ខេត្តសៀមរាប ៖ នាថ្ងៃទី០៥ ខែកញ្ញា ឆ្នាំ២០១៨ កម្លាំងការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលខេត្តសៀមរាបបានចុះបង្រៀនបំប៉នជំនាញបង្ការពន្លត់អគ្គិភ័យ និងសង្គ្រោះវគ្គខ្លីដល់បុគ្គលិកសណ្ឋាគារស្តារីអង្គរ ស្ថិតនៅក្នុងភូមិបន្ទាយចាស់ សង្កាត់ស្លក្រាម ក្រុងខេត្តសៀមរាប ។
លោកឧត្តមសេនីយ៍ ត្រី ភឹង សម្បត្តិ ស្នងការរងទទួលផែនការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលខេត្តសៀមរាបបានមានប្រសាសន៍ថា ដើម្បីបង្ការទប់ស្កាត់នូវគ្រោះអគ្គិភ័យដែលតែងតែកើតមានឡើងជាយថាហេតុ នៅក្នុងខេត្ត និងដោយអនុវត្តតាមការណែនាំពីសំណាក់លោកឧត្តមសេនីយ៍ស្នងការនគរបាលខេត្តបានដឹកនាំកម្លាំងការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលខេត្តសៀមរាបបានចុះបង្រៀនបំប៉នជំនាញបង្ការពន្លត់អគ្គិភ័យ និងសង្គ្រោះវគ្គខ្លីដល់បុគ្គលិក សណ្ឋាគារស្តារីអង្គរ ស្ថិតនៅក្នុងភូមិបន្ទាយចាស់ សង្កាត់ស្លក្រាម ក្រុងខេត្តសៀមរាបនូវមេរៀន ដែលមន្ត្រីត្រូវបង្ហាត់រួមមាន បង្រៀនទ្រឹស្តី និយមន័យនៃភ្លើង ត្រីកោណភ្លើង ចំណាត់ថ្នាក់នៃភ្លើង ។
បង្រៀនទ្រឹស្តីនិយមន័យការសង្គ្រោះបច្ចេកទេសសង្គ្រោះរំដោះមនុស្សចេញពីកន្លែងកើតហេតុ របៀបក្នុងការទុកដាក់បំពង់ពន្លត់អគ្គិភ័យ វិធីសាស្ត្រក្នុងការប្រើប្រាស់បំពង់ពន្លត់អគ្គិភ័យ បច្ចេកទេសក្នុងការពន្លត់អគ្គិភ័យ និងការអនុវត្តន៍ជាក់ស្តែងដោយប្រើបំពង់ពន្លត់អគ្គិភ័យ ។
លោកបានបញ្ជាក់ថា ក្នុងវគ្គសិក្សាខ្លីនេះមានសិក្ខាកាមចូលរួមមានចំនួន២០នាក់ ប្រុស១៥ នាក់ និងស្រី៥នាក់នៅក្នុងសណ្ឋាគារស្តារីអង្គរនេះផងដែរ ដើម្បីឱ្យពួកគាត់បានយល់ពីការប្រើប្រាស់ និងទុកដាក់នូវបំពង់ពន្លត់អគ្គិភ័យ ដើម្បីងាយស្រួលដល់មានករណីកើតឡើងនូវប្រការណាមួយជាយថាហេតុ ៕
ចែករំលែកព័តមាននេះ