រាជធានីភ្នំពេញ ៖ គណបក្សនយោបាយចំនួន២ ក្នុងចំណោមគណបក្សនយោបាយ ផ្សេងទៀត ដែលបានចួលរួមប្រកួតការបោះឆ្នោតឆ្នាំ២០១៨ បានបង្ហាញការសាទរចំពោះកីឡាករ-កីឡាការិនីកម្ពុជា ដែលបានឈ្នះមេដាយមាស ក្នុងការប្រកួតកីឡាអាស៊ី (Asian Games) លើកទី១៨ នៅប្រទេសឥណ្ឌូនេស៊ី កាលពីពេលថ្មីៗនេះ។
លោក ពេជ្រ ស្រស់ ប្រធានគណបក្សយុវជនកម្ពុជា បានឲ្យដឹងនៅព្រឹកថ្ងៃទី០៤ កញ្ញា នេះថា រូបលោកបានសាទរចំពោះជោគជ័យរបស់កីឡាករ-កីឡាការនីទាំង២នាក់នេះ តាំងពីដំបូងមកម្លេះ។ លោកបានបញ្ជាក់ថា«ជ័យជម្នះរបស់កីឡាករ-កីឡាការនីទាំង២នាក់នេះ បានធ្វើឲ្យប្រទេសកម្ពុជា មានភាពល្បីល្បាញ លើឆាកអន្ដរជាតិ ជាពិសេសលើកមុខមាត់កម្ពុជា នៅលើឆាកអន្តរជាតិផងដែរ»។
ចំណែកលោក សាម អ៊ីន អ្នកនាំពាក្យគណបក្សប្រជាធិបតេយ្យមូលដ្ឋាន ក៏បានសរសេរលើបណ្តាញសង្គមហ្វេសប៊ុក ដោយបង្ហាញការសាទរចំពោះជោគជ័យរបស់កីឡាករ-កីឡាការនីកម្ពុជា ដែលឈ្នះមេដាយមាសនេះដែរ។ លោក សាម អ៊ី បានសរសេរនៅលើហ្វេសប៊ុករបស់លោកថា «ចូលរួមសាទរដល់កញ្ញា ខាន់ ចេសា និងលោក សាលី អ៊ូមើត ដែលបាននាំមេដាយមាស២ និងសំរឹទ្ធ១ ដល់កម្ពុជា ពីការប្រកួតកីឡា Asian Games។
នេះជាការផ្តល់មោទនភាពជាតិមួយដែលខ្មែរយើងខ្វះ ខាតយ៉ាងខ្លាំងក្រោយសម័យអង្គរ“។ សូមជម្រាបថា ការប្រកួតកីឡាអាស៊ី បានចាប់ផ្តើមធ្វើឡើង ពីថ្ងៃទី១៨ ខែសីហា ដល់ថ្ងៃទី០២ ខែកញ្ញា ដែលឥណ្ឌូនេស៊ីធ្វើជាម្ចាស់ផ្ទះ កម្ពុជាបានបញ្ជូនកីឡា ១៣ប្រភេទទៅចូលរួមប្រកួត។
ក្នុងចំណោមប្រភេទកីឡាទាំង១៣ប្រភេទនេះ កម្ពុជាដណ្ដើមបានមេដាយមាស២ និងសំរឹទ្ធ១ លើប្រភេទកីឡាម៉ូតូទឹក ដោយកីឡាករ សាលី អ៊ូមើត ឈ្នះមេ ដាយមាស១ និងសំរឹទ្ធ១ និងកីឡាការិនី ខាន់ ចេសា ដណ្តើមបានមេដាយមាស១ លើវិញ្ញាសាកីឡាជឺជិ តស៊ូ។
សម្ដេចតេជោ ហ៊ុន សែន បានបញ្ជាក់ថា ការដណ្តើមបានមេដាយមាសរបស់កីឡាករ សាលី អ៊ូមើត និងកញ្ញា ខាន់ ចេសា ពីការប្រកួតក្នុងព្រឹត្តិការណ៍កីឡាអាស៊ីលើកទី១៨ នៅប្រទេស ឥណ្ឌូនេស៊ី នាពេលនេះគឺជាការបំបែកកំណត់ត្រាជាប្រវត្តិសាស្ត្រថ្មីមួយទៀតសម្រាប់កម្ពុជាក្នុងរយៈពេល៦៤ឆ្នាំ ចាប់តាំងពីបានចូលរួមប្រកួតកីឡាប្រចាំទ្វីបអាស៊ីមួយនេះនាឆ្នាំ១៩៥៤ក ន្លងមក៕
ចែករំលែកព័តមាននេះ