រាជធានីភ្នំពេញ ៖ នេះជាមោទនភាពមួយសម្រាប់កសិករកម្ពុជាដែលមានគំនិតច្នៃប្រឌិតបង្កើតបាននូវឧបករណ៍ដាំគ្រាប់ពូជស្រូវផ្ដល់នូវគុណតម្លៃខ្ពស់សម្រាប់កសិករ រហូតទទួលបានពានរង្វាន់កំពូលពីរដ្ឋាភិបាលអាមេរិក ។
យោងតាមសេចក្តីប្រកាសព័ត៌មានរបស់សហគ្រាសសង្គម កសិកម្មឈ្លាសវៃនៅប្រទេសកម្ពុជា បានឲ្យដឹងថា ពានរង្វាន់កំពូលរបស់រដ្ឋាភិបាលអាមេរិកនេះមានឈ្មោះថា «ប៉ាតង់សម្រាប់មនុស្សជាតិ» ឬ (Patents for Humanity) សម្រាប់ឧបករណ៍ដាំគ្រាប់ស្រូវឈ្មោះអុីឡាយ ដែលជួយដល់កសិករកាត់បន្ថយគ្រាប់ពូជ ជួយបង្កើនទិន្នផល និងកាត់បន្ថយកម្លាំងពលកម្ម ។ ពានរង្វាន់នេះ នឹងប្រគល់ជូនតំណាងកម្ពុជានៅថ្ងៃទី២៧ ខែវិច្ឆិកាខាងមុខ ដែលនឹងមានការចូលរួមពីប្រធានាធិបតីអាមេរិកលោក ដូណាល់ ត្រាំ ផងដែរ ។
សេចក្តីប្រកាសព័ត៌មានបានឲ្យដឹងទៀតថា នេះជាពានរង្វាន់កិត្តិយសកំពូលរបស់ការិយាល័យប៉ាតង់(ប្រកាសនីយបត្រតក្កកម្ម) និងស្លាកសញ្ញារបស់សហរដ្ឋអាមេរិក ហើយពានរង្វាន់នេះ នឹងត្រូវផ្តល់ជូនអ្នកកែច្នៃណាដែលបានប្រើប្រាស់បច្ចេកវិទ្យាប្រកបដោយភាពច្នៃប្រឌិតក្នុងការដោះស្រាយបញ្ហាប្រឈមនានារបស់មនុស្សជាតិ ។
ក្នុងនោះ កសិកម្មឈ្លាសវៃ រួមជាមួយនឹងបេក្ខភាពចំនួនប្រាំបីផ្សេងទៀត ដែលត្រូវបានជ្រើសចេញពីស្ថាប័នធំៗចំនួន៦៩ មកពីជុំវិញពិភពលោក នឹងត្រូវទៅទទួលរង្វាន់នេះនៅសហរដ្ឋអាមេរិកក្នុងអំឡុងខែវិច្ឆិកា ឆ្នាំ២០១៨ខាងមុខនេះ ។
លោក សាន ប៊ុននីកា នាយកគ្រប់គ្រងកសិកម្មឈ្លាសវៃ ដែលបានស្រាវជ្រាវ និងដឹកនាំក្រុមការងារផលិតឧបករណ៍អ៊ីឡាយ បានមានប្រសាសន៍ថា ឧបករណ៍ដាំគ្រាប់ស្រូវអ៊ីឡាយនេះ ត្រូវបានភ្ជាប់ជាមួយនឹងគោយន្តដៃនៅពេលដាំ ។ លោកថា ៖« ឧបករណ៍នេះប្រើកម្លាំងខ្យល់ដោយរុញគ្រាប់ពូជស្រូវចូលទៅក្នុងដីស្រែដែលមានទឹក ។ អ៊ីឡាយ ជួយកសិករក្នុងការកាត់បន្ថយគ្រាប់ពូជស្រូវ ដោយប្រើក្នុងចន្លោះពី៣០ទៅ១០០គីឡូក្រាមតែប៉ុណ្ណោះក្នុង១ហិកតា ខណៈតាមទម្លាប់ កសិករត្រូវប្រើគ្រាប់ពូជស្រូវពី២០០ទៅ៣៥០គីឡូក្រាមក្នុង១ហិកតា »។
លោកបន្តថា ឧបករណ៍អ៊ីឡាយ ក៏អាចជួយបង្កើនទិន្នផលរហូតដល់២០% ហើយឧបករណ៍នេះក៏អាចជួយកាត់បន្ថយការចំណាយលើជី និងថ្នាំកសិកម្មផងដែរ ។ ដំណាំស្រូវដាំដោយប្រើឧបករណ៍នេះដុះចេញជាជួរ អាចស្រូបយកពន្លឺព្រះអាទិត្យបានច្រើន និងមានខ្យល់ចេញចូលបានល្អ ដែលអាចជួយក្នុងការកាត់បន្ថយបញ្ហាជំងឺ និងកត្តាចង្រៃផ្សេងៗបានផងដែរ ។ លើសពីនេះ ក៏ជួយដោះស្រាយបញ្ហាកង្វះកម្លាំងពលកម្មក្នុងការងារកសិកម្ម ដោយប្រើពេលតែ៤៥នាទីប៉ុណ្ណោះក្នុងផ្ទៃដីស្រែ១ហិកតា រីឯការព្រោះដោយដៃ កសិករប្រើពេលប្រហែល២ម៉ោង និងចំណាយពេលរាប់សប្តាហ៍ បើស្ទូងដោយដៃ ។
លោកនិយាយថា ៖« ខ្ញុំពិតជាសប្បាយចិត្តណាស់ ពេលបានដឹងថាឧបករណ៍នេះទទួលបានពានរង្វាន់ប្រកបដោយកិត្យានុភាព ហើយពេលខ្លះខ្ញុំសឹងតែមិនជឿថាការទទួលពានរង្វាន់នេះវាជារឿងពិត »។
ក្នុងនាមជាកសិករមួយរូប លោក សាន ប៊ុននីកា បន្ថែមថា ៖« ការស្វែងរកកម្លាំងពលកម្មក្នុងការងារកសិកម្ម គឺជាការលំបាកមួយ រួមជាមួយនឹងតម្លៃឈ្នួលកាន់តែថ្លៃឡើងៗពីមួយឆ្នាំទៅមួយឆ្នាំ ។ នេះជាភស្តុតាងមួយបង្ហាញថា យើងជាខ្មែរ ក៏អាចធ្វើអ្វីៗបានដែរ ឲ្យតែមានឱកាស និងធនធាន ។ ដូច្នេះ ពានរង្វាន់នេះ គឺជាសមិទ្ធផលមួយរបស់ប្រជាពលរដ្ឋកម្ពុជាទាំងមូល »។
លោកបញ្ជាក់ថា សមិទ្ធផលនេះ ជាផ្នែកមួយនៃកិច្ចខំប្រឹងប្រែងដ៏ធំធេងរបស់រដ្ឋាភិបាលអូស្ត្រាលី ដើម្បីជួយវិស័យកសិកម្មប្រកបដោយភាពច្នៃប្រឌិត ផលិតភាព និងភាពធន់នឹងអាកាសធាតុនៅក្នុងប្រទេសកម្ពុជា តាមរយៈកម្មវិធីខ្សែសង្វាក់តម្លៃកម្មកសិកម្មកម្ពុជា ហៅកាត់ថា កាវ៉ាក់(CAVAC) ៕
ចែករំលែកព័តមាននេះ