សហរដ្ឋអាមេរិក ៖ បើតាមអាជ្ញាធរបានរាយការណ៍ឱ្យដឹងថា អ្នកដំណើរ និងសមាជិកក្រុមយានិកប្រមាណជា២០នាក់នៃយន្តហោះមួយគ្រឿងរបស់ក្រុមហ៊ុនអាកាសចរណ៍EMIRATES ស្រាប់តែធ្លាក់ខ្លួនឈឺ កាលពីថ្ងៃទី៥ កញ្ញា ខណៈពេលយន្តហោះហើរពីក្រុងឌូបៃ មកក្រុងញូវយ៉ក។…
សហរដ្ឋអាមេរិក ៖ បើតាមអាជ្ញាធរបានរាយការណ៍ឱ្យដឹងថា អ្នកដំណើរ និងសមាជិកក្រុមយានិកប្រមាណជា២០នាក់នៃយន្តហោះមួយគ្រឿងរបស់ក្រុមហ៊ុនអាកាសចរណ៍EMIRATES ស្រាប់តែធ្លាក់ខ្លួនឈឺ កាលពីថ្ងៃទី៥ កញ្ញា ខណៈពេលយន្តហោះហើរពីក្រុងឌូបៃ មកក្រុងញូវយ៉ក។ អ្នកទាំងនេះត្រូវគ្រប់គ្រងដោយភ្នាក់ងារសុខាភិបាលអាមេរិក។
យន្តហោះយក្ស AIRBUS A380 ជាមួយអ្នកដំណើរ៥២១នាក់ជិះ ត្រូវឃាត់ទុកនៅលើផ្លូវ ក្រោយចុះចតនាវេលាម៉ោង៩ព្រឹកម៉ោងក្នុងស្រុក ទុកពេលសម្រាប់ពិនិត្យសុខភាព។មជ្ឈមណ្ឌលត្រួតពិនិត្យ និងបង្ការជំងឺ CDC អាមេរិក នាគ្រាដំបូងប្រកាសថា មនុស្សប្រមាណជា១០០នាក់អះអាងថា មានអាការៈមិនស្រួលខ្លួន ជាពិសេសមានគ្រុនក្ដៅ និងក្អក។
អ្នកនាំពាក្យម្នាក់របស់សាលាក្រុងញូវយ៉កថ្លែងថា ក្រោយការត្រួតពិនិត្យសុខភាពរបស់បណ្ដាអ្នកដំណើរដោយនិយោជិត CDC ក្នុងយន្តហោះ មានមនុស្សតែ១៩នាក់ប៉ុណ្ណោះដែលឈឺ រួចអ្នកឯទៀតៗមានសុខភាពល្អ។
បើតាមអ្នកនាំពាក្យម្នាក់របស់ក្រុមហ៊ុន EMIRATES បានគូសបញ្ជាក់ថា មនុស្សទាំងអស់ដែលពុំមានបញ្ហាសុខភាព អាចចាកចេញពីព្រលានយន្តហោះនាវេលារសៀល ចំណែកអ្នកដំណើរ៣នាក់ និងសមាជិកក្រុមយានិក៧នាក់ នៃយន្តហោះជើងហោះហើរEK203 ត្រូវបញ្ជូនទៅមន្ទីរពេទ្យ។ ចំណែកមនុស្ស៩នាក់ទៀតទទួលការព្យាបាលនៅនឹងកន្លែង មុនពេលអនុញ្ញាតឲ្យបន្តដំណើររបស់ពួកគេ៕
ចែករំលែកព័តមាននេះ