ប្រទេសជប៉ុន៖ បើតាមទីភ្នាក់ងារឧតុនិយមជាតិជប៉ុន បានរាយការណ៍ឱ្យដឹងថា ព្យុះយ៉ាងខ្លាំងបំផុតមួយបានវាយប្រហារដោយផ្ទាល់លើប្រទេសជប៉ុនពុំធ្លាប់មានចាប់តាំងពី២៥ឆ្នាំមកហើយ ដែលនាថ្ងៃទី៤ កញ្ញា នេះ បោកបក់ដល់តំបន់ឆ្នេរសមុទ្ររបស់ខ្លួនជាមួយរលកយ៉ាងធំៗ។
ព្យុះទីហ្វុង JEBI គឺជាព្យុះទី២១ ប្រចាំរដូវនៅអាស៊ី បានបោកបក់លើទីក្រុងតូគូស៊ីម៉ាលើកោះស៊ីកូគូ ភាគនិរតីជប៉ុន។ ហើយព្យុះ JEBI នេះបានធ្វើឲ្យស្ទះដល់ការដឹកជញ្ជូន ព្រមទាំងសកម្មភាពរបស់បណ្ដាសហគ្រាសនានា។ ហើយវាបានបោកបក់យ៉ាងលឿនបំផុត ដោយបន្តសំដៅទៅភាគខាងជើង បន្ទាប់មកបោកបក់កាត់ភាគខាងលិចនៃកោះធំហុនស៊ូ។ ព្យុះនេះ តាមកន្លែងខ្លះបោកបក់ក្នុងល្បឿនដល់ទៅ២២០គីឡូម៉ែត្រក្នុង១ម៉ោង។ រួចនៅភាគកណ្ដាលប្រទេសវាបោកបក់ក្នុងល្បឿនពី១៦០ទៅ១៩០គីឡូម៉ែត្រក្នុង១ម៉ោង។
បើតាមលោករីយូកា គូរូណា អ្នកទទួលខុសត្រូវនៃទីភ្នាក់ងារឧតុនិយមជាតិ បានបញ្ជាក់ថា ព្យុះ JEBI បានចាត់ចូលក្នុងប្រភេទព្យុះដែលខ្លាំងបំផុតពុំធ្លាប់មានចាប់តាំងពីឆ្នាំ១៩៩៣ មក។ ចំណែកភ្លៀងបានធ្លាក់យ៉ាងខ្លាំងដោយសារឥទ្ធិពលព្យុះ រួចប្រជាជនរស់នៅតាមបណ្ដាតំបន់អាចទឹកជន់លិច ឬអាចរងគ្រោះដោយការបាក់ដីហូរភក់ ហើយត្រូវធ្វើតាមការណែនាំជម្លៀសចេញ។
រីឯនាយករដ្ឋមន្ត្រីជប៉ុនលោកស៊ីនហ្សូអាបេ បានលុបចោលការធ្វើដំណើររបស់លោកទៅភាគខាងលិចប្រទេស ហើយកោះហៅធ្វើកិច្ចប្រជុំបន្ទាន់មួយ ដោយនាឱកាសនោះលោកស្នើដល់ប្រជាជនឲ្យត្រៀមរាល់វិធានការដើម្បីការពារខ្លួន៕ វីដេអូឃ្លីបដកស្រង់ចេញពី ៖ AFP
ចែករំលែកព័តមាននេះ