រាជធានីភ្នំពេញ ៖ បុរសម្នាក់អាយុ៤៤ឆ្នាំ ត្រូវបានគេប្រទះឃើញដេកស្លាប់ផ្កាប់មុខទាំងអាក្រាតកាយ នៅលើគ្រែពូកក្នុងផ្ទះសំណាក់យីហោB៩ ដោយសារជំងឺគាំងបេះដូង ក្រោយពីរូបគាត់ជិះម៉ូតូមួយគ្រឿងឌុបនារីវ័យក្មេងម្នាក់ ចូលមកស្នាក់មួយរយៈពេលខ្លី ដែលជាការជួលដើម្បីរួមរ័កស្នេហា និងទាល់តែនាងចេញទៅវិញបាត់ ហើយបុគ្គលិកឡើងទៅមើល ទើបបង្កឱ្យមានការភ្ញាក់ផ្អើលឡើង ។
ហេតុការណ៍នេះ កើតឡើងកាលពីវេលាម៉ោង០២ និង៣០នាទីរសៀលថ្ងៃទី៣ កញ្ញា នៅផ្ទះសំណាក់ខាងលើដែលមានទីតាំងនៅផ្លូវលេខ៨៦ ខាងកើតវិហារអ៊ិស្លាមបឹងកក់ ក្នុងសង្កាត់ស្រះចក ខណ្ឌដូនពេញ ។ តាមប្រភពពីនគរបាលឱ្យដឹងថា បុរសដែលស្លាប់នេះឈ្មោះ ជំុ ពៅ ស្នាក់នៅផ្ទះលេខ១១៥ ផ្លូវលេខ១១០ ភូមិព្រែកតារ័ត្ន ឃុំពោធិ៍បាន ស្រុកកោះធំ ខេត្តកណ្តាល ។
មុនពេលកើតហេតុ វេលាម៉ោង១០និង១០នាទីព្រឹកថ្ងៃទី៣ កញ្ញា គាត់បានជិះម៉ូតូហុងដា សេ១២៥ ពាក់
ផ្លាកលេខភ្នំពេញ ១GD-៤៣៥៥ ដឹកនារីវ័យក្មេងម្នាក់ ចូលមកជួលបន្ទប់ផ្ទះសំណាក់ខាងលើ ក្នុងរយៈពេលខ្លីប៉ុណ្ណោះ ។
តាមប្រភពដដែលឱ្យដឹងទៀតថា មួយសន្ទុះក្រោយមក ស្រាប់តែគេបានឃើញនារីវ័យក្មេងម្នាក់នោះ ចេញទៅវិញបាត់ នៅតែបុរសរូបនោះម្នាក់ឯងនៅក្នុងបន្ទប់ផ្ទះសំណាក់ ។ ក្រោយពីស្ត្រីវ័យក្មេងម្នាក់នោះ ចេញទៅបាត់ ដោយមានការសង្ស័យ ទើបបុគ្គលិកផ្ទះសំណាក់ឡើងទៅមើលនៅក្នុងបន្ទប់ខាងលើ ស្រាប់តែឃើញបុរសម្នាក់នោះដេកស្លាប់ផ្កាប់មុខនៅលើគ្រែពូក ទាំងអាក្រាតកាយ ទើបមានការភ្ញាក់ផ្អើលឡើង និងរាយការណ៍ទៅសមត្ថកិច្ចមូលដ្ឋានឱ្យបានដឹងពីរឿងនេះ ។
ក្រោយពេលកើតហេតុ កម្លាំងមានសមត្ថកិច្ចខណ្ឌដូនពេញ និងមន្ត្រីជំនាញបានមកពិនិត្យកន្លែងកើតហេតុនិងធ្វើកោសល្យវិច័យសពបង្ហាញថា «បុរសរងគ្រោះស្លាប់ដោយជំងឺគាំងបេះដូង» និងសន្និដ្ឋានថា ទំនងជាបុរសរូបនេះប្រើប្រាស់ថ្នាំបំប៉នផ្លូវភេទផងដែរ ទើបបណ្តាលឱ្យស្លាប់បែបនេះ ។ សពត្រូវបានដឹកយកទៅតម្កល់ទុកនៅវត្តស្ទឹងមានជ័យ ដើម្បីរង់ចាំក្រុមគ្រួសារមកទទួលយកទៅធ្វើបុណ្យតាមប្រពៃណី ។
នេះជាព័ត៌មានមួយ សម្រាប់បុរសទូទៅដែលអ្នកលេងហ្វេសប៊ុកតែងនិយាយថា «កុំចេះតែហ៊ាន» ខណៈការផ្សព្វផ្សាយថ្នាំជំនួយផ្លូវភេទ មានការផុលផុសនៅតាមបណ្តាញសង្គមហ្វេសប៊ុក ។ ដូច្នេះ សម្រាប់បុរសដែលអសមត្ថភាពផ្លូវភេទ មិនគួរប្រថុយប្រើថ្នាំទាំងនោះ ដោយខ្វះការពិចារណាឡើយ ៕
ចែករំលែកព័តមាននេះ