រាជធានីភ្នំពេញ ៖ លោក សាំ ពិសិដ្ឋ នាយកមន្ទីរសាធារណការនិងដឹកជញ្ជូនរាជធានីភ្នំពេញ បានអះអាងថា កំណាត់ផ្លូវលេខ៥៩២តភ្ជាប់ពីស្តុបអតីតរង្វង់មូលទួលគោក ឆ្លងកាត់ភ្លើងស្តុបផ្សារមាន់អាំង និងវិទ្យាល័យឥន្ទ្រទេវី ទៅផ្លូវលេខ៥៩៨ ដែលតែងមានការកកស្ទះចរាចរណ៍នោះ នឹងមិនមានការកកស្ទះដូចមុនទៀតទេ បន្ទាប់ពីបានពង្រីកទទឹង៥ម៉ែត្របន្ថែមទៀត គឺសរុបទទឹង១៤ម៉ែត្រ ធំទូលាយជាងមុន ។
លោកបន្តថា ចំពោះការងារពង្រីកគ្រឹះថ្នល់ខាងក្រោមនិងអ៊ុតកៅស៊ូនាពេលនេះ ទទួលម៉ៅការដោយក្រុមហ៊ុន CCES មានប្រវែង១.៧១០ម៉ែត្រ ទទឹង១៤ម៉ែត្រ ខណៈផ្លូវនេះពីមុនមានទទឹងតែ៩ម៉ែត្រប៉ុណ្ណោះ ដែលត្រូវពង្រីកទទឹង២,៥ម៉ែត្រសងខាងបន្ថែមទៀតគឺសរុប១៤ម៉ែត្រ ចាប់ពីស្តុបអតីតរង្វង់មូលទួលគោក ឆ្លងកាត់ភ្លើងស្តុបផ្សារមាន់អាំងឡើងទៅវិទ្យាល័យឥន្ទ្រទេវី និងភ្ជាប់ទៅផ្លូវលេខ៥៩៨តែម្តង ។ លោកសង្ឃឹមនិងជឿជាក់ថា បន្ទាប់ពីពង្រីកនិងអ៊ុតកៅស៊ូរួច ការធ្វើដំណើរតាមផ្លូវនេះនឹងមិនមាន
ការកកស្ទះចរាចរណ៍ដូចមុនទៀតទេ ប៉ុន្តែសុំឱ្យអ្នកធ្វើដំណើរចូលរួមគោរពច្បាប់ចរាចរណ៍ផងដែរ ។
តំណាងក្រុមហ៊ុនCCES ដែលទទួលម៉ៅការជួសជុលកែលំអផ្លូវនេះបានឱ្យដឹងថា ក្រោយពីទទួលបានគោលការណ៍ណែនាំពីរដ្ឋបាលរាជធានីភ្នំពេញ និងមានការត្រួតពិនិត្យបច្ចេកទេសពីមន្ទីរសាធារណការនិងដឹកជញ្ជូនរាជធានីភ្នំពេញ ក្រុមហ៊ុនរបស់លោកបានចាប់ដំណើរការជួសជុលកែលំអផ្លូវនេះឡើងវិញ ដែលពីមុនមានទទឹងតែ៩ម៉ែត្រ ឥឡូវពង្រីកដល់ទទឹង១៤ម៉ែត្រ ដើម្បីឆ្លើយតបទៅនឹងលំហូរចរាចរណ៍ដ៏ចង្អៀតនៅម្តុំផ្សារមាន់អាំង និងតំបន់ជុំវិញ ដោយចាប់ផ្តើមពង្រីកកាលខែកក្កដា ឆ្នាំ២០១៨កន្លងមក ។លោកបន្តថា រយៈពេល២សប្តាហ៍ទៀតផ្លូវនេះនឹងសម្រេចឱ្យរួចរាល់ទាំងស្រុង ។
ក្រៅពីពង្រីកផ្លូវ ការរៀបចំដាក់ប្រព័ន្ធលូក៏បានស្ថាបនារួចដែរ ដោយរំកិលប្រព័ន្ធលូពីក្នុងសាច់ផ្លូវទៅចិញ្ចើមផ្លូវវិញ ក្រោយពីផ្លូវត្រូវបានពង្រីក ។ ប្រព័ន្ធលូដែលដាក់រួចនេះ មានតួនាទីនាំទឹកទៅកាន់ប្រព័ន្ធលូមេនៅផ្លូវលេខ៥៩៨មួយផ្នែក និងចាក់ទៅស្ថានីយបូមទឹកទួលគោកទី១ ត្រឡោកបែកមួយផ្នែក ។
ដំណើរការនៃការជួសជុលកែលំអផ្លូវនេះ ពុំមានផលប៉ះពាល់ធំដុំទេ តែទោះបីជាយ៉ាងណាល តំណាងក្រុមហ៊ុន ក៏បានសុំការយោគយល់ពីបងប្អូនអ្នកធ្វើដំណើរតាមដងផ្លូវលេខ៥៩២ ដែលកំពុងដំណើរការកែលំអពីការរំខានខ្លះៗនៅការដ្ឋានខាងលើ ៕
ចែករំលែកព័តមាននេះ