ប្រទេសអាហ្វហ្គានីស្ថាន ៖ បើតាមអាជ្ញាធរបានរាយការណ៍ឱ្យដឹងថា ជនអត្តឃាតម្នាក់បានធ្វើឲ្យផ្ទុះក្នុងក្លឹបកីឡាមួយនាសង្កាត់មានពួកស៊ីអ៊ីតភាគច្រើននៃក្រុងកាប៊ុល កាលពីថ្ងៃទី៥ កញ្ញា រួចការផ្ទុះទី២ កើតមានពេលពួកអ្នកជួយសង្គ្រោះ និងបណ្ដាអ្នកកាសែតទៅដល់។
ការវាយប្រហារភេរវកម្មទាំង២នោះ បណ្ដាលឲ្យមនុស្សស្លាប់យ៉ាងតិច២០នាក់ ក្នុងនោះមានអ្នកកាសែត២នាក់ ហើយមនុស្ស៧០នាក់រងរបួស។ បើតាមអ្នកនាំពាក្យរបស់ប៉ូលិសក្រុងកាប៊ុល លោក HASHMAT STANEKZAI បញ្ជាក់ថា ការផ្ទុះលើកទី២ កើតមាន ខណៈពួកអ្នកជួយសង្គ្រោះរត់មកជួយបណ្ដាជនរងគ្រោះ ព្រមទាំងទន្ទឹមនឹងការមកដល់របស់បណ្ដាអ្នកកាសែត។
វិធីសាស្ត្រនៃការវាយប្រហារបែបនោះគឺដូចគ្នានឹងការវាយប្រហារលើកមុនមួយ ដែលបណ្ដាលឲ្យអ្នកកាសែតដល់ទៅ៩នាក់ស្លាប់ កាលពីខែមេសានាភាគកណ្ដាលក្រុងកាប៊ុល។
លើកនេះការវាយប្រហារភេរវកម្មកើតមានក្នុងសង្កាត់ DARHT-E-BARCHI ដែលមានជនជាតិភាគតិចហាហ្សារ៉ាភាគច្រើនជាពួកស៊ីអ៊ីត រស់នៅច្រើន។ ពួកនោះកន្លងមកធ្លាប់ជាគោលដៅនៃការវាយប្រហាររបស់ពួកជ្រុលនិយមស៊ុននីតក្រុមរដ្ឋអ៊ិស្លាម។
កាលពីខែមុននិស្សិតច្រើនសិបនាក់បានត្រូវស្លាប់ ក្នុងការវាយប្រហារអត្តឃាតមួយនាតំបន់ភាគខាងលិចរដ្ឋធានីអាហ្គានីស្ថាននោះ៕
ចែករំលែកព័តមាននេះ