ខេត្តស្វាយរៀង ៖ មន្ត្រីសាខាកាំកុងត្រូលខេត្តស្វាយរៀងសហការជាមួយមន្ទីរពាណិជ្ជកម្មខេត្តស្វាយរៀង នៅព្រឹកថ្ងៃទី៥ ខែកញ្ញា ឆ្នាំ២០១៨នេះ បានដឹកនាំមន្ត្រីក្រោមឱវាទចុះពិនិត្យទំនិញបន្លែផ្លែឈើនៅទីតាំងផ្សារប្រសូត្រ ស្រុកស្វាយទាប និងផ្សារជីភូ ក្រុងបាវិត ក្នុងនោះបានរកឃើញចាហ៊ួយសង្ស័យដាក់ជាតិប្លា
ស្ទិកចំនួន១៥កាឡ ស្មើនិង៣៧.៥គីឡូក្រាម និងទំនិញខូចគុណភាពជាច្រើនមុខទៀតដែលដាក់តាំងលក់នៅផ្សារប្រសូត្រ ស្រុកស្វាយទាប និងផ្សារជីភូ ក្រុងបាវិត ហើយបានដកហូតយកទៅពិសោធន៍ និងដុតកម្ទេចចោល ។
បើតាមមន្ត្រីកាំកុងត្រូលម្នាក់បានឲ្យដឹងថា កន្លងមកមន្ត្រីសាខាកាំកុងត្រូលខេត្តស្វាយរៀងតែងតែចុះពិនិត្យមុខទំនិញបានជាច្រើនលើក ហើយការចុះពិនិត្យមុខទំនិញនៅថ្ងៃនេះក្នុងគោលបំណងធានាបានសុវត្ថិភាព ម្ហូបអាហារជូនប្រជាពលរដ្ឋនិងលើកកម្ពស់សុខុមាភាពដល់ពួកគាត់ ព្រោះវាមានសារសំខាន់ណាស់ក្នុងសង្គម និងជីវភាពប្រចាំថ្ងៃ ហើយការទទួលខុសត្រូវលើសុវត្ថិភាពម្ហូបអាហារគឺជាការទទួលខុសត្រូវរួមគ្នាទាំងស្ថាប័នជំនាញទាំងអ្នកនាំចូល អ្នកផលិតអ្នកចែកចាយ និងអ្នកប្រើប្រាស់ផងដែរ ព្រោះសុខភាពគឺជាកត្តាចំបងនៃភាពរស់រាននៃជីវិត ។
ប្រភពដដែលបានបញ្ជាក់ទៀតថា មន្ត្រីជំនាញបានធ្វើការចុះពិនិត្យមុខទំនិញជាច្រើនមុខក្នុងទីតាំងផ្សារប្រសូត្រ និងផ្សារជីភូ នាពេលនេះបានរកឃើញចាហ៊ួយចំនួន១៥កាឡ ស្មើនិង៣៧.៥គីឡូក្រាម ព្រោះប្រភេទចាហ៊ួយនេះនាំចូលពីប្រទេសជិតខាង វាមានជាតិរឹងស្វិតដែលបង្កអោយប៉ះពាល់ដល់ក្រពះពោះវៀនយ៉ាងធ្ងន់ធ្ងរ ខណៈដែលយើងបានបរិភោគវា ជាពិសេសនោះក្មេងៗតូច ពិតជាគ្រោះថ្នាក់ខ្លាំងណាស់។
ក្នុងនោះក៏បានរកឃើញទំនិញហួសកាលបរិច្ឆេតមួយចំនួនទៀតផងដែរ មន្ត្រីជំនាញបានធ្វើតេស្តទៅលើមុខទំនិញជាច្រើនមុខ មានដូចជាបន្លែផ្លែឈើ ផ្អក ប្រហុក ជ្រក់ សណ្តែកបណ្តុះ ឈាមគោ។ល។ ប៉ុន្តែពុំមិនបានរកឃើញផ្ទុកសារធាតុគីមីនោះទេ ចំណែកអ្នកលក់ក៏បានយល់ព្រមបញ្ឈប់ការដាក់លក់ទំនិញដែលខូចគុណភាពហួសការបរិច្ឆេទប្រើប្រាស់ព្រោះពួកគេទាំងអស់នោះបានយល់ដឹងនូវផលប៉ះពាល់ដល់សុខភាពនៅពេលដែលប្រើប្រាស់ទំនិញដែលខូចគុណភាព។
មន្ត្រីកំកុងត្រូលក៏បានអំពាវដល់ប្រជាពលរដ្ឋទាំងអស់នៅខេត្តស្វាយរៀងសូមមានការប្រុងប្រយ័ត្នចំពោះការបរិភោគចំណីអាហារ ត្រូវពិនិត្យមើលស្លាកសញ្ញាកាលបរិច្ឆេទឲ្យបានច្បាស់លាស់មុនទិញយកទៅបរិភោគដើម្បីចូលរួមលើកកម្ពស់សុខុមាលភាពទាំងអស់គ្នា ហើយមន្ត្រីកាំកុងត្រូលនឹងបន្តចុះពិនិត្យទំនិញនៅតាមផ្សារនានានៅក្នុងខេត្ត ស្វាយរៀងឲ្យបានញឹកញាប់បន្ថែមទៀត ជាពិសេសជិតរដូវបុណ្យភ្ជុំបិណ្យខាងមុខនេះ៕
ចែករំលែកព័តមាននេះ