ខេត្តឧត្តរមានជ័យ ៖ សេចក្តីរាយការណ៍បានឲ្យដឹងថា កាលពីព្រលប់ថ្ងៃទី៤ កញ្ញា ២០១៨ មានប្រជាពលរដ្ឋនៅភូមិដុងអារញ្ញ ក្រុងប៉ោយប៉ែត ខេត្តបន្ទាយមានជ័យ បានទូរសព្ទ័មកប្តឹងសមត្ថកិច្ច…
ខេត្តឧត្តរមានជ័យ ៖ សេចក្តីរាយការណ៍បានឲ្យដឹងថា កាលពីព្រលប់ថ្ងៃទី៤ កញ្ញា ២០១៨ មានប្រជាពលរដ្ឋនៅភូមិដុងអារញ្ញ ក្រុងប៉ោយប៉ែត ខេត្តបន្ទាយមានជ័យ បានទូរសព្ទ័មកប្តឹងសមត្ថកិច្ច គ្រប់ច្រកល្ហកឲ្យជួយរកកូនស្រីម្នាក់ដែលបានបាត់ចេញពីផ្ទះ អស់រយៈពេល៥ថ្ងៃ ហើយមិនដឹងជាទៅណា។ លុះល្ងាចថ្ងៃ៤ កញ្ញា ដដែលកូនស្រីនោះបានខ្ចីទូរស័ព្ទស្រី្តខារ៉ាអូខេម្នាក់ខលទៅម្តាយថា ខ្លួនត្រូវគេចាប់បង្ខាំងចាក់សោទុកក្នុងបន្ទប់ខារ៉ាអូរខេមួយនៅស្រុកអន្លង់វែង ខេត្តឧត្តរមានជ័យ។
បន្ទាប់ពីទទួលបានព័ត៌មាននោះ សមត្ថកិច្ចនគរបាលខេត្តឧត្តរមានជ័យ បានធ្វើការស្រាវជ្រាវលេខទូរស័ព្ទ ដែលកូនទាក់ទងទៅម្តាយនោះ រហូតដល់វេលាម៉ោង១០ និង៥៤នាទីយប់ សមត្ថកិច្ចក៏បានរកឃើញជនរងគ្រោះ ដែលថាកូនបានបាត់ចេញពីផ្ទះនោះវិញ។ ជនរងគ្រោះឈ្មោះ ងួន គឹមសៀន ភេទស្រី អាយុ១៦ឆ្នាំ រស់ នៅភូមិដុងអារញ្ញ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
នាងមានឪពុកឈ្មោះ អោក សឿន អាយុ៣៦ឆ្នាំ រកស៊ីនៅប្រទេសថៃ និងម្តាយឈ្មោះ វ៉ែន ចន្ធី អាយុ៤០ឆ្នាំ មុខរបរលក់ចាប់ហួយមុខផ្ទះ។ ក្រោយពីបានរកឃើញក្មេងស្រីនោះ នាងបាននិយាយការពិតមូលហេតុដែលនាងចាកចេញពីផ្ទះ រហូតហ៊ានកុហកម្តាយថា គេចាប់បង្ខាំដើម្បីទាមទារប្រាក់។ តាមចម្លើយនាងថា ខ្លួនបានចេញពីផ្ទះ៨ថ្ងៃមកហើយ ដោយពុំបានប្រាប់ម្តាយនោះទេ ដោយសារខ្លួនរស់នៅជាមួយម្តាយអត់មានលុយចាយ ទើបបានចាកចេញពីផ្ទះ ដើម្បីរកប្រាក់។
នាងបន្តថា ពេលចេញពីផ្ទះមានគ្នា៥នាក់ប្រុស២ ស្រី៣នាក់ ក្នុងនោះមានម្តាយធម៌ឈ្មោះ ចឿង ចិន និងឪពុកធម៌ឈ្មោះ ផូ រិទ្ធ ក៏មកជាមួយនាងដែរ។ ពេលចេញផ្ទះថ្ងៃដំបូងបានទៅដេកនៅភូមិអង្គ្រង ឃុំដំដែក ស្រុកសូទ្រនិគម ខេត្តសៀមរាបចំនួន៥ថ្ងៃ គឺនៅផ្ទះបងប្អូនឪពុកធម៌ រួចបានបន្តដំណើរទៅកាន់ស្រុកអន្លង់វែង គឺទៅផ្ទះប្អូនបង្កើតរបស់ឪពុកធម៌ ដែលធ្វើការនៅខារ៉ាអូខេមួយ យីហោផ្កាយមាស ពេលដល់ទីនោះខ្លួននាងក៏បាន សុំគេចូលធ្វើការ នៅខារ៉ាអូខេនោះតែម្តងទៅ។
ធ្វើការនៅខារ៉ាអូខេនោះបាន២ថ្ងៃ ដោយពុំមានការលួងលោម ឆរបោក ឬបង្ខាំងទុកដូចម្តាយខ្លួនប្តឹងសមត្ថកិច្ចនោះទេ។ ចំពោះរឿងនាងទូរសព្ទ័ទៅម្តាយថា គេបង្ខាំងទុក ក្នុងបន្ទប់ខារ៉ាអូខេនោះ គឺជារឿងមិនពិតនោះទេ គឺខ្លួនបានខ្ចីទូរសព្ទ័ម្តាយធម៌ខលទៅម្តាយបង្កើត ដើម្បីសុំលុយគាត់ចាយ ដែលអត់មានលុយមួយរៀលក្នុងងខ្លួន ម្លោះហើយបានជាបង្កើតរឿងថា គេចាំបង្ខាំង។
បន្ទាប់ពីការបំភ្លឺរបស់នារីឈ្មោះ ងួន គឹមសៀន នោះ សមត្ថកិច្ចបានពិនិត្យ និងពិចារណាលើសម្តីសំនាង ដែលនិយាយហាក់បីដូចជាមនុស្សញៀនថ្នាំ ដូច្នោះសមត្ថកិច្ច ក៏បានធ្វើតេស្តរកសារធាតុញៀនផ្ទុកលើខ្លួននាងនោះដែរ។ សមត្ថកិច្ចក៏បានសន្និដ្ឋានថា ករណីនេះពុំមានពាក់ពន្ធ័ នឹងបទល្មើសព្រហ្មទណ្ឌណាមួយទេ ទំនងនាងញៀនថ្នាំ ឬក៏មកពីអត់លុយចាយ ទើបបានជាប្រឌិតរឿងដូច្នេះ។ ក្រោយមកសមត្ថកិច្ចបានទំនាក់ទំនង ទៅអាណាព្យានបាលឲ្យទៅទទួលយកកូនត្រឡប់ទៅផ្ទះវិញ៕
ចែករំលែកព័តមាននេះ