេត្តបន្ទាយមានជ័យ ដោយចោទថា ទទួលប្រាក់ពួកគាត់ម្នាក់ជាង២០០០បាត គិតជាប្រាក់ខ្មែរ ជិត៣០ម៉ឺនរៀល រយៈពេលជាង២ខែ នៅតែធ្វើមិនបាន ។
ពលករ២៣នាក់លើកឡើងថា ពួកគាត់បានចំណាយប្រាក់ម្នាក់ ២២០០បាត និងឯកសារតាំងពីថ្ងៃទី០១ដើម ខែកក្កដា ២០១៨ តាមរយៈនគរបាលម្នាក់ គឺលោកវរសេនីយ៍ត្រី ហ៊ឹម ឡាត់ មេផ្នែកនគរបាលប៉ុស្តិ៍ត្រួតពិនិត្យ ចំណុចចេញចូលសាលាខេត្តបន្ទាយមានជ័យ ដើម្បីឲ្យរត់ការធ្វើប័ណ្ណឆ្លងដែនឲ្យ ។ ជុំវិញករណីនេះ លោកវរសេនីយ៍ត្រី ហ៊ឹមឡាត់ ទទួលស្គាល់ថា លោកពិតជាបានយកប្រាក់ពីពលករម្នាក់២២០០បាត ចំនួន២៣នាក់មែន ។
តំណាងពលករម្នាក់សុំមិនបញ្ចេញឈ្មោះប្រាប់ថា ដោយសាររឿងរ៉ាវខាងលើបានធ្វើឲ្យគាត់និងក្រុមគ្រួសារចុះឡើងទៅមកទីតាំងច្រកចេញចូលតែមួយ នៅសាលាខេត្តបន្ទាយមានជ័យស្ទើរសឹកកង់រថយន្តរំខានដល់ការងាររកស៊ី និងពេលវេលា ព្រោះក្រុមពលករចេះតែជជីកសួរឥតឈប់ឈរ ។
តំណាងរូបនេះបន្តថា ក្រុមពលករចេះតែធុញទ្រាន់ ព្រោះយូរពេកក៏នាំគ្នាសំណូមពរសុំលោកវរសេនីយ៍ត្រីខាងលើយកប្រាក់ និងឯកសារពាក់ព័ន្ធវិញ តែត្រូវលោកប៉ូលិសរូបនេះចេះតែកុហកថា ចាំមួយអាទិត្យទៀតៗមានរយៈពេល២ខែ៥ថ្ងៃហើយ ចាប់តាំងថ្ងៃទី០១ កក្កដា ២០១៨ ដល់ថ្ងៃទី៦ កញ្ញានេះ ។
សង្ស័យរឿងរ៉ាវនេះបែកធ្លាយដល់ថ្នាក់ដឹកនាំក្នុងខេត្ត លោកវរសេនីយ៍ត្រី ហ៊ឹម ឡាត់ បានព្រមប្រគល់ប្រាក់ចំនួន៥០៦០០បាត (ប្រាំម៉ឺនប្រាំមួយរយបាត) និងអត្តសញ្ញាណប័ណ្ណ១៦សន្លឹក អត្រានុគោលដ្ឋាន៧ ឲ្យតំណាងពលករវិញ នៅម៉ោង៤និង៥០នាទីរសៀល ថ្ងៃទី០៦ កញ្ញា ២០១៨ ក្នុងប៉ុស្តិ៍យាមផ្លូវចេញចូលសាលាខេត្តបន្ទាយមានជ័យនោះ ។
យ៉ាងណ៏ក៌ដោយមុនប្រគល់ប្រាក់ និងឯកសារពាក់ព័ន្ធនេះ លោកវរសេនីយ៍ត្រី ហ៊ឹម ឡាត់ បានព្យាយាមអង្វរតំណាងពលករដោយសន្យាធ្វើប័ណ្ណឆ្លងដែនឲ្យ១ថ្ងៃ៥នាក់ ចាប់ពីថ្ងៃទី៦ កញ្ញានេះតទៅ រ យៈពេល៥ថ្ងៃ ឲ្យអស់២៣នាក់ ដែលលោកទទួលប្រាក់នោះ ផ្ទុយទៅវិញនៅម៉ោងជិត៥ល្ងាចបែរជាលោក ហ៊ឹម ឡាត់ ព្រមប្រគល់ប្រាក់ និងឯកសារឲ្យតំណាងពលករវិញ ទំនងនាំគ្នាទំពារលេបដែរ ប៉ុន្តែលេបមិនរួច ខ្លាចស្លាក់ក៏ខ្ជាក់វិញ ៕
ចែករំលែកព័តមាននេះ