រាជធានីភ្នំពេញ ៖ លោក នុត ពុធដារ៉ា ជំនួយការសម្ដេចអគ្គមហាសេនាបតីតេជោហ៊ុន សែន និងជាអភិបាលនៃគណៈអភិបាលខណ្ឌដង្កោ បានដឹកនាំមន្ត្រីក្រោមឱវាទអញ្ជើញចុះសំណេះសំណាល និងសាកសួរសុខទុក្ខ…
រាជធានីភ្នំពេញ ៖ លោក នុត ពុធដារ៉ា ជំនួយការសម្ដេចអគ្គមហាសេនាបតីតេជោហ៊ុន សែន និងជាអភិបាលនៃគណៈអភិបាលខណ្ឌដង្កោ បានដឹកនាំមន្ត្រីក្រោមឱវាទអញ្ជើញចុះសំណេះសំណាល និងសាកសួរសុខទុក្ខ បងប្អូនប្រជាពលរដ្ឋ ព្រមទាំងត្រួតពិនិត្យមើលផ្លូវបេតុង និងប្រព័ន្ធលូបង្ហូរទឹក ដែលទើបស្ថាបនាហើយរួចរាល់ជាស្ថាពរកាលពីពេលថ្មីៗកន្លងមកនេះផងដែរ។ ពិធីនោះបានប្រព្រឹត្តទៅកាលពី ព្រឹកថ្ងៃច័ន្ទ ៨រោច ខែស្រាពណ៍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៣ ខែកញ្ញា ឆ្នាំ២០១៨ នៅក្នុងភូមិបុរីកម្មករ សង្កាត់ជើងឯក ខណ្ឌដង្កោ រាជធានីភ្នំពេញ។
នៅក្នុងឱកាសជួបសំណេះសំណាល នោះលោកអភិបាលខណ្ឌដង្កោបានពាំនាំយកនូវការផ្តាំផ្ញើរការសាកសួរសុខទុក្ខពីសំណាក់សម្តេចតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ដែលជានិច្ចកាលសម្តេចទាំងទ្វេរ បានគិតគូរ និងយកចិត្តទុកដាក់ ចំពោះការលំបាកបញ្ហាប្រឈម និងតម្រូវការនានា របស់បងប្អូនទាំងអស់។ មិនតែប៉ុណ្ណោះលោកបានណែនាំដល់ បងប្អូនប្រជាពលរដ្ឋទាំងអស់សូមថែរក្សាសុខភាពឲ្យបានល្អគឺ ផឹកស្អាត ហូបស្អាត និងរស់នៅស្អាត ប្រកបដោយអនាម័យ ខ្ពស់ដើម្បីរស់នៅយូរអង្វែងមើលការអភិវឌ្ឍន៍ជឿនលឿន និងរីកចម្រើនឥតឈប់ឈរ របស់ប្រទេសជាតិ ក្រោមដំបូលសុខសន្តិភាពដែលផ្ដើមចេញពីនយោបាលឈ្នះឈ្នះ របស់រាជរដ្ឋាភិបាលសព្វថ្ងៃ។
លោកអភិបាលខណ្ឌបានថ្លែងបន្តថា បងប្អូនត្រូវចូលរួមអនុវត្តន៍គោលនយោបាយភូមិឃុំមានសុវត្ថិភាព និងអប់រំកូនចៅឲ្យចៀសឆ្ងាយពីគ្រឿងញៀន និងអំពើអបាយមុខផ្សេងៗផងដែរ។ ទន្ទឹមនឹងនេះលោកក៏បាន ថ្លែងអំណរគុណយ៉ាងជ្រាលជ្រៅ ចំពោះបងប្អូនប្រជាពលរដ្ឋដែលបាន បោះឆ្នោតគាំទ្រគណបក្សប្រជាជនកម្ពុជា ឲ្យទទួលបានជ័យជម្នះយ៉ាងភ្លូកទឹកភ្លូកដី ក្នុងការបោះឆ្នោតជ្រើសតាំងតំណាងរាស្ត្រក្នុងពេលកន្លងទៅ។
ក្នុងខណៈនោះលោកក៏បានទទួលយកសំណើ និងសំណូមពររបស់បងប្អូនប្រជាពលរដ្ឋដើម្បីដោះស្រាយជូន មិនតែប៉ុណ្ណោះលោកក៏បានផ្តាំផ្ញើដល់មន្ត្រីក្រោមឱវាទទាំងអស់ឲ្យខិតខំយកចិត្តទុកដាក់បម្រើសេវាជូនប្រជាពលរដ្ឋឲ្យបានកាន់តែល្អប្រសើរទ្វេដងថែមទៀត ស្របតាមអនុសាសន៍ដ៏ខ្ពង់ខ្ពស់ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ដោយឡែកបងប្អូនប្រជាពលរដ្ឋក្នុងភូមិបុរីកម្មករ ក៏បានថ្លែងអំណរគុណយ៉ាងជ្រាជ្រៅបំផុតជូនចំពោះសម្តេចតេជោ នាយករដ្ឋមន្ត្រី និងលោកអភិបាលរាជធានី ភ្នំពេញ ព្រមទាំងអាជ្ញាធរខណ្ឌ សង្កាត់ ភូមិ ដែលបានគិតគូរពីការលំបាករបស់ប្រជាពលរដ្ឋទាំងអស់។
ដោយបានការផ្លូវបេតុង និងប្រព័ន្ធលូថ្មីនេះ បានជួយសម្រួលដល់ការរស់នៅរបស់ពួកគាត់យ៉ាងច្រើន ជាពិសេសសម្រួលដល់ការធ្វើដំណើរ បញ្ចៀសការលិចលង់នៅពេលភ្លៀង មានសោភ័ណភាពក្នុងការរស់នៅ និងប្រកបរបរចិញ្ចឹមជីវិត ដែលពីមុនផ្លូវនេះជាផ្លូវដី និងមានទឹកលិចនៅពេលមានភ្លៀងធ្លាក់ម្តងៗ ពិបាករស់នៅ ព្រមទាំងលំបាកក្នុងការធ្វើដំណើរទៀតផង៕
ចែករំលែកព័តមាននេះ