ខេត្តតាកែវ ៖ រូបសំណាកព្រះនាងលីវ យី ដែលជាក្សត្រីសម័យមុនគេបង្អស់សោយរាជ្យនៅនគរគោកធ្លកមុនក្លាយជាប្រទេសកម្ពុជា ត្រូវបានអ្នកភូមិអូរពោធិ៍ ឃុំសំបួរ ស្រុកទ្រាំង ប្រទះឃើញនៅក្នុងព្រៃក្រោយផ្ទះរបស់ពួកគាត់ កាលពីថ្ងៃទី៣០ សីហា កន្លងទៅនេះ ។ ទោះបីជាបែបណាក្តី មន្ត្រីក្រសួងវប្បធម៌ថា មិនមែនរូបព្រះនាងលីវយី ដែលគេនាំគ្នានិយាយតៗគ្នា ទាំងមិនស្គាល់នេះទេ តាមពិតគឺជារូបសំណាកព្រះ
វិស្ណុទេ ។
លោក ង៉ែត អូន ជាពលរដ្ឋនៅភូមិខាងលើដែលបានប្រទះឃើញរូបសំណាកនេះនិយាយថា កាលពីល្ងាចថ្ងៃទី៣១ ខែសីហាកន្លងទៅនេះ ខណៈគាត់ត្រាយព្រៃក្រោយផ្ទះ ដែលជាដីអតីតទួលអង្គសម័យមុន ដើម្បីដាំដំណាំ ស្រាប់តែប្រទះឃើញរូបសំណាកថ្មមួយកប់នៅក្នុងដី ក៏គាស់យកមកប្រគល់ឱ្យនគបាលប៉ុស្តិ៍សំបួរថែរក្សា ព្រោះជាវត្ថុបុរាណមិនហ៊ានទុកទេ ខ្លាចក្រែងបាត់បង់ដោយប្រការណាមួយ ។
លោក ង៉ែត អូន បន្តទៀតថា ក្រោយពីមានការនិយាយពីអ្នកភូមិថា រូបសំណាកនេះគឺជាព្រះនាងលីវយី ដែលជាក្សត្រស្រីដំបូងគេសោយរាជ្យនៅនគរគោកធ្លក ដែលជានគរកកើតមុនគេក្នុងប្រវត្តិសាស្ត្រនៃការកកើតទឹកដីកម្ពុជា ។ទោះបីជាបែបណាក្តី ប្រជាពលរដ្ឋបាននាំគ្នាសើ្នសុំអាជ្ញាធរស្រុកយករូបសំណាកនេះមកធ្វើបុណ្យនៅកន្លែងដែលគាស់កកាយឃើញ ដើម្បីសុំសេចក្ដីសុខនិងភាពសម្បូរសប្បាយដល់អ្នកភូមិដោយសង់រោងបុណ្យ និងមានអ្នកភូមិមកចូលរួមច្រើនកុះករជាបុណ្យរួមភូមិតែម្តង ។
លោក ឈួន ផាន់នី អភិបាលស្រុកទ្រាំងថ្លែងថា បន្ទាប់ពីមានអ្នកភូមិប្រទះឃើញរូបសំណាកនេះ និងយកមកទុកនៅប៉ុស្តិ៍នគរបាលនោះ នៅថ្ងៃទី២ ខែកញ្ញា ពួកគាត់បាននាំគ្នាមកស្នើសុំអាជ្ញាធរ យករូបសំណាកនេះមកធ្វើបុណ្យតាមប្រពៃណីសាសនាមួយគ្រាសិន ដើម្បីបន់ស្រន់សុំសេចក្ដីសុខ ហើយនៅថ្ងៃទី៣ ខែកញ្ញា ខាងមន្ទីរវប្បធម៌ មកទទួលយករូបសំណាកនេះ ទៅតម្កល់ទុកនៅសារមន្ទីរខេត្ត ។
លោកស្រី ព្រំ សុគន្ធារី ប្រធានមន្ទីរវប្បធម៌និងវិចិត្រសិល្បៈខេត្ត ថ្លែងថា រូបសំណាកនេះមិនមែនជារូបសំណាកព្រះនាងលីវយីទេ ពោលគឺជារូបសំណាកព្រះវិស្ណុុ ហើយនៅថ្ងៃទី៣ ខែកញ្ញា មន្ត្រីមន្ទីរវប្បធម៌យកមកថែរក្សាទុកនៅសារមន្ទីរខេត្ត ។ ដោយឡែក ខាងមន្ទីរក៏មានថវិកាមួយចំនួន ដើម្បីលើកទឹកចិត្តសម្រាប់ផ្ដល់ជូនបងប្អូនដែលជីកកកាយឃើញផងដែរ ដើម្បីជាកាលើកទឹកចិត្តដល់គាត់ដែលរកឃើញ ៕
ចែករំលែកព័តមាននេះ