រាជធានីភ្នំពេញ ៖ គួរឱ្យសង្វេគទឹកភ្នែកឪពុកដែលយំឱបសពកូនប្រុសជាទីស្រលាញ់ជានិស្សិតផ្នែកអគ្គីសនី និងទើបតែប្រឡងចប់ថ្មីៗ មិនទាន់បានប៉ុន្មានថ្ងៃផង ក៏ត្រូវរថយន្តមិនស្គាល់ម៉ាកមួយគ្រឿង ធ្វើដំណើរស្របទិសគ្នាបើកបុកពីក្រោយពេញទំហឹង បណ្តាលអោយបើង ទាំងម៉ូតូ នឹងមនុស្សជាង៥០ម៉ែត្រ…
រាជធានីភ្នំពេញ ៖ គួរឱ្យសង្វេគទឹកភ្នែកឪពុកដែលយំឱបសពកូនប្រុសជាទីស្រលាញ់ជានិស្សិតផ្នែកអគ្គីសនី និងទើបតែប្រឡងចប់ថ្មីៗ មិនទាន់បានប៉ុន្មានថ្ងៃផង ក៏ត្រូវរថយន្តមិនស្គាល់ម៉ាកមួយគ្រឿង ធ្វើដំណើរស្របទិសគ្នាបើកបុកពីក្រោយពេញទំហឹង បណ្តាលអោយបើង ទាំងម៉ូតូ នឹងមនុស្សជាង៥០ម៉ែត្រ បែកក្បាលហូរឈាម បាក់កស្លាប់ក្នុងថ្លុកឈាមយ៉ាងអាណោចអាធ័ម ។ ហេតុការណ៍គួរសង្វេគ និងអាណោចអាធ័មនេះបានកើតមានឡើងកាលពីវេលាម៉ោង៩និង៣០នាទីយប់ថ្ងៃទី៥ ខែកញ្ញា នៅផ្លូវឌួងងៀប ភូមិឌួងងៀប សង្កាត់អូរបែកក្អម ខណ្ឌសែនសុខ ។
ជនរងគ្រោះដែលស្លាប់ខាងលើឈ្មោះ គង់ មុន្នី ភេទប្រុស អាយុ២៣ឆ្នាំ ជានិស្សិតនៅវិទ្យាស្ថានបណ្តុះបណ្តាលវិជ្ជាជីវៈអគ្គិសនីកម្ពុជាចំការដូង ស្នាក់នៅផ្ទះលេខ៤៥ដេ ផ្លូវ៧០ ភូមិ២៤ សង្កាត់ស្រះចក ខណ្ឌដូនពេញ ។
ប្រភពព័ត៌មានពីអ្នកឃើញហេតុការណ៍នៅកន្លែងកើតហេតុបានប្រាប់អោយដឹងថា មុនកើតគឺគេឃើញជនរងគ្រោះបណ្តើរម៉ូតូម៉ួយគ្រឿង ម៉ាកស្គូពី ពណ៌ក្រហម ពាក់ស្លាកលេខ ភ្នំពេញ១BB-៥១៣៨ តែម្នាក់ឯង មិនដឹងថាម៉ូតូនោះខូច រឺក៏អស់សាំងនោះទេ បានបណ្តើរតាមបណ្តោយផ្លូវឌួងងៀប ក្នុងទិសដៅពីត្បូងទៅជើង លុះមកដល់ចំណុចកើតហេតុក៏មានរថយន្តស៊េរីទំនើបមួយគ្រឿង មិនចាំម៉ាក ធ្វើដំណើរស្របទិសគ្នា ក្នុងល្បឿនយ៉ាងលឿនបានបុកពីក្រោយម៉ូតូជនរងគ្រោះពេញទំហឹង លាន់ស្នូរដូចរន្ទះ បណ្តាលអោយប៉ើងទាំងម៉ូតូ និងមនុស្សអូសជាង៥០ម៉ែត្រ ដួលបោកក្បាលស្លាប់ក្នុងថ្លុកឈាមយ៉ាងអាណោចអាធ័ម ចំណែកម៉ូតូខូចខាតស្ទើរតែទាំងស្រុង ។ ភ្លាមៗនោះរថយន្តបង្កបានបន្ថែមល្បឿនបើករត់ទៅកាន់ផ្លូវ២០០៤បាត់ស្រមោលដោយសុវត្ថិភាព ដោយមិនមានអ្នកណាស្គាល់ភិនភាគរថយន្តនោះច្បាស់នោះទេ។
បន្ទាប់ពីកើតហេតុ គេបានទាក់ទងទៅក្រុមគ្រួសារដើម្បីអោយមកទទួលសព មួយសន្ទុះក្រោយក៏ឃើញមានវត្តមានក្រុមគ្រួសារសព រួមទាំងឪពុក បើករថយន្តមកដល់កន្លែងកើតហេតុ បើកទ្វាររថយន្តចេញរត់មកអោបសពកូនយំសោកបោកខ្លួន ស្តាយស្រណោះកូនប្រុសជាទីស្រឡាញ់របស់គាត់ជាពន់ពេក ធ្វើអោយស្ថានភាពនោះមើលទៅគួរសង្វេគ នឹង អាណិតអាសូរដល់ទឹកចិត្តគាត់ជាពន់ពេក។
ប្រភពពីសាច់ញាតិជនរងគ្រោះបានប្រាប់ឱ្យដឹងថា ជនរងគ្រោះខាងលើទើបតែប្រឡងចប់ ផ្នែកអគ្គីសនីថ្មីៗ និងសព្វថ្ងៃបម្រើការងារអោយក្រុមហ៊ុនអគ្គីសនីឯកជនមួយកន្លែង នៅចំការដូង ខណ្ឌដង្កោ ហើយជនរងគ្រោះខាងលើក៏បម្រុងនឹងចេញទៅបន្តការសិក្សានៅក្រៅប្រទេសឆាប់ៗខាងមុខនេះទៀត។
មុនពេលកើតហេតុ ពួកគាត់ក៏មិនដឹងព័ត៌មានច្បាស់ថា រងគ្រោះនោះទើបតែមកពីណានោះទេ ហេតុអ្វីបានជាធ្វើដំណើរត្រឡប់ទៅផ្ទះកាត់តាមផ្លូវឌួងងៀបនេះ ហើយក៏ជួបគ្រោះថ្នាក់រហូតដល់បាត់បង់ជីវិតបែបនេះនោះទេ ។
ប្រភពពីកន្លែងកើតហេតុបានឱ្យដឹងថា ឃើញយុវជននោះបណ្ដើរម៉ូតូ ដោយមិនដឹងមូលហេតុថាខូច ឬក៏មានបញ្ហាអ្វីនោះទេ ទើបសាច់ញាតិជនរងគ្រោះបើកគម្របសាំងម៉ូតូឃើញថា ម៉ូតូនោះមានសាំងពេញ ក៏សន្និដ្ឋានថាមកពីបញ្ហាម៉ាស៊ីនមិនដំណើរការ ទើបជនរងគ្រោះបណ្តើរម៉ូតូកាត់ទីនោះ ហើយក៏ជួបគ្រោះថ្នាក់បែបនេះតែម្តង។
ក្រោយកើតហេតុ សពត្រូវបានក្រុមគ្រួសារសាច់ញាតិដឹកយកទៅធ្វើបុណ្យតាមប្រពៃណីនៅវត្តសេះស សង្កាត់ស្រះចក ខណ្ឌដូនពេញ ៕
ចែករំលែកព័តមាននេះ