រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់ក្រសួងការបរទេសបានឲ្យដឹងថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានឹងដឹកនាំគណៈប្រតិភូជាន់ខ្ពស់អញ្ជើញចូលរួមពិធីតាំងពិព័រណ៍ចិន-អាស៊ានលើកទី១៥ ពីថ្ងៃទី១០ ដល់១២ ខែកញ្ញា…
រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់ក្រសួងការបរទេសបានឲ្យដឹងថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានឹងដឹកនាំគណៈប្រតិភូជាន់ខ្ពស់អញ្ជើញចូលរួមពិធីតាំងពិព័រណ៍ចិន-អាស៊ានលើកទី១៥ ពីថ្ងៃទី១០ ដល់១២ ខែកញ្ញា ឆ្នាំ២០១៨ នៅទីក្រុងណាននីង ខេត្តក្វាងស៊ី តាមការអញ្ជើញរបស់រដ្ឋាភិបាលនៃសាធារណរដ្ឋប្រជាមានិតចិន ។
សម្តេចតេជោនាយករដ្ឋមន្ត្រីនឹងត្រូវអមដំណើរដោយលោក ហោ ណាំហុង ឧបនាយករដ្ឋមន្ត្រី លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោក ថោង ខុន រដ្ឋមន្ត្រីក្រសួងទេសចរណ៍ រួមទាំងឥស្សរជនរាជរដ្ឋាភិបាលដទៃទៀត និងធុរជនពីសភាពាណិជ្ជកម្មកម្ពុជា ។
គួរបញ្ជាក់ថា ពិព័រណ៍ចិន-អាស៊ាន លើកទី១៥ ដែលនឹងប្រារព្ធឡើងក្រោមមូលបទ «រួមគ្នាកសាងវិថីសូត្រសមុទ្រ សតវត្សទី២១ និងនវានុវត្តសហគមន៍ចិន-អាស៊ាន» នឹងដាក់បង្ហាញនូវផលិតផលផ្សេងៗគ្នាជាច្រើនពីអាស៊ាន និងចិន ដើម្បីជម្រុញកិច្ចសហប្រតិបត្តិការរបស់វិស័យឯកជន នៅក្នុងផ្នែកពាណិជ្ជកម្មធុរៈកិច្ចវិនិយោគ និងទេសចរណ៍ឲ្យកាន់តែប្រសើរឡើង ។
សម្តេចតេជោនាយករដ្ឋមន្ត្រីនឹងថ្លែងសុន្ទរកថា គន្លឹះនៅពិធីបើកពិព័រណ៍ចិន-អាស៊ានលើកទី១៥ ក្នុងគោលបំណងលើកស្ទួយពាណិជ្ជកម្ម និងវិនិយោគរវាងអាស៊ាន និងចិនរួមទាំងទាក់ទាញវិនិយោគគិន និងភ្ញៀវទេសចរចិនដែលមានសក្តានុពលមកកាន់តំបន់អាស៊ាន ។ ក្នុងនាមកម្ពុជាជាប្រទេសកិត្តិយសនៅក្នុងព្រឹត្តិការណ៍ឆ្នាំនេះសម្តេចតេជោនាយករដ្ឋមន្ត្រី និងឯកឧត្តម ហាន់ ចឹង ឧបនាយករដ្ឋមន្ត្រីចិននឹងអញ្ជើញជាអធិបតីក្នុងពិធីកាត់ខ្សែបូណ៍ ដើម្បីសម្ពោធព្រះពន្លាជាតិកម្ពុជារួមទាំងអញ្ជើញទស្សនាសាលពិព័រណ៍ពាណិជ្ជកម្មកម្ពុជា ។
អំឡុងពេលស្នាក់នៅប្រទេសចិនសម្តេចតេជោនាយករដ្ឋមន្ដ្រីនឹងជួបពិភាក្សាដាច់ដោយឡែកពីគ្នាជាមួយឥស្សរជនចិន និងទទួលការជួបសម្តែងការគួរសមពីថ្នាក់ដឹកនាំខេត្តក្វាងស៊ី និងថ្នាក់ដឹកនាំផ្នែកធុរៈកិច្ចសំខាន់ៗ និងនាយកប្រតិបត្តិនៃក្រុមហ៊ុននានារបស់ចិនព្រមទាំងផ្តល់បទសម្ភាសន៍ដល់សារព័ត៌មានចិនផងដែរ ។
គួរកត់សម្គាល់ផងដែរថា ពិព័រណ៍ចិន-អាស៊ានត្រូវបានប្រារព្ធឡើងជារៀងរាល់ឆ្នាំ ក្នុងគោលបំណងសំខាន់ គឺដើម្បីពង្រឹង និងពង្រីកបន្ថែមទៀតនូវកាលានុវត្តភាពធុរកិច្ច និងពាណិជ្ជកម្មឲ្យកាន់តែស៊ីជម្រៅ ដើម្បីសម្រេចឲ្យបាននូវគោលដៅវិនិយោគទុននូវទំហំទឹកប្រាក់១ទ្រីលានដុល្លារអាមេរិកពីប្រទេសចិនមកកាន់តំបន់អាស៊ាន និង១៥០ពាន់លានដុល្លារអាមេរិកពីតំបន់អាស៊ានទៅកាន់ប្រទេសចិននៅត្រឹមឆ្នាំ២០២០ ៕
ចែករំលែកព័តមាននេះ