រាជធានីភ្នំពេញ ៖ បុរសម្នាក់បើកបររថយន្តមួយគ្រឿងម៉ាកព្រូសប៉ោះពួយយ៉ាងលឿនដូចហោះទៅបុករថយន្តមួយគ្រឿងទៀតម៉ាករ៉េងរ៉ូវើររបស់ជនជាតិចិន ដែលបត់ឆ្លងផ្លូវខ្វះការប្រុងប្រយ័ត្នចំពីមុខពេញទំហឹងបណ្តាលឲ្យរងការខូចខាតទាំងសងខាង។ ហេតុការណ៍នេះកើតឡើងកាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី៧ ខែកញ្ញា ឆ្នាំ២០១៨ត្រង់ចំណុចក្បែរផ្សារមាន់អាំង តាមបណ្ដោយផ្លូវលេខ៣១៣កែងនឹងផ្លូវ៥៩២ ស្ថិតក្នុងសង្កាត់បឹងកក់ទី២ ខណ្ឌទួលគោក។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ គេឃើញបុរសជាជនជាតិចិនម្នាក់បើកបររថយន្តមួយគ្រឿងម៉ាករ៉េងរ៉ូវើរ ពណ៌ស ពាក់ស្លាកលេខ ភ្នំពេញ២AH-៥១៨៨ ធ្វើដំណើរតាមបណ្តោយផ្លូវ៥៩២ ក្នុងទិសដៅពីកើតទៅលិចនិងក្នុងល្បឿនលឿន។
ប្រភពដដែលបានបន្តថា លុះមកដល់ចំណុចកើតហេតុ រថយន្តខាងលើក៏បានបត់ឆ្លងផ្លូវទៅផ្លូវ៣១៣ដោយខ្វះការប្រុងប្រយ័ត្ន ពេលនោះស្រាប់តែមានរថយន្តមួយគ្រឿងម៉ាកព្រូស ពណ៌ទឹកប្រាក់ ពាក់ស្លាកលេខ ភ្នំពេញ ២AV-៥៧៩២ បើកបរដោយបុរសម្នាក់ជាជនជាតិខ្មែរ ធ្វើដំណើរតាមបណ្តោយផ្លូវ៥៩២ ក្នុងទិសដៅពីលិចទៅកើត និងក្នុងល្បឿនយ៉ាងលឿនដូចហោះរួចក៏ជ្រុលទៅបុករថយន្តរ៉េងរ៉ូវើរខាងលើចំពីមុខពេញទំហឹង បណ្តាលឲ្យរថយន្តម៉ាកព្រូរងការខូចខាតក្រពឹតផ្នែកខាងមុខយ៉ាងដំណំ រីឯអ្នកបើកបររងរបួសស្រាលត្រូវបានរថយន្តសង្គ្រោះ ដឹកយកទៅសង្គ្រោះនៅគ្លីនិកឯកជនមួយកន្លែង ចំណែកឯរថយន្តរ៉េងរ៉ូវើររងការខូចខាតបែកកង់និងកាងផ្នែកខាងមុខចំហៀងខាងស្តាំ ដោយឡែកជនជាតិចិនដែលជាអ្នកបើកបរបានគេចខ្លួនបាត់ពីកន្លែងកើតហេតុ ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ចំណុចកើតហេតុហើយបានទាក់ទងទៅសមត្ថកិច្ចជំនាញឲ្យចុះមកធ្វើការវាស់វែងយករថយន្តទាំងពីរគ្រឿងទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នាទៅតាមផ្លូវច្បាប់នៅពេលក្រោយ៕
ចែករំលែកព័តមាននេះ