ខេត្តប៉ៃលិន ៖ រហូតមកដល់ព្រឹកថ្ងៃទី០៦ ខែកញ្ញា ឆ្នាំ២០១៨នេះ ជនរងគ្រោះនៅរស់ម្នាក់ក្នុងចំណោម៥នាក់ កំពុងសម្រាកព្យាបាលនៅក្នុងមន្ទីរពេទ្យខេត្តបាត់ដំបងមានការធូរស្រាលឡើងវិញបន្តិចហើយ ដោយដាច់ខ្សែរ៉តបណ្តាលឱ្យកម្មករសំណង់ចំនួន៤នាក់បានស្លាប់ ។
ប្រភពព័ត៌មានពីជនរងគ្រោះឈ្មោះ គិន តន ភេទប្រុស អាយុ២៧ឆ្នាំ បានឱ្យដឹងថា គាត់បានការងារជាកម្មករថ្នាំបៀក នៅអគារដែលកំពុងសាងសង់នៅចំណុចភូមិផ្សារព្រំ ឃុំស្ទឹងកាច់ ស្រុកសាលាក្រៅ អស់រយៈពេល៤ខែមកហើយ ដោយធ្វើការជាមួយមេការម្នាក់ឈ្មោះ ប្រាក់ ឃឿន ហៅពាច ជាមេការផ្នែកថ្នាំបៀក ។
ប្រភពបន្តទៀតថា គាត់បានម៉ៅការពីមេការម្នាក់ទៀតឈ្មោះ សុខ ហុហស្រ៊ុន ហើយនៅវេលាម៉ោង៧និង១០នាទីព្រឹក ថ្ងៃទី០៤ ខែកញ្ញា ឆ្នាំ២០១៨ ឈ្មោះ ប្រាក់ ឃឿន បានរៀបចំសម្ភារ ម្សៅថ្នាំបៀកដាក់ក្នុងរ៉កយោងបម្រុងឡើងទៅកាន់ជាន់ទី១២ ហើយពេលនោះមេជាងក៏ដាក់អ្នកត្រូវជិះចំនួន៥នាក់ រួមជាមួយបន្ទះពិដានជាច្រើនសន្លឹក លុះយោងដល់ត្រឹមជាន់ទី៧ ស្រាប់តែដាច់ខ្សែរ៉កយោងធ្លាក់មកក្រោម បណ្តាលឱ្យស្លាប់៤នាក់ និងរងរបួសម្នាក់តែម្តង ។
គាត់បញ្ជាក់ថា ការសងសំណងវិញ គឺសពកម្មករម្នាក់ខាងក្រុមហ៊ុនសំណង់សងចំនួន៤លានរៀល ។ ចំណែកគាត់ជាជនរងគ្រោះនៅរស់បានត្រឹម៣លានរៀលប៉ុណ្ណោះ និងចេញសងថ្លៃព្យាបាលទាំងស្រុង ហើយខាងក្រុមគ្រួសារសពជនរងគ្រោះក៏យល់ព្រមទទួលថវិកាទាំងអស់នោះដែរ ។
គួររំលឹកផងដែរថា មានហេតុការណ៍ដ៏គួរឱ្យរន្ធត់មួយ ដោយដាច់ខ្សែរ៉តបណ្តាលឱ្យកម្មករសំណង់ចំនួន៤នាក់បានស្លាប់ និងម្នាក់រងរបួសធ្ងន់ត្រូវគេបញ្ជូនបន្តទៅសង្គ្រោះនៅមន្ទីរពេទ្យខេត្តបាត់ដំបង ខណៈដែលពួកគេជិះខ្សែរ៉កយោងពីក្រោមឡើងទៅជាន់ទី១២ ដើម្បីធ្វើការងារ លុះកំពុងតែជិះឡើងទៅដល់ជាន់ទី៧ ស្រាប់តែដាច់ខ្សែរ៉ក បណ្តាលឱ្យធ្លាក់ចុះមកដី បុកជាមួយនឹងដែកខាងក្រោមពេញទំហឹងទើបធ្វើឱ្យស្លាប់ និងរបួសតែម្តង ។
ហេតុការណ៍ដាច់ខ្សែរ៉កធ្លាក់កម្មកររបួស និងស្លាប់នេះបានកើតឡើង កាលពីវេលាម៉ោង៧ និង៣០នាទីព្រឹកថ្ងៃទី០៤ ខែកញ្ញា ឆ្នាំ២០១៨ ស្ថិតនៅជាប់នឹងផ្លូវជាតិលេខ៥៧ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ជនរងគ្រោះទី១- ឈ្មោះ ថោន កក ភេទប្រុស អាយុ១៩ឆ្នាំ ស្លាប់ ទី២-ឈ្មោះ បូរី ភេទប្រុស អាយុ៣៣ឆ្នាំ ស្លាប់ ទី៣- ឈ្មោះ ប្រាក់ ខឿន ភេទប្រុស អាយុ៣២ឆ្នាំ ស្លាប់ ទី៤-ឈ្មោះ លឹម វែង ភេទប្រុស អាយុ១៨ឆ្នាំ ស្លាប់ និងទី៥- ឈ្មោះ គិន តន អាយុ៣២ឆ្នាំ រងរបួសធ្ងន់ ទាំងអស់គ្នាស្នាក់នៅបណ្តោះអាសន្នកន្លែងកើតហេតុខាងលើ ។
អ្នកឃើញហេតុការណ៍បានឱ្យដឹងថា គេបានឃើញកម្មករសំណង់ទាំងនោះឡើងជិះកន្ត្រកខ្សែរ៉កយោងដូចសព្វមួយដង ខណៈកំពុងតែយោងឡើងសុខៗដល់ជាន់ទី៧ ស្រាប់តែដាច់ខ្សែរ៉ក ធ្លាក់ចុះមកដីវិញយ៉ាងពេញទំហឹង បណ្តាលឱ្យបុកប៉ះចំនឹងដែកនៅខាងក្រោមធ្វើឱ្យអ្នកខ្លះបាក់ដៃជើង និងក.ស្លាប់ភ្លាមៗចំនួន៣នាក់ និងរងរបួសធ្ងន់២នាក់ លុះបញ្ជូនទៅដល់មន្ទីរពេទ្យបង្អែកខេត្តប៉ៃលិនក៏បានស្លាប់ម្នាក់ទៀត ។ រីឯអ្នករងរបួសធ្ងន់ម្នាក់ត្រូវបានគ្រូពេទ្យបញ្ជូនបន្តទៅសង្គ្រោះនៅឯមន្ទីរពេទ្យខេត្តបាត់ដំបង ។
ដោយឡែកសពជនរងគ្រោះដែលស្លាប់ទាំង៤នាក់កំពុងរក្សាទុកនៅក្នុងមន្ទីរពេទ្យពេទ្យបង្អែកខេត្តប៉ៃលិន ដើម្បីឱ្យសាច់ញាតិយកទៅធ្វើបុណ្យតាមប្រពៃណី ៕
ចែករំលែកព័តមាននេះ