រាជធានីភ្នំពេញ ៖ ដោយសារការវិវត្តឥតឈប់ឈរនៃបច្ចេកវិទ្យាពីមួយជំនាន់ទៅមួយជំនាន់ រាជរដ្ឋាភិបាលកម្ពុជា តាមរយៈក្រសួងប្រៃសណីយ៍ និងទូរគមនាគមន៍ និងអង្គការដៃគូអភិវឌ្ឍន៍នានា បានចាប់ផ្ដើមពិភាក្សារួមគ្នាអំពីបដិវត្តន៍ឧស្សាហកម្មជំនាន់ទី៤ ដើម្បីសម្រេចចក្ខុវិស័យឆ្នាំ២០៣០ និងឆ្នាំ២០៥០…
រាជធានីភ្នំពេញ ៖ ដោយសារការវិវត្តឥតឈប់ឈរនៃបច្ចេកវិទ្យាពីមួយជំនាន់ទៅមួយជំនាន់ រាជរដ្ឋាភិបាលកម្ពុជា តាមរយៈក្រសួងប្រៃសណីយ៍ និងទូរគមនាគមន៍ និងអង្គការដៃគូអភិវឌ្ឍន៍នានា បានចាប់ផ្ដើមពិភាក្សារួមគ្នាអំពីបដិវត្តន៍ឧស្សាហកម្មជំនាន់ទី៤ ដើម្បីសម្រេចចក្ខុវិស័យឆ្នាំ២០៣០ និងឆ្នាំ២០៥០ ស្របតាមយុទ្ធសាស្ត្រចតុកោណ និងផែនការយុទ្ធសាស្ត្រអភិវឌ្ឍន៍ជាតិ ។
បដិវត្តន៍ឧស្សាហកម្មជំនាន់ទី៤ ឬហៅថាឧស្សាហកម្ម៤.០ សំដៅលើការអភិវឌ្ឍបច្ចេកវិទ្យាជឿនលឿនដូចជា ការបោះពុម្ភ3D, ការប្រើបច្ចេកវិទ្យាមនុស្សយន្ត, បច្ចេកវិទ្យាជីវសាស្ត្រ quantum computing, ទំនើបកម្មលើបណ្ដាញទូរគមនាគមន៍ និងចំណេះធ្វើថ្មីៗអំពីការគ្រប់គ្រងផលិតកម្មជាដើម ។
ថ្លែងក្នុងសិក្ខាសាលាថ្នាក់ខ្ពស់ស្ដីអំពីបដិវត្តន៍ឧស្សាហកម្មជំនាន់ទី៤នៅកម្ពុជា កាលពីថ្ងៃទី៣ កញ្ញា នៅសណ្ឋាគារឡឺ រ៉ូយ៉ាល់ លោក ត្រាំ អីុវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ មានប្រសាសន៍ថា ដើម្បីសម្រេចបាននូវគោលបំណងក្នុងការនាំឧស្សាហកម្ម៤.០មក កម្ពុជាចាំបាច់ត្រូវមានកិច្ចសហប្រតិបត្តិការឱ្យបានរឹងមាំរវាងរដ្ឋាភិបាល ដៃគូអភិវឌ្ឍន៍ វិស័យឯកជនក្នុងឧស្សាហកម្ម និងស្ថាប័នសិក្សាស្រាវជ្រាវនានា ។
លោករដ្ឋមន្ត្រីបញ្ជាក់ថា ៖« តាមរយៈកិច្ចសហប្រតិបត្តិការបែបនេះ យើងអាចបង្កើតនូវលក្ខខណ្ឌចាំបាច់ធ្វើឱ្យមានការផ្លាស់ប្ដូរជាវិជ្ជមាន និងផ្ដល់លទ្ធភាពឲ្យមានការសម្របខ្លួន ដើម្បីឈានទៅសម្រេចលទ្ធផលជាវិជ្ជមានសម្រាប់សេដ្ឋកិច្ច និងសង្គមរបស់យើង »។
អ្នកសម្របសម្រួលប្រចាំប្រទេសកម្ពុជានៃអង្គការសហប្រជាជាតិ លោកស្រី Pauline Tamesis មានប្រសាសន៍ថា ការរៀបចំព្រឹត្តិការណ៍នេះ អង្គការសហប្រជាជាតិ មានគោលបំណងបង្កើនការយល់ដឹងដល់តួអង្គ សំខាន់ៗអំពីប្រធានបទដ៏សំខាន់ ដើម្បីគាំទ្រដល់គោលនយោបាយឆ្លើយតបរបស់រដ្ឋាភិបាល និងឈ្វេងយល់ពីតម្រូវការនានារបស់វិស័យឯកជនជុំវិញឧស្សាហកម្ម៤.០ ។
លោកស្រីបន្តថា ទីភ្នាក់ងារសហប្រជាជាតិនៅតែមានសុទិដ្ឋិនិយមជុំវិញកាលានុវត្តភាព និងសក្តានុពលនានារបស់បច្ចេកវិទ្យាឧស្សាហកម្ម ៤.០។ លោកស្រីថា ៖« យើងជឿជាក់ថាគោលនយោបាយ និងសកម្មភាពអនុវត្តនៅតែមានភាពចាំបាច់ ប្រសិនបើគេចង់ធានានូវការទទួលបានកាលានុវត្តភាព និងសក្តានុពលពីបច្ចេកវិទ្យាឧស្សាហកម្ម ៤.០នេះ »។
បើតាមលោកស្រី Pauline Tamesis ប្រទេសមួយចំនួន ក៏ដូចជាកម្ពុជា បច្ចេកវិទ្យាឧស្សាហកម្ម៤.០ នាំឱ្យមានការគិតពិចារណាពីថ្លៃដើមមូលធន ធៀបនឹងកម្លាំងពលកម្ម និងភាពចម្រុះគ្នារវាងថ្លៃដើមមូលធន និងកម្លាំងពលកម្មនៅក្នុងផលិតកម្ម។ ប្រការនេះមានភាពពាក់ព័ន្ធជាមួយនឹងទីតាំងផលិតកម្ម ការបែងចែកផលចំណេញរវាងប្រទេស និងប្រទេស និងរវាងអ្នកចូលរួមនានានៅក្នុងសង្វាក់តម្លៃ ។
លោក Nick Beresford នាយកប្រចាំប្រទេសនៃអង្គការUNDP មានប្រសាសន៍ថា ៖« ឧស្សាហកម្ម៤.០ កំពុងកើតមាននាពេលបច្ចុប្បន្ននេះ ហើយមិនយូរប៉ុន្មាន នឹងមានឥទ្ធិពលមកលើយើងទាំងអស់គ្នា »។
លោកបន្ដថា ៖« ការពិចារណាជុំវិញប្រធានបទនេះ អាចផ្ដល់ឱ្យរាជរដ្ឋាភិបាលថ្មីកម្ពុជានូវតំណភ្ជាប់ ដើម្បីឈានទៅសម្រេចចក្ខុវិស័យឆ្នាំ២០៣០ និងឆ្នាំ២០៥០ ស្របតាមយុទ្ធសាស្ត្រចតុកោណ និងផែនការយុទ្ធសាស្ត្រអភិវឌ្ឍន៍ជាតិ »។
លោកបន្តថា ឧស្សាហកម្ម៤.០ បង្ហាញពីកាលានុវត្តភាព និងការប្រឈម ដូច្នេះចាំបាច់ត្រូវមានការប្រើប្រាស់អភិក្រមគោលនយោបាយជាយុទ្ធសាស្ត្រ ដោយរាជរដ្ឋាភិបាលត្រូវដឹងពីផលប៉ះពាល់ និងប្រមើលមើលជាមុនពីបញ្ហាប្រឈមនានា ក៏ដូចជាត្រូវរៀបចំផែនការ និងការគ្រប់គ្រងប្រកបដោយប្រសិទ្ធភាព ៕
ចែករំលែកព័តមាននេះ