​ចោរ​លួច​-ប្លន់​ជាង​៣៥០​លើក​​…​និយាយពីយុទ្ធវិធី​​ដែល​គេជោគជ័យ​កន្លង​មក​


រាជធានី​ភ្នំពេញ ៖ នគរបាល​នាយកដ្ឋាន​ព្រហ្មទណ្ឌ​ក្រសួងមហាផ្ទៃ កាលពី​យប់​ថ្ងៃ​ទី​៣១ សីហា​ កន្លង​ទៅ បាន​ឃាត់ខ្លួន​ជនសង្ស័យ​ម្នាក់ ជា​មុខសញ្ញា​លួច​និង​ប្លន់​ប្រដាប់​អាវុធ​នៅ​រាជធានី​ភ្នំពេញ ដែល​តាម​ចម្លើយ​សារភាព​ថា ធ្លាប់​លួច​និង​ប្លន់​បាន​សម្រេច​ជាង​៣៥០​លើក ក្នុង​ចំណោម​បក្សពួក​ប្រមាណ​១០​នាក់ ។

ជនសង្ស័យ​នេះ​ឈ្មោះ​កែវ សា​រិ​ន ភេទ​ប្រុស អាយុ​២៨​ឆ្នាំ ជា​ជន​បោះបង់​ចោលផ្ទះ​សម្បែង ។ ទាក់ទិន​នឹង​ការ​ឃាត់ខ្លួន​ជនសង្ស័យ​រូប​នេះ លោក​ឧត្តមសេនីយ៍ទោ ប៉ុ​ល រតនា អនុប្រធាន​នាយកដ្ឋាន​នគរបាល​ព្រហ្ម​ទណ្ឌ​បាន​ឲ្យ​ដឹង​ថា ជនសង្ស័យ​១​ក្រុម ​បាន​ធ្វើ​សកម្មភាព​ប្លន់​ម៉ូតូ​ នៅ​ក្នុង​ទឹកដី​ខណ្ឌ​៧​មក​រា កាលពី​យប់​ថ្ងៃ​ទី​៣០ ​សីហា ហើយ​សកម្មភាព​នេះ ​ត្រូវ​បាន​ថត​ជាប់​ដោយ​កាមេរ៉ា​សុវត្ថិភាព​តាម​ផ្លូវ​សាធារ​ណៈ ។

ក្រោយ​ពី​បាន​ពិនិត្យ​ក្នុង​សកម្មភាព​ប្លន់​នោះ ការិយាល័យ​ព្រហ្មទណ្ឌ​កម្រិត​ស្រាលនៃ​នាយកដ្ឋាន​នគរបាល​ព្រហ្ម​ទណ្ឌ គឺ​រូប​លោក​ផ្ទាល់​បាន​ដឹកនាំ​កម្លាំង​ចុះ​ធ្វើការ​ស្រាវជ្រាវ ទើប​ឈាន​ដល់​ការ​ឃាត់ខ្លួន​ជនសង្ស័យ​ម្នាក់​នេះ ។ បន្ទាប់​ពី​ត្រូវ​ឃាត់ខ្លួន ជនសង្ស័យ​សារភាព​ថា បក្សពួក​គេ​ទាំងអស់​មាន​ជាង​១០​នាក់ ធ្លាប់ធ្វើ​សកម្មភាព​លួច និង​ប្លន់​ប្រដាប់​អាវុធ​ជាង​៣៥០​លើក គឺ​លួច​និង​ប្លន់​នៅ​ក្នុង​រាជធានី​ភ្នំពេញ​។

លោក ប៉ុ​ល រតនា បន្ត​ថា ចម្លើយ​នេះ​ ដំបូង​សមត្ថកិច្ច​យើង​មិន​អាច​យក​ជា​ផ្លូវការ​បាន​ទេ ប៉ុន្តែ​តាម​រយៈ​នគរ​បាល​ព្រហ្មទណ្ឌ​រាជធានី​ភ្នំពេញ និង​ផ្នែក​ព្រហ្មទណ្ឌ​គ្រប់​បណ្តា​ខណ្ឌ ឲ្យ​យក​របាយការណ៍​កំណត់ហេតុ កន្លែង​កើតហេតុ​ស្តី​ពី​អំពើលួច​និង​ប្លន់ រួម​ទាំង​ការ​សាកសួរ​យក​ចម្លើយ​ឃើញ​ថា ជនសង្ស័យ​ឈ្មោះ កែវ សា​រិ​ន ​និង​បក្សពួក​ជាង​១០​នាក់ ពិតជា​មុខសញ្ញា​លួច​និង​ប្លន់​យ៉ាង​សកម្ម​ នៅ​ក្នុង​រាជធានី​ភ្នំពេញ​ប្រាកដ​មែន ។

តាម​ចម្លើយ​របស់​ឈ្មោះ កែវ សា​រិ​ន បានឱ្យ​ដឹង​ថា ក្នុង​ចំណោម​បក្សពួក​ជាង​១០​នាក់​នោះ​ មាន ១-​ឈ្មោះ គក ២-​ឈ្មោះ ប៉ិត ៣-​ឈ្មោះ លី​ន ៤-​ឈ្មោះ ផុ​ក ៥-​ឈ្មោះ ល័​ក្ខ ៦-​ឈ្មោះ ថា ៧-​ឈ្មោះ ឡា ៨-​ឈ្មោះ ផា​ន់​ណា និង​៤​ទៅ​៥​នាក់​ទៀត​មិន​ស្គាល់ឈ្មោះ ព្រោះ​ខ្លះ​បាន​ចូលរួម​ធ្វើ​សកម្មភាព​ប្លន់​តាម​រយៈ​បក្សពួក​ខាងលើ ។ ពួក​គេ​មាន​ជាង​១០​នាក់​មែន តែ​រាល់​ការ​ចេញ​ធ្វើ​សកម្មភាព​លួច​(​កាច់.ក​ម៉ូតូ​) ឬ​ប្លន់​ប្រដាប់​អាវុធ មិនមែន​ទៅ​ម្តង​ទាំងអស់​គ្នា​ទេ គឺ​មាន​បែងចែក​ជា​ក្រុម ឬ​ក៏​តាម​បទល្មើស​​ជាក់ស្តែង ។

ជាក់ស្តែង ដូច​ជា​ករណី​លួច​កាច់​សោ​.​ក​ម៉ូតូ ពេល​ខ្លះ​ធ្វើ​ម្នាក់ឯង​ឬ​២​នាក់ គ្រាន់តែ​ជិះ​ម៉ូត​ូឌុ​បគ្នា​ទៅ​ដាក់​នៅ​ចំណុច ឬ​គោលដៅ​ណា​ ដែល​ត្រូវធ្វើ​សកម្មភាព ។ បើ​ប្លន់​ពួក​គេ​ត្រូវការ​ប្រើប្រាស់​កម្លាំង​ច្រើន គឺ​ចាប់ពី​៤​នាក់​ទៅ​៦​នាក់ ក្នុង​នោះ​ត្រូវ​ប្រើ​មធ្យោបាយ​ម៉ូតូ​២​ទៅ​៣​គ្រឿង និង​ប្រើ​អាវុធ​ស្ទើរ​គ្រប់​ដៃ ដោយ​បាន​ចាត់​តាំង​រួច​ជា​ស្រេច​មុន​ប្លន់​ជន​រង​គ្រោះ​ណា​ម្នាក់ ខ្លះ​មាន​តួនាទី​ភ្ជង់​ជន​រង​គ្រោះ ខ្លះ​មើលផ្លូវ​ប្លន់ ហើយ​ត្រូវ​ជិះ​ចេញ​តាម​ណា ខ្លះ​តាម​មើល​សមត្ថកិច្ច និង ខ្លះ​ចាំ​បិទ​គូទ ។

រាល់ពេល​​ចេញ​ធ្វើ​សកម្មភាព ពួក​គេ​តែងតែជួប​ប្រជុំ​គ្នា​នៅ​ក្នុងផ្ទះ​សំណាក់​ណាមួយ ដើម្បី​បែងចែក​តួនាទី​គ្នា​ឲ្យ​បាន​ច្បាស់លាស់ អ្នក​ណាត្រូវ​ចុះ​ភ្ជង់​ជន​រង​គ្រោះ ហើយ​អ្នក​ណា​ត្រូវ​ដណ្តើមយក​ម៉ូតូ ។ ពេល​នោះ​បើ​សិន​ជា​ជ​ន​រង​គ្រោះ​តដៃ ឬ​មិន​ព្រម​ប្រគល់​ម៉ូតូ​ឲ្យ​ពួក​គេ​ទេ បទបញ្ជាផ្ទៃក្នុង​របស់​ក្រុម​ចោរ ត្រូវ​តែ​ផ្ទុះអាវុធ ។

ប៉ុន្តែមើល​ពេលវេលា បើ​ជន​រង​គ្រោះ​ណា​រឹងរូស​ខ្លាំង អាច​បាញ់​សម្លាប់​តែ​ម្តង ហើយ​បើ​គ្រាន់តែ​មិន​ព្រម​ប្រគល់​សោ​ម៉ូតូ​អាច​បាញ់​គំរាម ឬ​ក៏​ពេល​ខ្លះ​ជន​រង​គ្រោះ​ប្រគល់​ម៉ូតូ​ឲ្យ​តាម​សម្រួល បទបញ្ជា​មិន​ឲ្យ​ផ្ទុះ​អាវុធ​ទេ ។

ជនសង្ស័យ​ឆ្លើយ​ទៀត​ថា ពួក​គេ​ជាង​១០​នាក់តែងតែ​ជួប​ប្រជុំ​គ្នា​មុន​ចេញ​ធ្វើ​សកម្មភាព ហើយ​តែងតែបាន​ស្បថស្បែ​រួម​គ្នា​មិន​ឲ្យ​ក្បត់គ្នា និង​ត្រូវ​ហ៊ាន​ប្តូរជីវិត​ស្លាប់​រស់​ជាមួយ​គ្នា ។ ក្រុម​គេ​ភាគច្រើន​ចេញ​លួច​ឬ​ប្លន់​នៅ​ពេល​យប់ ហើយលួច​ឬ​ប្លន់​បាន​តែងតែ​យក​ម៉ូតូ​របស់​ជន​រង​គ្រោះទៅ​លក់​ឲ្យ​អ្នក​ទទួល​ទិញ​នៅ​ផ្សារ​ថ្នល់ទទឹង ខេត្តកំពង់ស្ពឺ ម្តុំ​ចោម​ចៅ ខណ្ឌ​ពោធិ៍​សែន​ជ័យ និង​ភាគច្រើន​លក់​នៅ​ម្តុំ​ឃ្លាំង​រំសេវ ខណ្ឌទួលគោក រាជធានី​ភ្នំពេញ ។

ចម្លើយ​សារភាព​ឲ្យ​ដឹង​ទៀត​ថា ការ​ធ្វើ​ចោរលួច និង​ប្លន់​ម៉ូតូ​នេះ មិន​ដែល​យក​មក​ធ្វើ​មានបាន​ទេ គ្រាន់តែ​ម៉ា​រស់ និង​ចាយវាយ​ផឹកស៊ី​ស្រីញី​អូន​បង ល្បែងស៊ីសង ពេល​ចាយ​អស់​ចេញប្លន់​ទៀត ។ មាន​ពេល​ខ្លះ​ដាច់​លុយ​មែនទែន ពួក​គេ​ទៅ​ខ្ចី​ពី​អ្នក​ទទួល​ទិញ​ចាយ​បណ្តោះអាសន្ន រួច​ទើប​លួច ឬ​ប្លន់​ម៉ូតូ​យក​ទៅ​ទូទាត់​ឲ្យ​ម្ចាស់​ប្រាក់​វិញ​ក៏​មាន ។ ពេល​ខ្លះ អ្នក​ចាំ​ទិញ​ម៉ូតូ​កក់​លុយ​មុន​ក៏​មាន​ដែរ កក់​លុយ​ដើម្បី​កុម្ម​ង់ឬ​តម្រូវ​ឲ្យ​ក្រុម​គេ​ប្លន់​ម៉ូតូ​ប្រភេទ​ណា ស៊េរី​ណាដែល​ងាយ​លក់​ឬ​តាម​អតិថិជន​ត្រូវការ ។

សកម្មភាព​លួច​និង​ប្លន់​ប្រដាប់​អាវុធ​ជាង​៣៥០​លើក​នេះ គឺ​ពួក​គេ​ទើប​ចាប់ផ្តើម​ក្នុង​ឆ្នាំ២០១៨​នេះ ហើយ​សុទ្ធតែ​ទទួល​បាន​ជោគជ័យ​គ្រប់ពេល​ទាំងអស់ ទោះបី​មាន​ពេល​ខ្លះ​ជួប​ឧបសគ្គ​តឹងតែង​ក៏​ដោយ ។ ផល​ទទួល​​បាន​ពី​ការ​លួច ឬ​ប្លន់ ពួក​គេ​មិន​ក្បត់គ្នា​ទេ និង​តែងតែ​ចែក​គ្នា​ចាយវាយ​តាម​តិច​តាម​ច្រើន ពោល​គឺ​ពួក​គេ​មិន​ចេះ​ទាស់ទែង​គ្នា មាន​ស៊ី​អត់​ស៊ី​ គឺ​ចាប់ដៃ​គ្នា​ចេញ​ធ្វើ​សកម្មភាព ។

ថ្វី​ដ្បិតតែ​ពួក​គេ​ ជា​ចោរ​មាន​វ័យក្មេង​ៗ​មែន ប៉ុន្តែ​ចេញ​លួច​និង​ប្លន់​ជាង​៣៥០​លើក​កន្លង​មកនេះ មិន​ទាន់​មាន​បក្សពួក​ណា​ម្នាក់​ មាន​គ្រោះថ្នាក់​ក្នុង​ហេតុការណ៍​ចេញ​ប្លន់​នោះ​ទេ ហើយ​ក៏​សឹង​ថា​ គ្មាន​អ្នក​ណា​បាន​ទៅ​ដេក​គុក​ដែរ ។

លោក​ឧត្តមសេនីយ៍ទោ ប៉ុ​ល រតនា ថ្លែងថា តាម​ការ​ស្តាប់​ចម្លើយជនសង្ស័យ​ជា​ចោរវ័យក្មេង​ម្នាក់ ក្រុម​គេ​ជា​ចោរ​សកម្ម​និង​ប្លន់​សាហាវ​បំផុត​នៅ​ក្នុង​រាជធានី​ភ្នំពេញ ។ ជាក់ស្តែងដូច​សកម្មភាព​ដែល​សមត្ថកិច្ច​ចាប់​បាន​ក្នុង​កា​មេរ៉ា​សុវត្ថិភាព​ស្រាប់ ។ ក្រុម​នេះ​ភាគច្រើន​ប្លន់​នៅ​ពេល​យប់ និង​ប្លន់​តាម​ស្ថានីយប្រេងឥន្ធនៈ ខណៈ​ជន​រង​គ្រោះ​ចូល​ទៅ​ចាក់​សាំង ។

លោក ប៉ុ​ល រតនា បន្ត​ថា យោង​តាម​ចម្លើយ​សារភាព​របស់​ជនសង្ស័យ​ឈ្មោះ កែវ សា​រិ​ន សមត្ថកិច្ច​អាច​ចាត់ទុកជា​ផ្លូវការ​បាន បើ​ទោះជា​ការ​ចង្អុលបង្ហាញ​ទីតាំង​ធ្វើ​សកម្មភាព មានការ​ខុស ឬ​ក៏​ប្រែប្រួល​យ៉ាង​ណា​ក្តី វា​ពិតជាស៊ីសង្វាក់​ទៅ​និង​អំពើ​លួច ប្លន់​ប្រដាប់​អាវុធ​របស់​ក្រុម​នោះ​មែន ។ ចម្លើយ​ដែល​ថា តួលេខ​លួច​និង​ប្លន់​ម៉ូតូ​កន្លង​មក​ជាង​៣៥០​លើក គឺ​មិន​ខុស​ទេ បើ​បូក​មែនទែន​ទៅ​អាច​ដល់​ទៅ​ជាង​៣៨០​លើក​ឯណោះ ។

គ្រាន់តែ​ពាក្យបណ្តឹង​របស់ជន​រង​គ្រោះ បាន​ដាក់​ចូល​ទៅ​នាយកដ្ឋាន​នគរបាល​ព្រហ្មទណ្ឌ​ជិត​២០​នាក់ ចុះ​នៅ​តាម​បណ្តាប៉ុស្តិ៍ និង​ខណ្ឌ​ទាំង​១២​ក្នុង​រាជធានី​ភ្នំពេញ ទៀត ដូច្នេះ​តួលេខ​តាម​ចម្លើយ​ជនសង្ស័យ​នោះ​ប្រហែលជា​មិន​ខុស​ទេ ។ ជនសង្ស័យ​ឈ្មោះ កែវ សា​រិ​ន និង​វត្ថុ​តាង​កាំភ្លើងខ្លី​ម៉ាក​រូ​ឡូ​១​ដើម និង​ម៉ូតូ​១​គ្រឿង ត្រូវ​បាន​កសាង​សំណុំរឿង​បញ្ជូន​ទៅ​សាលាដំបូង​រាជធានី​ភ្នំពេញ ៕ ​

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ