ខេត្តព្រះសីហនុ ៖ តាមរបាយការណ៍របស់សាលាខេត្តបានឱ្យដឹងថា ខេត្តព្រះសីហនុមានផ្ទៃដីសរុប២៦៥.៨៩០គីឡូម៉ែត្រការ៉េ ក្នុងនោះ ២ភាគ៣ ជាដីព្រៃភ្នំនិងខ្ពង់រាប មានឆ្នេរសមុទ្រប្រវែង១៧៥,៨១គីឡូម៉ែត្រ និងមានប្រជុំកោះធំតូចចំនួន៣២កោះ ។ របាយការណ៍ខាងលើបានឱ្យដឹងទៀតថា ខេត្តព្រះសីហនុមានក្រុង១ និងស្រុក៣គឺ ៖ ១-ស្រុកកំពង់សិលា ២-ស្រុកស្ទឹងហាវ ៣-ស្រុកព្រៃនប់ និង៤-ក្រុងព្រះ សីហនុ ។
ដោយឡែក របាយការណ៍ដែលទទួលបានពីមន្ទីរផែនការខេត្តបានបញ្ជាក់ឱ្យដឹង អំពីស្ថិតិចំនួនប្រជាពលរដ្ឋនៅតាមបណ្តាក្រុងនិងស្រុកនៅក្នុងឆ្នាំ២០១៨ឱ្យដឹងថា១-ស្រុកកំពង់សិលា មានប្រជាពលរដ្ឋសរុបមានចំនួន១៦.៦៨៥នាក់ ២-ស្រុកស្ទឹងហាវ មានប្រជាពលរដ្ឋសរុបចំនួន១៧.៧១៧នាក់ ៣-ស្រុកព្រៃនប់ មានប្រជាពលរដ្ឋសរុបចំនួន១០០.៥៨៧នាក់ និង៤-ក្រុងព្រះសីហនុ ប្រជាពលរដ្ឋសរុបមានចំនួន៧៩.៦៤១នាក់ សរុបជារួមចំនួនស្ថិតិរបស់ប្រជាពលរដ្ឋនៅក្នុងខេត្តក្នុងឆ្នាំ២០១៨មានចំនួន២១៤.៦៣០នាក់ ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តបានមានប្រសាសន៍ឱ្យដឹងថា តាមរបាយការណ៍ដែលលោកទទួលបានពីលោកឧត្តមសេនីយ៍ត្រី ហ៊ុន សុរិទ្ធី ស្នងការរងទទួលការងារផែនអន្តោប្រវេសន៍ នៃស្នងការដ្ឋាននគរបាលខេត្តបានបញ្ជាក់ឱ្យដឹងថា សម្រាប់ជនជាតិអន្តោប្រវេសន៍ចំរុះជាតិសាសន៍នៅក្នុងឆ្នាំ២០១៨មានជាអាទិ៍ ជនជាតិចិនដែលនគរបាលការិយាល័យជំនាញកំពុងតែធ្វើបច្ចុប្បន្នភាព មានចំនួនជាង៣មុឺននាក់ ។ ដោយឡែកជនអន្តោប្រវេសន៍ផ្សេងៗទៀត នៅមានចំនួនតិចតួចមិនមានអ្វីគួរឱ្យកត់សម្គាល់នោះទេ ។
ជាមួយគ្នានេះផងដែរ លោកឧត្តមសេនីយ៍ត្រី សៅ ស៊ាន ស្នងការរងទទួលផែនសន្តិសុខបានឱ្យដឹងផងដែរថា នៅក្នុងចំនួនជនជាតិចិនដែលបានកើនឡើងនេះ ខ្លះមកប្រកបរបរផ្សេងៗពីគ្នាមានដូចជា បើកហាងលក់ទំនិញផ្សេងៗ បើកហាងលក់សម្ភារសំណង់ លក់សង្ហារឹម លក់បន្លែបោះដុំ លក់គ្រឿងភេសជ្ជៈ ក្លិបកម្សាន្តខារ៉ាអូខេ ការវិនិយោគលើវិស័យសំណង់ និងកាសុីណូ ។
មកដល់ពេលនេះ មានកាសុីណូដែលមានច្បាប់អនុញ្ញាតចំនួន៥០ទីតាំង កំពុងតែដំណើរការនិងនៅមានជាច្រើនកន្លែងទៀត កំពុងតែដំណើរការសាងសង់ឈានទៅបើកដំណើរការនៅពេលឆាប់ៗខាងមុខនេះ ។
ចំណែកផ្នែកសន្តិសុខសណ្តាប់ធ្នាប់នៅក្នុងខេត្ត លោកឧត្តមសេនីយ៍ត្រីបានបញ្ជាក់ថា ដោយអនុវត្តន៍ទៅតាមបទញ្ជារបស់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត កម្លាំងជំនាញគ្រប់ ការិយា ល័យជំនាញតែងតែចេញល្បាតតាមភូមិសាស្ត្រ ជាពិសេសភូមិសាស្ត្រដែលស្មុគស្មាញជាប្រចាំ មិនបណ្តែត បណ្តោយឱ្យបុគ្គល ឬជនបរទេសណាប្រព្រឹត្តល្មើសបង្កអសន្តិសុខនៅក្នុងខេត្តទេសចរណ៍បានជាដាច់ខាត ។
គួរកត់សម្គាល់ថា ជាផ្លូវការ ជនជាតិចិនមានជាង៣ម៉ឺននាក់ដែលស្នាក់នៅ ។ ប៉ុន្តែបើតាមការប៉ាន់ស្មានក្រៅផ្លូវការអាចមានលើសនេះ២ទៅ៣ដង ព្រោះមានដំណឹងថា ទើបមកថ្មីៗ ក៏ច្រើនសម្បើមដែរ ។ ទំនងប្រហែលមិនទាន់ចុះបញ្ជីជាផ្លូវការ ។ចិនខ្លះបើកហាងបានសរសេរអក្សរខ្មែរ លើផ្លាកយីហោមិនត្រូវក៏មានដែរ ចេះតែសរសេរទៅកើត ។ ម៉េចមិនជួយមើលកែឱ្យគាត់ផង ?
ចែករំលែកព័តមាននេះ