រាជធានីភ្នំពេញ ៖ ជនសង្ស័យម្នាក់ក្នុងចំណោមពីរនាក់ត្រូវបានប្រជាពលរដ្ឋចាប់វាយទ្រោមខ្លួនរួចប្រគល់ឲ្យសមត្ថកិច្ចបន្ទាប់ពីធ្វើសកម្មភាពលួចចាក់កញ្ចក់រថយន្តមួយគ្រឿងរបស់ភ្ញៀវដែលចូលផឹកស៊ីនៅក្នុងហាងមួយកន្លែង ។ ហេតុការណ៍នេះបង្កឲ្យមានការភ្ញាក់ផ្អើលឡើងកាលពីវេលាម៉ោង៨និង៤០នាទីយប់ ថ្ងៃទី០៥ ខែកញ្ញា ឆ្នាំ២០១៨ ស្ថិតខាងជើងហាង វិចិត្រ សម្បត្តិ ប្រមាណ២០ម៉ែត្រទល់មុខនឹងផ្សារដេប៉ូ តាមបណ្តោយផ្លូវ២១៥ ស្ថិតក្នុងសង្កាត់វាលវង់ ខណ្ឌ៧មករា ។
ជនសង្ស័យខាងលើមានឈ្មោះ សួន វិចិត្រ ភេទប្រុស អាយុ២៦ឆ្នាំ មុខរបរមិនពិតប្រាកដ ស្នាក់នៅសង្កាត់វត្តភ្នំ ខណ្ឌដូនពេញ មានស្រុកកំណើតនៅខេត្តព្រៃវែង ។ ចំណែកបក្សពួកម្នាក់ទៀតមិនស្គាល់អត្តសញ្ញាណបានរត់គេចបាត់ ។
តាមប្រភពព័ត៌មានពីបុរសម្នាក់ជាសន្តិសុខយាមនៅហាងផឹកស៊ីខាងលើនេះបានប្រាប់ឲ្យដឹងថា មុនកើតហេតុមានភ្លៀវបានបើករថយន្តមួយគ្រឿងម៉ាក TUNDRA ពណ៍ទឹកប្រាក់ ពាក់ផ្លាកលេខ ភ្នំពេញ ២AV-៧៧៥៨ មកឈប់នៅខឿនត្រង់ចំណុចកើតហេតុខាងលើ រួចក៏ចូលទៅផឹកស៊ីនៅក្នុងហាងនោះបាត់ទៅ ។
រហូតដល់វេលាកើតហេតុក៏ស្រាប់តែលេចមុខជនសង្ស័យខាងលើ និងបក្សពួកម្នាក់ទៀតបានជិះម៉ូតូមួយគ្រឿងមិនចាំម៉ាកមកឈប់កន្លែងហេតុកើតខាងលើ ហើយជនសង្ស័យបានចុះពីលើម៉ូតូដើរទៅក្បែររថយន្ត ចំណែកឯបក្សពួកម្នាក់ទៀតនៅអង្គុយចាំលើម៉ូតូ ។
រួចជនសង្ស័យខាងលើបានធ្វើសកម្មភាពលួចកាច់កញ្ចក់មើលក្រោយរថយន្តខាងលើចំហៀងខាងឆ្វេងបានសម្រេច តែខណៈនោះក៏សន្តិសុខយាមហាងខាងលើដើរមកឃើញហើយក៏ស្រែកចោរៗ បង្កឲ្យជនសង្ស័យភ័យស្លន់ស្លោ ហើយបានព្យាយាមរត់គេចខ្លួនក៏ត្រូវបានប្រជាពលរដ្ឋដែលនៅក្បែរនោះជួយស្ទាក់ចាប់បាន និងបានស្វាគមន៍ម្នាក់មួយដៃមួយជើង បណ្តាលឲ្យវាយបែកមុខមាត់ ។ ដោយឡែកបក្សពួកម្នាក់ទៀតបានជិះម៉ូតូគេចខ្លួនបាត់ស្រមោលដោយសុវត្ថិភាព ។
បច្ចុប្បន្នជនសង្ស័យ និងវត្ថុតាងត្រូវបានសមត្ថកិច្ចបញ្ជូនខ្លួនទៅសួរនាំបន្តនៅប៉ុស្តិ៍នគរបាលសង្កាត់វាលវង់ដើម្បីធ្វើកំណត់ហេតុបញ្ជូនទៅតុលាការចាត់ការទៅតាមផ្លូវច្បាប់ ៕
ចែករំលែកព័តមាននេះ