ខេត្តបន្ទាយមានជ័យ ៖ បុរសជនជាតិចិនម្នាក់សង្ស័យប្រើថ្នាំរួចចូលទៅអីៗនៅហាងម៉ាស្សាកោសជប់ បណ្តាលឱ្យគាំងបេះដូងស្លាប់ពេលគេបញ្ជូនទៅកាន់មន្ទីរពេទ្យបង្អែកក្រុងប៉ោយប៉ែត ។ ហេតុការណ៍នេះបានកើតឡើងកាលពីវេលាទៀបភ្លឺថ្ងៃទី៦ កញ្ញា ឆ្នាំ២០១៨ នៅហាងម៉ាស្សាមួយកន្លែងក្នុងប្លុកកាស៊ីណូ ស្ថិតនៅភូមិក្បាលស្ពាន១…
ខេត្តបន្ទាយមានជ័យ ៖ បុរសជនជាតិចិនម្នាក់សង្ស័យប្រើថ្នាំរួចចូលទៅអីៗនៅហាងម៉ាស្សាកោសជប់ បណ្តាលឱ្យគាំងបេះដូងស្លាប់ពេលគេបញ្ជូនទៅកាន់មន្ទីរពេទ្យបង្អែកក្រុងប៉ោយប៉ែត ។ ហេតុការណ៍នេះបានកើតឡើងកាលពីវេលាទៀបភ្លឺថ្ងៃទី៦ កញ្ញា ឆ្នាំ២០១៨ នៅហាងម៉ាស្សាមួយកន្លែងក្នុងប្លុកកាស៊ីណូ ស្ថិតនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត។
ជនរងគ្រោះដែលស្លាប់ខាងលើឈ្មោះWU QUANZHONG ភេទប្រុស អាយុ២៧ឆ្នាំ ជាជនជាតិចិន កាន់លិខិតឆ្លងដែនលេខ E61870955។
មុនកើតហេតុ បុរសចិនខាងលើបានចូលទៅហាងម៉ាស្សាកោសជប់មួយកន្លែងនៅប្លុកកាស៊ីណូ ហើយបើយោងរបាយការណ៌សមត្ថកិច្ចដែលម្ចាស់ហាងម៉ាស្សាខាងលើបានរៀបរាប់ប្រាប់ថា គាត់(ម្ចាស់ហាងម៉ាស្សា) និងប្រពន្ធកូនកំពុងដេក ស្រាប់តែឮសម្លេងស្រែកឆោឡោ លុះពេលចេញមើល ក៏ឃើញបុរសចិនម្នាក់ក្នុងចំណោម២នាក់ដៃជើងញ័រទទ្រើក និងបញ្ឈរភ្នែក បន្ទាប់មកក៏មានសន្តិសុខកាស៊ីណូដឹកតាមម៉ូតូយកទៅសង្គ្រោះនៅគ្លីនិកមួយកន្លែងដែលនៅក្បែរនោះ។
ប្រភពពីម្ចាស់គ្លីនិកនោះបាននិយាយថា មូលហេតុដែលមិនហ៊ានទទួលជនសង្ស័យ គឺដោយសារតែសង្ស័យថា ជនរងគ្រោះស្លាប់បាត់ទៅហើយ ក៏ប្រាប់ឲ្យដឹកបន្តយកទៅមន្ទីរពេទ្យបង្អែកក្រុងប៉ោយប៉ែត។
លោកវិជ្ជបណ្ឌិតហ៊ុល សុផល្លី ប្រធានមន្ទីរពេទ្យបង្អែកក្រុងប៉ោយប៉ែតប្រាប់តាមទូរស័ព្ទថា ពិតជាមានបុរសជនជាតិចិនម្នាក់ស្លាប់ប្រាកដមែន ប៉ុន្តែលោកថា ជនរងគ្រោះបានស្លាប់មុនពេលចូលដល់មន្ទីរពេទ្យ ។
ប្រភពព័ត៌មានថា ដំបូងគណៈកម្មការចម្រុះធ្វើតេស្តទឹកនោមរបស់ជនរងគ្រោះក្រែងប្រើប្រាស់ថ្នាំអ្វីផ្សេងៗ តែជាលទ្ធផលពុំមានពាក់ព័ន្ធគ្រឿងញៀននោះទេ។
ប្រភពដាច់ដោយឡែកមួយទៀតថា ជនរងគ្រោះមានទឹកកាមនៅចំណុចលិង្គអាចសង្ស័យថាទើបមកពីធ្វើអីៗនៅណាណី ហើយកើតខ្យល់គរតែម្តង។
រហូតដល់រសៀលថ្ងៃដដែលនេះ យោងតាមការត្រួតពិនិត្យ និងធ្វើកោសល្យវិច្ច័យ សមត្ថកិច្ចបានសន្និដ្ឋានថា ជនរងគ្រោះអាចស្លាប់ដោយខ្យល់គរមិនពាក់ព័ន្ធករណីផ្សេងៗនោះឡើយ។
សមត្ថកិច្ចជំនាញបញ្ជាក់ថា ពេលនេះសពត្រូវបានតម្កល់នៅមន្ទីរពេទ្យបង្អែកក្រុងប៉ោយប៉ែតរង់ចាំសាច់ញាតិដែលកំពុងធ្វើដំណើរមកពីប្រទេសចិនដើម្បីមកទទួលយកសព ៕
ចែករំលែកព័តមាននេះ