ខេត្តកំពង់ចាម ៖ ហ្វូងគោញីឈ្មោលតូចធំជាង១០ក្បាលត្រូវបានម្ចាស់ដឹកមកចង និងខ្លះព្រលែងដោយមិនបានចងខ្សែឲ្យស៊ីស្មៅបែបអនាធិបតេយ្យនៅក្រោយរបងមន្ទីរវប្បធម៌ និងវិចិត្រសិល្បៈខេត្តក្នុងសង្កាត់កំពង់ចាម ក្រុងកំពង់ចាម នាព្រឹកថ្ងៃទី០៤ កញ្ញា ដែលប្រការនេះត្រូវបានអាជ្ញាធរហាមឃាត់មិនឲ្យកើតមាននោះទេ ព្រោះថាក្រុងកំពង់ចាមក្នុងចលនាប្រលងប្រណាំងទីក្រុងស្អាតទូទាំងប្រទេសបានរំដួលចំនួន៣ទងតម្រូវឲ្យមានការចូលរួមថែរក្សាឲ្យមានបរិស្ថានស្អាតទាំងអស់គ្នា ។
មន្ត្រីនគរបាលប៉ុស្តិ៍កំពង់ចាមឲ្យដឹងថា កន្លងទៅថ្មីៗនេះមានគោដែលម្ចាស់មិនបានចងខ្សែនោះទេដោយបានដើររហូតដល់ចំណតរថយន្តក្រុងកំពង់ចាមពេលដែលឃើញបែបនេះសមត្ថកិច្ចបានដេញចេញមកក្រៅវិញ និងបានចាប់ចងទុកនៅប៉ុស្តិ៍ដោយបានធ្វើការអប់រំដល់ម្ចាស់គោ១ក្បាលនោះមិនត្រូវបណ្តែតបណ្តោយឲ្យមានបែបនេះបន្តទៀតឡើយ ។
លោក ប្លោក សុវណ្ណ ចៅសង្កាត់កំពង់ចាមប្រាប់ឲ្យដឹងថា ក្នុងចំណោមគោមួយហ្វូងដែលមានជាង១០ក្បាលត្រូវបានម្ចាស់យកមកឲ្យស៊ីស្មៅពាសវាលនៅកោះពេជ្រក្រោយមន្ទីរវប្បធម៌នោះសមត្ថកិច្ចបានរាយការណ៏មករូបលោកថា មានគោ៣ក្បាលដែលម្ចាស់ត្រូវបានស្គាល់ហើយ និងបានធ្វើការអប់រំក្នុងជំហានដំបូងមិនឲ្យមានបន្តទៀតទោះទេ បើពុំនោះនឹងចាប់ផាកពិន័យ ។
លោក ចាន់ ផល្លី អភិបាលក្រុងកំពង់ចាមប្រាប់ឲ្យដឹងដែរថា កន្លងមកនៅក្នុងសង្កាត់សំបួរមាស និងសង្កាត់វាលវង់ មានគោរបស់ពលរដ្ឋត្រូវបានម្ចាស់មិនបានមើលថែទាំឲ្យបានដិតដល់ និងបានព្រលែងឲ្យដើរពាសវាលពាសកាលចូលក្នុងក្រុងកំពង់ចាមក្នុងជំហានដំបូងត្រូវបានពិន័យក្នុង១ក្បាលចំនួន៥ម៉ឺនរៀលមិនរាងចាលលើកទី២ចំនួន១០ម៉ឺនរៀល លើកទី៣មានដល់ទៅ២០ម៉ឺនរៀលដោយសារតែមិនរាងចាលនោះ ។
លោកអភិបាលក្រុងកំពង់ចាមប្រាប់បន្តថា ក្រោយពីបានប្រើវិធានការក្តៅម្ចាស់គោ និងពពែមួយចំនួនធំបានយកចិត្តទុកដាក់ដោយចិញ្ចឹមគោដាក់ក្នុងក្រោលត្រឹមត្រូវព្រោះថា ក្នុងចលនាប្រលងប្រណាំងទីក្រុងស្អាតក្រុងកំពង់ចាមបានទទួលរំដួលចំនួន៣ទង ។ ដូច្នេះទាមទារឲ្យមានការចូលរួមពីពលរដ្ឋគ្រប់ស្រទាប់ជាន់ថ្នាក់ត្រូវតែចូលរួមសំអាតក្រុងឲ្យមានបរិស្ថានស្អាតដើម្បីទាក់ទាញភ្ញៀវជាតិ និងអន្តជាឲ្យមកកម្សាន្តលេងនៅក្រុងកំពង់ចាម ៕
ចែករំលែកព័តមាននេះ