ខេត្តមណ្ឌលគិរី ៖ ដើម្បីពង្រឹងរបៀបរបបការងាររបស់រដ្ឋបាលខេត្តឱ្យមានប្រសិទ្ធិភាព លោក ស្វាយ សំអ៊ាង អភិបាលខេត្តមណ្ឌលគិរី បានក្រើនរំលឹកដល់ប្រធានមន្ទីរអង្គភាពជុំវិញខេត្ត និងអភិបាលក្រុង-ស្រុកណាដែលមិនបានចូលរួមប្រជុំប្រចាំខែ ឬប្រជុំសាមញ្ញរបស់ក្រុមប្រឹក្សាខេត្ត…
ខេត្តមណ្ឌលគិរី ៖ ដើម្បីពង្រឹងរបៀបរបបការងាររបស់រដ្ឋបាលខេត្តឱ្យមានប្រសិទ្ធិភាព លោក ស្វាយ សំអ៊ាង អភិបាលខេត្តមណ្ឌលគិរី បានក្រើនរំលឹកដល់ប្រធានមន្ទីរអង្គភាពជុំវិញខេត្ត និងអភិបាលក្រុង-ស្រុកណាដែលមិនបានចូលរួមប្រជុំប្រចាំខែ ឬប្រជុំសាមញ្ញរបស់ក្រុមប្រឹក្សាខេត្ត អវត្តមានចំនួន៣ដង គ្មានច្បាប់ នឹងធ្វើលិខិតស្នើទៅរដ្ឋមន្ត្រីចាត់វិធានការ។
អភិបាលខេត្តបានបញ្ជាក់ក្នុងកិច្ចប្រជុំសាមញ្ញលើកទី៥២ របស់ក្រុមប្រឹក្សាខេត្ត ឆ្នាំទី៥ អាណត្តិទី២ នៅសាលប្រជុំអគារក្រុមប្រឹក្សាខេត្តមណ្ឌលគិរី នាព្រឹកថ្ងៃទី៥ ខែកញ្ញា ឆ្នាំ២០១៨ កន្លងមកឃើញថា ប្រធានមន្ទីរអង្គភាពមួយចំនួន មិនសូវយកចិត្តទុកដាក់អនុវត្តការងាររបស់ខ្លួន ជាពិសេស ពេលប្រជុំប្រចាំខែ របស់គណៈអភិបាលខេត្ត និងកិច្ចប្រជុំសាមញ្ញរបស់ក្រុមប្រឹក្សាខេត្ត ដែលតែងតែឱ្យអនុប្រធាន ឬមន្ត្រីចូលរួមប្រជុំជំនួស ហើយក្តាប់ការងារអត់បាន ដែលធ្វើឱ្យពិបាកដោះស្រាយ។
ដូច្នេះអភិបាលខេត្ត បានក្រើនរំលឹកប្រធានមន្ទីរអង្គភាពទាំងអស់ឲ្យយកចិត្តទុកដាក់រាល់កិច្ចប្រជុំខាងលើនេះ ដែលចាំបាច់ឱ្យប្រធាន ឬអនុប្រធានមន្ទីរទាំងឡាយក្តាប់ការងារបានច្បាស់លាស់ ដើម្បីត្រួតពិនិត្យ វាយតម្លៃ និងឆ្លុះបញ្ចាំងអំពីសមិទ្ធផលការងារ និងបញ្ហាប្រឈមនានា ក្នុងការដោះស្រាយរួមគ្នា។
ជាងនេះទៅទៀត អភិបាលខេត្ត បានស្នើឱ្យ នាយករដ្ឋបាលខេត្ត ត្រូវស្រង់ឈ្មោះប្រធានមន្ទីរណាមួយដែលអវត្តមាន៣ដង គ្មានច្បាប់ គ្មានបេសកម្ម មិនបានចូលរួមប្រជុំសំខាន់ៗរបស់រដ្ឋបាលខេត្ត នឹងសរសេរលិខិតផ្ញើជូនទៅរដ្ឋមន្ត្រី។
លោក ម៉ែន ង៉ុយ ប្រធានក្រុមប្រឹក្សាខេត្ត បានណែនាំ និងជម្រុញបន្ថែមដល់រដ្ឋបាលខេត្ត មន្ទីរអង្គភាព និងអាជ្ញាធរក្រុង-ស្រុក រួមទាំងសមត្ថកិច្ចទាំងអស់ ត្រូវខិតខំយកចិត្តទុកដាក់អនុវត្តការងាររបស់ខ្លួនបន្ថែមទៀត ជាពិសេស លើការងារផ្តល់សេវាសាធារណៈឱ្យមានប្រសិទ្ធភាព ដើម្បីធ្វើយ៉ាងណា ជួយកាត់បន្ថយភាពក្រីក្រជូនប្រជាពលរដ្ឋ និងធ្វើឱ្យខេត្តមណ្ឌលគិរី ប្រែមុខមាត់ថ្មីបន្ថែមទៀត៕
ចែករំលែកព័តមាននេះ