ខេត្តព្រះសីហនុ ៖ យុវជន៣នាក់ដែលអះអាងថា ជាក្រុមការងាររបស់ក្រសួងសាធារណៈការ ផ្នែកបច្ចេកទេសវាស់វែងដីធ្លីដោយម៉ាស៊ីន (Total) ត្រូវបានជាប់ចោទពីម្ចាស់ផ្ទះពីបទរំលោភលើសេចក្តីទុកចិត្តលួចចូលទៅក្នុងរបងដីលំនៅដ្ឋានរបស់លោកស្រី វង្ស និមល ដើម្បីលួចយកទិន្នន័យដីលំនៅដ្ឋានរបស់អ្នកស្រីដោយមិនមានការអនុញាតិពីអ្នកស្រី…
ខេត្តព្រះសីហនុ ៖ យុវជន៣នាក់ដែលអះអាងថា ជាក្រុមការងាររបស់ក្រសួងសាធារណៈការ ផ្នែកបច្ចេកទេសវាស់វែងដីធ្លីដោយម៉ាស៊ីន (Total) ត្រូវបានជាប់ចោទពីម្ចាស់ផ្ទះពីបទរំលោភលើសេចក្តីទុកចិត្តលួចចូលទៅក្នុងរបងដីលំនៅដ្ឋានរបស់លោកស្រី វង្ស និមល ដើម្បីលួចយកទិន្នន័យដីលំនៅដ្ឋានរបស់អ្នកស្រីដោយមិនមានការអនុញាតិពីអ្នកស្រី ។
បើតាមការរៀបរាប់របស់អ្នកស្រីបានឲ្យដឹងថា ហេតុការណ៍ខាងលើបានកើតឡើងនៅវេលាម៉ោង១០និង៣០នាទីព្រឹក ថ្ងៃទី០៦ ខែកញ្ញា ឆ្នាំ២០១៨ នៅក្នុងដីលំនៅដ្ឋានរបស់លោកស្រីដែលមានទីតាំងស្ថិតនៅខាងក្រោយសាលាសង្កាត់លេខ០៣ ស្ថិតក្នុងភូមិ០១ សង្កាត់លេខ០៣ ក្រុង-ខេត្តព្រះសីហនុ ។
លោកស្រីបានបន្តឲ្យដឹងទៀតថា នេះជាសកម្មភាពលួចរំលោភចូលមកក្នុងរបងដីដែលជាលំនៅដ្ឋានរបស់លោកស្រីជាលើកទី២ លោកស្រីបានបញ្ជាក់ទៀតថា លើកទី១នៅល្ងាចថ្ងៃទី០៤ ខែកញ្ញា ឆ្នាំ២០១៨ ក្រុមយុវជនខាងលើបានប្រើថ្នាំពណ៌មកបាញ់ជាច្រើនចំណុចនៅក្នុងដីលំនៅដ្ឋានខាងលើដែលសកម្មភាពនេះអាចចាត់ទុកថា មានចេតនាគិតទុកជាមុនក្នុងករណីរំលោភលើសេចក្តីទុកចិត្តដោយទុច្ចរិត ជាច្រើនករណីផ្សេងទៀត ។
លោកស្រី វង្ស និមល បានបញ្ជាក់ថា លោកស្រីគ្រោងដាក់ពាក្យបណ្តឹងទៅសាលាដំបូងខេត្តដើម្បីជាវិធានការការពារទុកជាមុន និងដោះស្រាយរកយុត្តិធម៏ទៅតាមនីតិវិធីច្បាប់ ។
ដោយឡែកយុវជនទាំង៣នាក់ខាងលើបានសារភាពថា នឹងទទួលកំហុសរបស់ខ្លួនពីសកម្មភាពដែលខ្លួនគេបានប្រព្រឹត្តនៅចំពោះមុខនគរបាលប៉ុស្តិ៍រដ្ឋបាលសង្កាត់លេខ០៣ និងបានធ្វើកិច្ចសន្យាដោយផ្តិតមេដៃស្តាំទុកជាភស្តុតាងថា និងឈប់ចូលមកក្នុងលំនៅដ្ឋានរបស់លោកស្រីឬលំនៅដ្ឋានអ្នកដទៃដោយមិនមានការអនុញ្ញាតិទៀតហើយ ។
បន្ទាប់មកបានលោក ព្រំ សេង អនុប្រធានមន្ទីរធនធានទឹកនិងឧត្តុនិយមខេត្តព្រះសីហនុបានចេញមុខមកធានាទទួលខុសត្រូវនៅចំពោះមុខនគរបាលប៉ុស្តិ៍រដ្ឋបាលខាងលើដើម្បីបានរួចខ្លួនពីការចោទប្រកាន់របស់ម្ចាស់លំនៅដ្ឋានខាងលើ ៕
ចែករំលែកព័តមាននេះ