ទីក្រុងអូតាវ៉ា ៖ លោកប្រធានាធិបតី ដូណាល់ ត្រាំ (Donald Trump) បានគំរាមថា នឹងដកប្រទេសកាណាដាចេញពីកិច្ចព្រមព្រៀងពាណិជ្ជកម្មសេរីអាមេរិកខាងជើង(NAFTA) ដែលកំពុងបង្កើនភាពតានតឹង ប៉ុន្តែអ្នកជំនាញមួយចំនួននិយាយថា ការគំរាមកំហែងនេះមិនងាយនឹងសម្រេចនោះទេ ។
កាលពីថ្ងៃសៅរ៍ លោកប្រធានាធិបតីត្រាំ បានគំរាមថា នឹងស្ថិតក្នុងកិច្ចព្រមព្រៀងថ្មីជាមួយម៉ិកស៊ិក ឬលុបចោលកិច្ចព្រមព្រៀងNAFTA នេះទាំងស្រុង ។ ប៉ុន្តែអ្នកជំនាញនិយាយថា វាមិនងាយស្រួលទេក្នុងការដកប្រទេសកាណាដាចេញពីកិច្ចព្រមព្រៀងNAFTA នេះ ។
លោក Lawrence Herman មេធាវីផ្នែកពាណិជ្ជកម្មអន្តរជាតិម្នាក់បានកត់សម្គាល់ថា សភាជាតិមានសិទ្ធិសម្រេចលើកិច្ចព្រមព្រៀងពាណិជ្ជកម្មនេះ ។
លោក Herman បាននិយាយលើ Twitter របស់លោកថា ៖« លោកត្រាំមិនមានសមត្ថកិច្ចក្នុងការបញ្ចប់កិច្ចព្រមព្រៀងNAFTA ហើយសម្រេចកិច្ចព្រមព្រៀងទ្វេភាគីជាមួយម៉ិកស៊ិកដូចការគំរាមកំហែងនោះទេ ។ ខ្ញុំគិតថា នឹងមានការប្រឆាំងផ្នែកនយោបាយច្រើន ហើយជាពិសេសមានឧបសគ្គផ្នែកច្បាប់ក្នុងការធ្វើដូច្នេះ »។
លើសពីនេះទៀត លោកប្រធានាធិបតីត្រាំ នឹងទទួលបានការរិះគន់ពីសមាជិកសភា អភិបាលរដ្ឋ និងអ្នកដឹកនាំអាជីវកម្មអាមេរិកដែលតំណាងប្រជាជន និងក្រុមហ៊ុនដែលទទួលរងការប៉ះពាល់ ប្រសិនបើកាណាដាមិនចូលរួមកិច្ចព្រមព្រៀងនេះ ។
លោក Thomas J. Donohue ប្រធាននិងជានាយកប្រតិបត្តិសភាពាណិជ្ជកម្មអាមេរិកបានចេញសេចក្តីថ្លែងការណ៍មួយថា ៖« ភាពរឹងមាំរបស់ NAFTA គឺផ្អែកទៅលើការដែលវាតភ្ជាប់ប្រទេសដែលមានសេដ្ឋកិច្ចធំៗទាំងបី ដោយរួមផ្សំភាពរឹងមាំរបស់ពួកយើងដើម្បីជំរុញដល់ភាពប្រកួតប្រជែងរួម ។
ប្រសិនបើអ្នកដកសមាជិកម្នាក់ចេញពីកិច្ចព្រមព្រៀងនេះ អ្នកនឹងធ្វើឲ្យវាខូចខាតទាំងស្រុង ហើយវានឹងមិនល្អឡើយសម្រាប់អាជីវកម្មអាមេរិក ការងារអាមេរិក និងសម្រាប់ការលូតលាស់សេដ្ឋកិច្ច »។
លោកបានព្រមានទៀតថា កិច្ចព្រមព្រៀងនេះនឹងមិនទទួលបានការគាំទ្រពីសភា ឬសមាគមអាជីវករឡើយ លុះត្រាតែវាជាកិច្ចព្រមព្រៀងត្រីភាគី ៕
ចែករំលែកព័តមាននេះ