រាជធានីភ្នំពេញ ៖ មន្ដ្រីផ្នែកសណ្ដាប់ធ្នាប់សាលាខណ្ឌដូនពេញមួយរូបទទួលរង អំពើហិង្សាពីបុរសពីរនាក់បងប្អូនបានយកកាំបិតមុខស្រួចចាក់ធ្លាយពោះវៀន កាលពីវេលាម៉ោង៧និង៣០នាទីយប់ ថ្ងៃទី៨ ឧសភា ឆ្នាំ២០១០ នៅចំណុចកែងផ្លូវលេខ៨៨ និង៦១ ស្ថិតក្នុងសង្កាត់វត្ដភ្នំខណ្ឌដូនពេញ ខណៈពេលមន្ដ្រីរងគ្រោះឃាត់រទេះម៉ូតូច្នៃលក់គ្រឿងហូបចុកគ្មានសណ្ដាប់ធ្នាប់ដើម្បីធ្វើការអប់រំ ។ជនរងគ្រោះក្នុងអំពើហិង្សាពីអ្នកលក់ដូរ អនាធិបតេយ្យនោះ ឈ្មោះម៉ៅ ផាន់ ភេទប្រុស អាយុ២០ឆ្នាំ ស្រុកកំណើតនៅឃុំប្រភ្នំ ស្រុកអង្គរជ័យ ខេត្ដកំពត ជាបុគ្គលិកផ្នែក សណ្ដាប់ធ្នាប់ សាលាខណ្ឌដូនពេញ ។
ចំណែកជនបង្កទាំងពីរនាក់បងប្អូនគឺម្នាក់ឈ្មោះយិន ប៊ុនរិទ្ធ ភេទប្រុស អាយុ២៥ឆ្នាំ និងម្នាក់ ទៀតឈ្មោះយិន រតនា ភេទប្រុស អាយុ២៣ឆ្នាំ ពីរនាក់នេះមុខរបរលក់គ្រឿងហូបចុក តាមរទេះច្នៃម៉ូតូ ស្នាក់នៅផ្ទះជួលសង្កាត់គីឡូ ម៉ែត្រលេខ៦ ខណ្ឌឫស្សីកែវ ។លោកសុខ សម្បត្ដិ អភិបាលខណ្ឌដូនពេញ បានមានប្រសាសន៍ថា ដោយមើលឃើញភាពអនាធិបតេយ្យក្នុងការយកចិញ្ចើមផ្លូវ ក៏ដូចជាសួនច្បារធ្វើជាកន្លែងលក់ដូរ ទើបកម្លាំងផ្នែកសណ្ដាប់ធ្នាប់សាលាខណ្ឌដូនពេញ ធ្វើការផ្សព្វផ្សាយតាមរថយន្ដ និងណែនាំអប់រំជាបន្ដបន្ទាប់ ។ ទោះជាមានការខិតខំរៀបចំសណ្ដាប់ធ្នាប់របស់សាលាខណ្ឌយ៉ាងណាក៏ដោយ គេសង្កេតឃើញមានអ្នកលក់ដូរមួយចំនួនតូចនៅតែបន្ដយកចិញ្ចើមផ្លូវ និងសួនច្បារធ្វើជាកន្លែងលក់ដូររបស់ខ្លួន ។ លុះពេលកំលាំងចុះរៀបចំ និងណែនាំក៏មានការប្រទូស្ដរ៉ាយបែបនេះ ។
ចែករំលែកព័តមាននេះ