ខេត្តប៉ៃលិន ៖ រហូតមកដល់ព្រឹកថ្ងៃទី០៦ ខែកញ្ញា ឆ្នាំ២០១៨នេះ ក្រុមហ៊ុនគ្រឿងចក្រជីកក កាយដីភ្នំលក់ចំនួនពីរក្រុម ដែលត្រូវបានរដ្ឋបាលព្រៃឈើប៉ៃលិនសហការជាមួយកងរាជអាវុធហត្ថខេត្តចុះឃាត់ខ្លួនអ្នកបើកបរ និងរឹបអូសគ្រឿងចក្រតាមបទបញ្ជារបស់លោក តូច សុភក្តី ព្រះរាជអាជ្ញាអមសាលាដំបូងខេត្ត រួចត្រូវបញ្ជូនចូលពន្ធនាគារខេត្ត កាលពីរសៀលថ្ងៃទី០១ ខែកញ្ញា មិនទាន់មានការដោះលែងនៅឡើយទេ ។
សូមបញ្ជាក់ផងដែរថា កាលពីព្រឹកថ្ងៃទី២៩ ខែសីហា ឆ្នាំ២០១៨ កន្លងទៅថ្មីៗ ម្ចាស់គ្រឿង ចក្រដែលម្នាក់មានឈ្មោះ លីន ភេទប្រុស អាយុ៤០ឆ្នាំជាង ស្នាក់នៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ រួមជាមួយនឹងកម្មករ៣នាក់ទៀត ត្រូវបានកម្លាំងរដ្ឋបាលព្រៃឈើសហការជាមួយប៉េអឹមខេត្តចុះឃាត់ខ្លួនពីបទជីកកកាយដីភ្នំលក់ និងបំផ្លាញរ៉ែធនធានធម្មជាតិខុសច្បាប់ ។
បើតាមប្រភពព័ត៌មានពីលោក មិន រ៉ាវុធ នាយផ្នែករដ្ឋបាលព្រៃឈើប៉ៃលិនបានឲ្យដឹងថា កាលពីថ្ងៃទី២៩ ខែសីហា ឆ្នាំ២០១៨ កន្លងទៅខាងលោកបានសហការជាមួយនឹងកងរាជអាវុធហត្ថខេត្តធ្វើការចុះឃាត់គ្រឿងចក្រ និងរថយន្តដែលជីកកកាយដីភ្នំខុសច្បាប់តាមបទបញ្ជាព្រះរាជអាជ្ញា ស្ថិតក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ។
លោកបន្តថា ការចុះបង្ក្រាបនេះ គឺសមត្ថកិច្ចជំនាញបានដកហូតរថយន្តដឹកដីចំនួន៣គ្រឿង ដែលជីកកកាយដីចំនួន២គ្រឿង រថយន្តដឹកគ្រឿងចក្រ១គ្រឿង និងអ្នកបើកបរចំនួន៤នាក់ យកទៅសួរនាំនៅការិយាល័យរដ្ឋបាលព្រៃឈើ ព្រមទាំងរៀបចំសំណុំរឿងបញ្ជូនទៅតុលាការ ឱ្យចាត់ការតាមនីតិវិធី ។
រីឯរថយន្ត និងគ្រឿងចក្រទាំងអស់ត្រូវបានជំនាញយកទៅរក្សាទុកនៅក្នុងបញ្ជាការដ្ឋានកងរាជអាវុធហត្ថខេត្ត ដោយឡែកមនុស្សត្រូវបញ្ជូនទៅដាក់ពន្ធនាគារហើយ ។ លោកបញ្ជាក់ថា ពួកគេទាំងនោះធ្លាប់ជីកកកាយដីភ្នំលក់ម្តងរួចទៅហើយ ក៏ត្រូវបានខាងលោកចុះទៅហាមឃាត់ និងធ្វើកិច្ចសន្យារាងចាលដែរ តែក្រោយមកនៅបន្តបំពាននឹងច្បាប់ទើបចុះទៅចាប់ឃាត់ខ្លួន បញ្ជូនចូលពន្ធនាគារតែម្តង ។
ចំណែកលោក តូច សុភក្តី ព្រះរាជអាជ្ញាអមសាលាដំបូងខេត្តបានឲ្យដឹងថា ខាងលោកបានដាក់បញ្ជាឲ្យសមត្ថកិច្ចរដ្ឋបាលព្រៃឈើសហការជាមួយប៉េអិមចុះបង្ក្រាបក្រុមគ្រឿងចក្រជីកកកាយដីភ្នំខុសច្បាប់ ។ ហើយលោកកំពុងតែដំណើរការរឿងក្តីនេះផងដែរ ។
បើតាមបុរសម្នាក់ឈ្មោះ នេត្រ ម្ចាស់គ្រឿងចក្រដែលសមត្ថកិច្ចជំនាញចុះរឹបអូសគ្រឿងចក្របានឲ្យដែរថា ករណីនេះនៅមិនទាន់មានការដោះលែងនៅឡើយទេ ដោយរង់ចាំំខាងនាយកសាលាអនុវិទ្យាល័យផ្សារព្រំ និងអភិបាលខេត្តទៅជួយដោះស្រាយ និងសុំដោះលែងអ្នកបើកបររថយន្តទាំងអស់ ព្រោះពួកគេមិនដឹងខុសរឿងអ្វីនោះទេ ៕
ចែករំលែកព័តមាននេះ