រាជធានីភ្នំពេញ ៖ អភិបាលរងខណ្ឌមានជ័យលោក ឌី រ័ត្នខេមរុណ បានមានប្រសាសន៍ឲ្យដឹងថា មន្ត្រីនគរបាល គឺជាកម្លាំងស្នូលដ៏រឹងមាំដែលមានកាតព្វកិច្ចដើរតួយ៉ាងសំខាន់ក្នុងការថែរក្សាការពារ សន្តិសុខ សុវត្ថិភាព…
រាជធានីភ្នំពេញ ៖ អភិបាលរងខណ្ឌមានជ័យលោក ឌី រ័ត្នខេមរុណ បានមានប្រសាសន៍ឲ្យដឹងថា មន្ត្រីនគរបាល គឺជាកម្លាំងស្នូលដ៏រឹងមាំដែលមានកាតព្វកិច្ចដើរតួយ៉ាងសំខាន់ក្នុងការថែរក្សាការពារ សន្តិសុខ សុវត្ថិភាព ជូនបងប្អូនប្រជាពលរដ្ឋនៅក្នុងមូលដ្ឋានរបស់ខ្លួនឲ្យរស់នៅប្រកបដោយភាពសុខុដុមរមនា ។
ការថ្លែងរបស់លោកអភិបាលរងធ្វើឡើងនាព្រឹកថ្ងៃទី០៦ ខែកញ្ញា ឆ្នាំ២០១៨ ក្នុងពិធីនាំយកអំណោយជាមួកសុវត្ថិភាពរបស់កងកម្លាំងក៏ដូចជា ថវិការមួយចំនួនចែកជូនដល់មន្ត្រីនគរបាលប៉ុស្តិ៍ស្ទឹងមានជ័យទី២ ចំណុះអធិការដ្ឋាននគរបាលខណ្ឌមានជ័យ ដើម្បីយកទៅប្រើប្រាស់នៅថ្ងៃមុខបន្តក្នុងទិសដៅសំដៅបម្រើប្រជាជននៅក្នុងមូលដ្ឋានរបស់ខ្លួន ។
លោកអភិបាលរងលើកឡើងថា មន្ត្រីនគរបាល គឺជាកម្លាំងស្នូលដ៏រឹងមាំ ដែលកន្លងមកពួកគេបានលះបង់ទាំងកម្លាំងកាយ និងចិត្តក៏ជា ពេលវេលាជាច្រើនក្នុងការខិតខំប្រឹងប្រែងខ្នះខ្នែងរក្សានូវសុខសន្តិភាពជូនបងប្អូនពលរដ្ឋ ។ លើសពីនេះនគរបាលក៏បានដើរតួយ៉ាងសំខាន់ក្នុងការបង្ការបង្ក្រាបបទល្មើសផ្សេងៗដូចជា អំពើលួច ឆក់ប្លន់ និងសកម្មភាពអសន្តិសុខមួយចំនួនទៀតជាដើម ។
លោកបញ្ជាក់ថា ការនាំយកសម្ភារជាមួកចែកជូនបងប្អូនមន្ត្រីនគរបាលនៅពេលនេះ គឺជាការមើលឃើញនូវការខ្វះខាត ជាក់ស្តែងរបស់កម្លាំងនគរបាលដែលពួកគេជាសេនាធិការដ៏សំខាន់របស់អាជ្ញាធរខណ្ឌទាំងមូល ក្នុងសកម្មភាពបម្រើប្រជាជន ។ ហើយការចែកជូននៅពេលនេះ គឺជាសកម្មភាពសបញ្ជាក់ពីការគិតគូរ និងយកចិត្តទុកដាក់ខ្ពស់ ពីសំណាក់លោកអភិបាលរងខណ្ឌមកលើមន្ត្រីនគរបាល ដើម្បីឲ្យពួកគាត់យកវាទៅប្រើប្រាស់ក្នុងទិសដៅបម្រើប្រជារាស្ត្រនៅក្នុងមូលដ្ឋានទៅថ្ងៃខាងមុខបន្តទៀត ។
សូមបញ្ជាក់ថា មន្ត្រីនគរបាលប៉ុស្តិ៍ស្ទឹងមានជ័យ២មានកម្លាំងសរុប២០នាក់ ក្នុងនោះស្រី៣នាក់ ដោយលោកអភិបាលរងបានឧបត្ថម្ភមួកសុវត្ថិភាពប៉ូលិសចំនួន២០មួក ពោល គឺក្នុងម្នាក់ទទួលបានមួកមួយ , អង្ករជារួម៥ប៉ាវ ទឹកសុទ្ធជារួម១០កេស និងថវិកាក្នុងម្នាក់២ម៉ឺនរៀលផងដែរ ។
ឆ្លៀតក្នុងឱកាសខាងលើលោក ឌី រ័ត្នខេមរុណ បានស្នើដល់លោកនាយប៉ុស្តិ៍នគរបាល និងមន្ត្រីនគរបាលប៉ុស្តិ៍ស្ទឹងមានជ័យទី២ទាំងអស់ ត្រូវខិតខំបន្តសកម្មភាពរបស់ខ្លួនបន្ថែមទៀត ក្នុងការបម្រើប្រជាពលរដ្ឋដូចជា ការធ្វើលិខិតស្នាមឯកសារផ្សេងៗជូនពលរដ្ឋមិនតម្រូវឲ្យយកថវិកា ប៉ុន្តែក្នុងនោះចំពោះឯកសារដែលច្បាប់តម្រូវឲ្យយក គឺពុំត្រូវយកលើសចំនួនដែលបានកំណត់នោះឡើយ ។ បន្ថែមលោកអភិបាលរងក៏បានស្នើរដល់កម្លាំងនគរបាល ត្រូវពង្រាយកម្លាំងរបស់ខ្លួនចេញល្បាតពួនស្ទាក់ឲ្យបានគ្រប់ច្រកល្ហកទាំងយប់ទាំងថ្ងៃ។
លើសពីនោះលោកបន្តថា មន្ត្រីនគរបាលដែលទទួលវេនប្រចាំការនៅស្នាក់ការប៉ុស្តិ៍ គឺត្រូវនៅរង់ចាំទទួលនូវរាល់ពាក្យបណ្តឹងរបស់ប្រជាពលរដ្ឋ ដើម្បីយកទៅដោះស្រាយជូនពួកគាត់ ឬត្រូវមានវិធានការបន្តជៀសវៀងការមិនយកចិត្តទុកដាក់ជាមួយទុក្ខកង្វល់របស់ពលរដ្ឋនាំឲ្យប្រជាពលរដ្ឋកើតចិត្តខឹងស្អប់ និងរើសអើងទៅលើក្រុមមន្ត្រីនគរបាលថា មិនបានបម្រើពួកគាត់ឲ្យសមស្របនឹងពាក្យថា មន្ត្រីមានកាតព្វកិច្ចបម្រើ និងដោះស្រាយបញ្ហា និងទុក្ខកង្វល់របស់ពលរដ្ឋ ៕
ចែករំលែកព័តមាននេះ