រាជធានីភ្នំពេញ៖ កន្លងមកមហាជនតែងតែមានជំនឿថា គូសង្សារ ឬប្តីប្រពន្ធ បើនាំគ្នាទៅលេងវត្តភ្នំនោះប្រាកដជានិរាសព្រាត់ប្រាសគ្នាជាក់ជាមិនខានឡើយ ។ អបិយជំនឿនេះ តៗគ្នាជាយូរលង់មកហើយ ។ មកដល់សម័យទំនើបជឿនលឿនបច្ចុប្បន្ន…
រាជធានីភ្នំពេញ៖ កន្លងមកមហាជនតែងតែមានជំនឿថា គូសង្សារ ឬប្តីប្រពន្ធ បើនាំគ្នាទៅលេងវត្តភ្នំនោះប្រាកដជានិរាសព្រាត់ប្រាសគ្នាជាក់ជាមិនខានឡើយ ។ អបិយជំនឿនេះ តៗគ្នាជាយូរលង់មកហើយ ។ មកដល់សម័យទំនើបជឿនលឿនបច្ចុប្បន្ន តើអបិយជំនឿនេះមហាជននៅតែជឿ ឬយ៉ាងណា ?
នាពេលបច្ចុប្បន្នរមណីយដ្ឋានវត្តភ្នំពេញបានប្រែក្លាយជាកន្លែងសម្រាប់ភ្ញៀវទេសចរ និងមហាជនទូទៅបន់ស្រន់សុំសេចក្តីសុខ ជាជាងទៅកម្សាន្ត ។
ជាការកត់សម្គាល់ យុវវ័យភាគច្រើននាសម័យនេះ មិនជឿទៅលើអបិយជំនឿគូស្នេហ៍ទៅលេងវត្តភ្នំបែកបាក់គ្នាទេ ប៉ុន្តែអ្នកខ្លះនៅតែមិនហ៊ានប្រមាថឡើយ ពោលគឺពួកគេមិនហ៊ាននាំគ្នាទៅលេងកម្សាន្តជាគូទេ ។
កាលពីពេល ថ្មីៗកន្លងមក ស្រីតុ អាយុ២៣ឆ្នាំជាកម្មការិនីធ្វើការនៅរោងចក្រមួយក្នុងរាជធានីភ្នំពេញនិយាយថា នាងធ្លាប់លឺពាក្យគេនិយាយ តៗគ្នាអំពីបញ្ហានេះដែរ ដូច្នេះហើយនាងខ្លាចរអាក្នុងការនាំមនុស្សជាទីស្រឡាញ់ទៅកម្សាន្តនៅវត្តភ្នំ ។ ទោះជាយ៉ាងណាក្តីនាងយល់ថា រហូតមកដល់ពេលបច្ចុប្បន្នជំនឿនេះហាក់មិនមានការសាយភាយដូចមុនទៀតឡើយ ហើយទំនងជាមិនមានភាពសក្តិសិទ្ធិដូចពាក្យគេនិយាយ តៗគ្នានោះឡើយ ។
ចំណែកលោកសេង វិចិត្រ ជាអ្នកបម្រើការងាររដ្ឋឲ្យដឹងដែរថា លោកធ្លាប់បានលឺអបិយជំនឿមួយនេះ ប៉ុន្តែលោកមិនប្រាកដពីការកើតឡើងនូវរឿងព្រាត់ប្រាសគ្នាពេលទៅលេងវត្តភ្នំពិតឬយ៉ាងណានោះឡើយ ។ បើតាមលោកវិចិត្រ សម្រាប់ទស្សនៈលោកផ្ទាល់ជំនឿនេះវាគ្រាន់តែជាការកតសម្គាល តៗគ្នាប៉ុណ្ណោះ ហើយសម្រាប់លោកគឺហាក់មិនជឿអបិយជំនឿនេះឡើយ ។ លោកធ្លាប់ទៅលេងវត្តភ្នំ និងបានចូលបន់ស្រន់សុំសេចក្តីនៅទីនោះបាន២ទៅ៣ដងដែរ ហើយលោកក៏មិនបានឃើញមានរឿងអ្វីកើតឡើង ជាមួយសង្សាររបស់លោកទេ ។
ទោះជាយ៉ាងណាក្តីបច្ចុប្បន្នលោកសេង វិចិត្រ មិនសូវជាបានទៅទីនោះទៀតទេ ដោយសារតែលោក និងសង្សារនិយមទៅដើរកម្សាន្តនៅផ្សារទំនើប និងការណាត់គ្នាមើលកុនប៉ុណ្ណោះ ។
រស់ ចាន់នីកា ជាសិស្សរៀននៅវិទ្យាល័យមួយក្នុងរាជធានីភ្នំពេញឲ្យដឹងថា រហូតមកដល់ពេលនេះនាងនៅតែជឿលើអបិយជំនឿនេះ ព្រោះនាងមានមិត្តភក្ដិបានជួបរួចហើយ។ មិត្តភក្តិរបស់នាងធ្លាប់មានសង្សារពីរនាក់ នាំទៅលេងនៅវត្តភ្នំ ហើយបែកទាំងពីរនាក់ ដោយមិនដឹងថាមូលហេតុដូចនេះហើយ ។ ដូច្នេះហើយមិត្តនាងមានគូស្នេហ៍ថ្មីនាពេលនេះ សូម្បីតែជិះកាត់វត្តភ្នំក៏មិនហ៊ានដែរព្រោះខ្លាចបែកគ្នាដូចអ្នកមុន ។
លោកវ៉ាន់ សាលី អាយុជាង៤០ឆ្នាំបានមានប្រសាសន៍ថា ថ្វីដ្បិតគាត់ជាអ្នករស់នៅភ្នំពេញមែន តែមិនសូវបានទៅលេងនៅរមណីយដ្ឋានវត្តភ្នំឡើយ ។ ភាគច្រើនដែលគាត់ទៅទីនោះគឺដោយសារគាត់នាំកូនទៅលេងនៅសួនកុមារដែលនៅក្បែរវត្តភ្នំ ហើយពេលខ្លះក៏បង្ហួសទៅអង្គុយលេងនៅបង់វត្តភ្នំដើម្បីស្រូបយកខ្យល់អាកាស។ លោកលីបញ្ជាក់ថា ចំពោះអបិយជំនឿដែលនិយាយ តៗគ្នាលោកក៏ធ្លាប់បានឮដែរ តែលោកមិនហ៊ានអះអាងថាវាជាការណ៍ពិត ឬយ៉ាងណាទេ ។
តាមគំនិតរបស់លោកអបិយជំនឿនេះប្រហែលជាចេញមកដោយការកត់សម្គាល់របស់មនុស្សមួយចំនួនដែលពេលខ្លះវាបានកើតឡើងដូចពាក្យដែលគេនិយាយប្រាកដមែន ហេតុនេះគេមានជំនឿ តៗគ្នាមកតែម្តង ។ សម្រាប់រូបលោកគឺគ្រាន់តែគិតថាទីនោះគឺជារមណីយដ្ឋានប្រវត្តិសាស្ត្រសម្រាប់រាជធានីភ្នំពេញដែលអាចទាក់ទាញភ្ញៀវជាតិ និងអន្តរជាតិទៅកម្សាន្ត ហើយសាលារាជធានីភ្នំពេញបានខិតខំកែលំអសោភ័ណភាពឱ្យកាន់តែស្រស់ស្អាត ព្រោះទីនោះជានិមិត្តរូបនៃរាជធានីភ្នំពេញ ។ ចំពោះរឿងអបិយជំនឿ ផ្សេងៗនោះលោកមិនសូវជាយកចិត្តទុកដាក់ឡើយ តែសម្រាប់អ្នកដែលមានជំនឿគឺជារឿងផ្ទាល់ខ្លួនរបស់គេមិនអាចហាមឃាត់បានឡើយ ។
ទាក់ទិននឹងអបិយជំនឿថាគូស្នេហ៍ទៅលេងនៅវត្តភ្នំនឹងព្រាត់ប្រាស់គ្នានេះ ព្រះតេជគុណព្រះនាមបុណ្យ គង់នៅវត្តមួយក្នុងរាជធានីភ្នំពេញ ធ្លាប់មានសង្ឃដីកាថា បញ្ហាអបិយជំនឿនេះព្រះអង្គធ្លាប់បានឮគេនិយាយ តៗគ្នាមកដែរ ហើយបើនិយាយថា វាជាការណ៍ពិត ឬយ៉ាងណានោះគឺជាការយល់ឃើញរបស់បុគ្គល ម្នាក់ៗប៉ុណ្ណោះ ។
ព្រះសង្ឃដដែលមានសង្ឃដីកាថា «ចំពោះអាត្មាយល់ថា អបិយជំនឿនេះមិនមែនជាការណ៍ពិតឡើយ ដោយហេតុថាបើយើងនិយាយតាមផ្លូវព្រះពុទ្ធសាសនាគឺការព្រាត់ប្រាសគ្នានេះជាឧបនិស្ស័យ ព្រោះផលបុណ្យកុសលដែលយើងបានសាងពីជាតិមុនគឺបានតែប៉ុណ្ណឹង ហេតុនេះការជួប ឬព្រាត់ គឺជារឿងធម្មជាតិរបស់សត្វលោក ហើយបើនិយាយថា ព្រះមានចិត្តពង្រាត់សត្វលោកនោះគឺមិនមែនជាការណ៍ពិតឡើយ »។
តាមប្រវត្តិនិទានថាក្នុងគ្រឹស្តសករាជ១៣៧២ (ឯកសារខ្លះថា ១៣៧៨) ដូនពេញដែលជាស្ត្រីមេម៉ាយមានទ្រព្យសម្បត្តិស្តុក និងអ្នកស្រុកបានស្រុះស្រួលគ្នាសាងសង់ព្រះវិហារមួយខ្នងលើកូនភ្នំនៃវត្តភ្នំសព្វថ្ងៃនេះដែលកើតដោយសារគាត់ឱ្យគេជញ្ជូនដីពូន ហើយដង្ហែព្រះពុទ្ធរូប៤អង្គ ដែលនៅក្នុងដើមគគីរ ស្រង់យកមកពីក្នុងទឹកទន្លេទៅតម្កល់នៅទីនោះ ។ ដោយហេតុនោះហើយទើបភ្នំនោះហៅថា «ភ្នំដូនពេញ» និងក្លាយនៅត្រឹម«ភ្នំពេញ» ឯទីអារាមនៅទីនោះហៅត្រឹម«វត្តភ្នំ»មកដល់សព្វថ្ងៃនេះ ។
អ្នកវប្បធម៌ជាច្រើនយល់ដូចគ្នាថា វត្តភ្នំជាកន្លែងសក្ការបូជានៃពុទ្ធសាសនា ដូច្នេះមិនមែនជាកន្លែងបំផ្លិចបំផ្លាញសុភមង្គល ឬស្នេហារបស់នរណាម្នាក់ឡើយ ។ ម្យ៉ាងយាយពេញជាអ្នកគោរព និងទ្រទ្រង់ព្រះពុទ្ធសាសនា ដូច្នេះគាត់ពិតជាគ្មានចិត្តអកុសលបំបែកគូស្នេហ៍នរណាទេ ៕
ចែករំលែកព័តមាននេះ