ខេត្តព្រៃវែង ៖ ហេតុការណ៍មួយបង្កការភ្ញាក់ផ្អើលបានកើតឡើងទាំងព្រឹកព្រលឹម បន្ទាប់ពីអ្នកស្រុកបានប្រទះឃើញសពបុរសម្នាក់ ដេកស្លាប់នៅក្នុងថ្លុកទឹក ក្នុងសភាពហើមស្អុយ មិនដឹងស្លាប់តាំងពីពេលណា។ ហេតុការណ៍នេះបានកើតឡើងកាលពីវេលាម៉ោង៦និង៣០នាទីព្រឹក ថ្ងៃទី៥ កញ្ញា នៅក្នុងរង្វះទឹកខាងក្រោយផ្ទះជនរងគ្រោះ ដែលស្ថិតក្នុងភូមិចំបក់ ឃុំប្រាសាទ ស្រុកកំពង់ត្របែក ខេត្តព្រៃវែង ។
ជនរងគ្រោះដែលស្លាប់ខាងលើឈ្មោះ ជូ ចន្ថន ភេទប្រុស អាយុ៤៣ឆ្នាំ ជាបុរសពោះម៉ាយត្រូវប្រពន្ធកូនរត់ចោល ដោយសារតែស្រវឹងរាល់ថ្ងៃ។
សមត្ថកិច្ចបានអោយដឹងថា យោងតាមការបំភ្លឺរបស់សាក្សីនៅក្បែរកន្លែងកើតហេតុ ជនរងគ្រោះមានទម្លាប់តែងតែស្រវឹងឡូឡាផ្អើលភូមិ រៀងរាល់ព្រឹក មិនដែលស្វាងទេ រហូតប្រពន្ធកូនទ្រាំលែងបាននាំគ្នារត់ចោលអស់ ប៉ុន្តែ២-៣ថ្ងៃចុងក្រោយនេះ ស្រាប់តែបាត់ជនរងគ្រោះ មិនឃើញស្រវឹងស្រែកឡូឡាដូចរាល់ដង។
ប្រភពដដែលបានបន្តថា ទើបអ្នកជិតខាង៣នាក់ នាំគ្នាចូលទៅរកមើល ក្នុងផ្ទះ និងក្រោយផ្ទះជនរងគ្រោះ ស្រាប់តែប្រទះឃើញសពជនរងគ្រោះ ដេកស្លាប់នៅក្នុងរង្វះទឹកខាងក្រោយផ្ទះ ក្នុងសភាពហើមស្អុយទៅហើយ ដោយមិនដឹងថា ស្លាប់តាំងពីពេលណានោះទេ ទើបបង្កមានការភ្ញាក់ផ្អើល និងរាយការណ៍ប្រាប់សមត្ថកិច្ច ចុះទៅត្រួតពិនិត្យកន្លែងកើតហេតុភ្លាមៗតែម្តង។
ក្រោយពីពិនិត្យសាកសពរួច សមត្ថកិច្ចបានសន្និដ្ឋានថា ជនរងគ្រោះស្លាប់ដោយសារតែខ្យល់គរ ហើយមូលហេតុដែលធ្វើអោយខ្យល់គរ គឺដោយសារតែជនរងគ្រោះផឹកស្រាស្រវឹងដេកអត់បាយរាល់ថ្ងៃ ទើបធ្វើអោយរាងកាយចុះខ្សោយខ្លាំង រហូតខ្យល់គរតែម្តង ៕
ចែករំលែកព័តមាននេះ