ទីក្រុងប្រ៊ុចសែល ៖ គណៈកម្មាធិការអឺរ៉ុបបានប្រកាសកាលពីថ្ងៃចន្ទមកថា ពួកគេចង់ស្នើឲ្យបើកការចរចាជាមួយសហរដ្ឋអាមេរិកដើម្បីដោះស្រាយជម្លោះការនាំចេញសាច់គោមិនចាក់អ័រម៉ូនដើម្បីកាត់បន្ថយភាពទានតឹងក្នុងតំបន់ ។
សហភាពអឺរ៉ុប (EU) និងសហរដ្ឋអាមេរិកមានជម្លោះនៅអង្គការពាណិជ្ជកម្មពិភពលោក (WTO) លើការនាំចេញសាច់គោអាមេរិកដែលមានអ័រម៉ូនជំរុញការលូតលាស់អស់រយៈពេលជាយូរមកហើយ ។
ក្នុងសំណើទៅកាន់ក្រុមប្រឹក្សាអឺរ៉ុប គណៈកម្មាធិការខាងលើចង់ផ្ទេរកូតាមួយចំនួនទៅកាន់សហរដ្ឋអាមេរិកដើម្បីនាំចេញសាច់គោខ្លួន ។ ក្នុងពេលបច្ចុប្បន្ននេះ EUដាក់កូតានាំចូលសាច់គោដែលមិនមានចាក់អ័រម៉ូនតែ៤,៥ម៉ឺនតោនប៉ុណ្ណោះពីប្រទេសដទៃដែលរួមមានសហរដ្ឋអាមេរិកផងដែរ ។
លោក Phil Hogan គណៈកម្មការទទួលបន្ទុកផ្នែកកសិកម្មអឺរ៉ុបបាននិយាយថា ៖«សំណើទៅកាន់ក្រុមប្រឹក្សានេះ គណៈកម្មាធិការបានសម្រចការសន្យាកាលពីដើមឆ្នាំនេះក្នុងការដោះស្រាយកង្វល់មួយចំនួនដែលលើកឡើងដោយសហរដ្ឋអាមេរិក ទាក់ទិននឹងកូតាដែលកំពុងមានប្រសិទ្ធភាពតាមរយៈដំណោះស្រាយដែលអាចធ្វើឲ្យភាគីទាំងសងខាងពេញចិត្ត និងស្របតាមវិធានរបស់ WTO »។
លោកបានបន្ថែមថា ៖« ធ្វើដូច្នេះ ពួកយើងក៏ចូលរួមក្នុងការកាត់បន្ថយភាពតានតឹងក្នុងតំបន់អាត្លង់ទិច ស្របទៅនឹងកិច្ចព្រមព្រៀងដែលបានសម្រេចដោយលោកប្រធានJunckerកាលពីខែកក្កដាផងដែរ »។
គណៈកម្មការខាងលើបានបញ្ជាក់ទៀតថា កូតាលើការនាំចូលសាច់គោនេះ នឹងរក្សាត្រឹមកម្រិតដដែល ហើយការសម្រេចចិត្តនេះនឹងមិនប៉ះពាល់ដល់សុវត្ថិភាពអាហារ និងស្តង់ដាសុខភាពអឺរ៉ុបឡើយ ៕
ចែករំលែកព័តមាននេះ