ប្រទេសចិន-អាហ្វ្រិក ៖ ប្រឈមមុខនឹងការរិះគន់នានារបស់ពួកលោកខាងលិច ប្រធានាធិបតីចិន លោកស៊ីជីនពីងកាលពីថ្ងៃទី៣ កញ្ញា បានសន្យាពីការផ្ដល់ជំនួយដោយគ្មានលក្ខខណ្ឌ៦០ពាន់លានដុល្លារដល់អាហ្វ្រិកជាដៃគូសេដ្ឋកិច្ចសំខាន់របស់ក្រុងប៉េកាំង។
ការសន្យានោះរបស់លោកសីុជីនពីងធ្វើពេលចាប់ផ្ដើម វេទិកាលើកទី៧ស្ដីពីកិច្ចសហប្រតិបត្តិការចិន-អាហ្វ្រិក ដែលប្រព្រឹត្តទៅរយៈពេល២ថ្ងៃនៅក្រុងប៉េកាំង ដោយមានការចូលរួមរបស់មេដឹកនាំនៃប្រទេសអាហ្វ្រិកដល់ទៅ៥៣។ការជួបគ្នាកំពូលនេះជាឱកាសសម្រាប់ប្រធានាធិបតីចិន ប្រកាសពីផ្លូវសូតថ្មីៗរបស់លោក។លើកឡើងកាលពីឆ្នាំ២០១៣ ការផ្ដួចផ្ដើមគំនិតនេះ សំដៅពង្រីកការតភ្ជាប់គ្នាខាងពាណិជ្ជកម្មរបស់ចិនជាមួយពិភពលោក ហើយរក្សាសន្តិសុខដល់ការផ្គត់ផ្គង់របស់ខ្លួន។
បច្ចុប្បន្នចិនបានបោះទុនវិនិយោគ ក្នុង១ឆ្នាំៗជាច្រើនពាន់លានដុល្លារនៅអាហ្វ្រិកចាប់តាំងពីឆ្នាំ២០១៥មក ពិសេសក្នុងហេដ្ឋារចនាសម្ព័ន្ធដែលមានផ្លូវថ្នល់ ផ្លូវរថភ្លើង កំពុងផែរហូតដល់ឧទ្យានឧស្សាហកម្ម។ការវិនិយោគទាំងនេះមានការស្វាគមន៍យ៉ាងខ្លាំងរបស់បណ្ដាប្រទេសអាហ្វ្រិក ដែលសង្ឃឹមជំរុញដល់ការអភិវឌ្ឍន៍សេដ្ខកិច្ចរបស់ពួកគេ។
ប៉ុន្តែការផ្ដួចផ្ដើមគំនិតនេះរងការរិះគន់កាន់តែខ្លាំងពីពួកលោកខាងលិច ដែលថានឹងធ្វើឲ្យបំណុលរបស់ប្រទេសមួយចំនួនកាន់តែឡើងខ្ពស់។
ក្នុងសុន្ទរកថាយ៉ាងវែងរបស់លោកបើកការជួបគ្នាកំពូលនោះ លោកសីុជីងពីងថ្លែងនាថ្ងៃទី៣កញ្ញាថា ចិននឹងបង្កើតការផ្ដួចផ្ដើមគំនិតចម្បង៨ ជាមួយបណ្ដាប្រទេសអាហ្វ្រិករយៈពេល៣ឆ្នាំខាងមុខព្រមទាំងបន្ទាប់ពីនេះ និងថាចិនជួយទ្រទ្រង់អាហ្វ្រិកក្នុងការកសាងខ្សែក្រវាត់និងផ្លូវសូត៕
ចែករំលែកព័តមាននេះ