ខេត្តឧត្តរមានជ័យ ៖ សេចក្តីរាយការណ៍មួយបានឲ្យដឹងថា កាលពីព្រលប់ថ្ងៃទី៤ ខែកញ្ញាកន្លងទៅ មានប្រជាពលរដ្ឋនៅភូមិដុងអារញ្ញ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ បានទូរស័ព្ទប្តឹងសមត្ថកិច្ចគ្រប់ច្រកល្ហក…
ខេត្តឧត្តរមានជ័យ ៖ សេចក្តីរាយការណ៍មួយបានឲ្យដឹងថា កាលពីព្រលប់ថ្ងៃទី៤ ខែកញ្ញាកន្លងទៅ មានប្រជាពលរដ្ឋនៅភូមិដុងអារញ្ញ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ បានទូរស័ព្ទប្តឹងសមត្ថកិច្ចគ្រប់ច្រកល្ហក ឱ្យជួយរកកូនស្រីម្នាក់ដែលបាត់ចេញពីផ្ទះអស់រយ:ពេល៥ថ្ងៃហើយមិនដឹងជាទៅណា ។
លុះល្ងាចថ្ងៃ៤ ខែកញ្ញាដដែល កូនស្រីនោះបានខ្ចីទូរស័ព្ទស្រី្តខារ៉ាអូខេម្នាក់ ទូរស័ព្ទទៅម្តាយថា ខ្លួនត្រូវគេចាប់បង្ខាំងចាក់សោទុកក្នុងបន្ទប់ខារ៉ាអូខេមួយ នៅស្រុកអន្លង់វែង ខេត្តឧត្តរមានជ័យ ។ បន្ទាប់ពីទទួលបានព័ត៌មាននេះ សមត្ថកិច្ចនគរបាលខេត្តឧត្តរមានជ័យ បានធ្វើការស្រាវជ្រាវលេខទូរស័ព្ទ ដែលកូនទាក់ទងទៅម្តាយនោះ ហើយរហូតដល់វេលាម៉ោង១០និង៥៤នាទីយប់ សមត្ថកិច្ចក៏បានរកឃើញក្មេងស្រីជាកូនដែលថា ចេញបាត់ពីផ្ទះនោះ ។ ក្មេងស្រីរូបនេះឈ្មោះ ងួន គឹមសៀន អាយុ១៦ឆ្នាំ រស់នៅភូមិដុងអារញ្ញ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ។
នាងមានឪពុកឈ្មោះ អោក សឿន អាយុ៣៦ឆ្នាំ រកស៊ីនៅប្រទេសថៃ ម្តាយឈ្មោះ វ៉ែន ចន្ធី អាយុ៤០ឆ្នាំ មុខរបរលក់គ្រឿងទេស នៅមុខផ្ទះ ។ ក្រោយពីបានរកឃើញក្មេងស្រីនោះ នាងបាននិយាយការពិតពីមូលហេតុ ដែលនាងចាកចេញពីផ្ទះរហូត ហ៊ានកុហកម្តាយថា គេចាប់បង្ខាំងដើម្បីទាមទារប្រាក់ ។
តាមចម្លើយថា នាងបានចេញពីផ្ទះ៨ថ្ងៃមកហើយ ដោយពុំបានប្រាប់ម្តាយទេ ដោយសាររស់នៅជាមួយម្តាយអត់មានលុយចាយ ទើបចាកចេញពីផ្ទះដើម្បីទៅរកប្រាក់ ។ នាងបន្តថា ពេលចេញពីផ្ទះមានគ្នា៥នាក់គឺប្រុស២ ស្រី៣នាក់ ក្នុងនោះ មានម្តាយធម៌ឈ្មោះ ចឿង ចិន និងឪពុកធម៌ឈ្មោះ ផូ រិទ្ធ ក៏ទៅជាមួយនាងដែរ ។
ពេលចេញផ្ទះថ្ងៃដំបូង បានទៅដេកនៅភូមិអង្គ្រង ឃុំដំដែក ស្រុកសូទ្រនិគម ខេត្តសៀមរាបចំនួន៥ថ្ងៃ នៅផ្ទះបងប្អូនឪពុកធម៌ ។ បន្ទាប់មក បន្តដំណើរទៅកាន់ស្រុកអន្លង់វែង គឺទៅផ្ទះប្អូនបង្កើតរបស់ឪពុកធម៌ដែលធ្វើការនៅខារ៉ាអូខេមួយយីហោ «ផ្កាយមាស» ។ ពេលដល់ទីនោះ នាងបានសុំគេចូលធ្វើការនៅខារ៉ាអូខេនោះតែម្តងទៅ និងទើបធ្វើការបាន២ថ្ងៃ ដោយពុំមានការលួងលោមឆបោក ឬបង្ខាំងទុកដូចម្តាយនាងប្តឹងសមត្ថកិច្ចឡើយ ។
ចំពោះរឿងនាងទូរស័ព្ទទៅម្តាយថា ត្រូវគេបង្ខាំងទុកក្នុងបន្ទប់ខារ៉ាអូខេនោះ ជារឿងមិនពិតទេ គឺនាងបានខ្ចីទូរស័ព្ទម្តាយធម៌និយាយទៅម្តាយបង្កើត ដើម្បីសុំលុយគាត់ចាយ ព្រោះអត់មានលុយមួយរៀលនៅនឹងខ្លួន ម្ល៉ោះហើយបានជាបង្កើតរឿងថា ត្រូវគេចាប់បង្ខាំង ។ បន្ទាប់ពីការបំភ្លឺរបស់នាងឈ្មោះ ងួន គឹមសៀន នេះ សមត្ថកិច្ចបានពិនិត្យនិងពិចារណាលើសម្តីនាងដែលនិយាយហាក់បីដូចជាមនុស្សញៀនថ្នាំ ដូច្នេះសមត្ថកិច្ចក៏បានធ្វើតេស្តរកសារធាតុញៀននៅនឹងខ្លួននាងផងដែរ ។
សមត្ថកិច្ចសន្និដ្ឋានថា ករណីនេះពុំមានពាក់ព័ន្ធនឹងបទល្មើសព្រហ្មទណ្ឌណាមួយទេ ទំនងជានាងញៀនថ្នាំ ឬក៏មកពីអត់លុយចាយ ទើបបានជាប្រឌិតរឿងដូច្នេះ ។ ក្រោយមក សមត្ថកិច្ចបានទាក់ទងទៅអាណាព្យានបាល ឲ្យទៅទទួលយកនាងត្រឡប់ទៅផ្ទះវិញ ៕
ចែករំលែកព័តមាននេះ