បុកគេហើយប្រឹងរត់រហូតដល់បានបុកគេបាក់ជើងម្ចាងទៀត
- ភ្នំពេញ
រាជធានីភ្នំពេញ ៖ រថយន្តធន់ធំមួយគ្រឿងទំនងជាអ្នកបើកបរស្រវឹងបានបើកទៅបុកគូទម៉ូតូហុងដាឌ្រីម រងរបួសធ្ងន់២នាក់ ហើយព្យាយាមបើករត់ក៏បានទៅបុកម៉ូតូមួយគ្រឿងទៀត បណ្តាលឲ្យបុរសរងរបួសបាក់ជើងម្នាក់ ហើយរថយន្តបង្កបើករត់បន្តទៅដល់ផ្លូវម៉ៃដា ជិតស្តុបវត្តអង្គតាមិញក៏ត្រូវសមត្ថកិច្ចខណ្ឌមានជ័យដេញឃាត់បានរថយន្ត ចំណែកអ្នកបើកបររត់គេចខ្លួនបាត់ស្រមោលហេតុការណ៍នេះកើតឡើង កាលពីវេលាម៉ោង៩នឹង២៥នាទីយប់…
រថយន្តបង្កខាងលើម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ 3D- 9041 ជាប្រភេទរថយន្តដឹកឥវ៉ាន់ធន់ធំនៅលើក្បាលរថយន្តមានបិទផ្លាកក្រុមហ៊ុន(KP)បើកបរដោយបុរសម្នាក់ ។
ប្រភពព័ត៌មានពីសមត្ថកិច្ចបានប្រាប់ឲ្យដឹងថា មុនកើតហេតុមានរថយន្តបង្កខាងលើបើកស្របទិសគ្នាជាមួយម៉ូតូមួយគ្រឿងទៀត ម៉ាកហុងដាឌ្រីម ពណ៌ខ្មៅ ពាក់ស្លាកភ្នំពេញ 1CL-43 55 បើកបរដោយយុវជន២នាក់ក្នុងទិសដៅពីលិចទៅកើតលុះមកដល់កន្លែងកើតហេតុបុកម៉ូតូរងគ្រោះពីក្រោយ បណ្តាលឲ្យដួលបែកស្តុបខាងក្រោយធ្វើឲ្យយុវជនទាំង២នាក់រងបួសធ្ងន់ត្រូវបានរថយន្តសង្គ្រោះខាងគ្លីនិករស្មីដឹកយកទៅព្យាបាលរបួសភ្លាមៗ ។
ចំណែករថយន្តបង្កមិនបានឈប់ដោះស្រាយទេ ហើយបានព្យាយាមបន្ថែមល្បឿន បើករត់គេចទាំងភ័យស្លន់ស្លោមកដល់ផ្លូវឌួងងៀប ក្នុងសង្កាត់ស្ទឹងមានជ័យ៣ ខណ្ឌមានជ័យក៏បត់រថយន្តភ្លាមៗមិនស៊ីញ៉ូក៏ត្រូវម៉ូតូមួយគ្រឿងម៉ាកស៊ុយស៊ូគីលេត ពណ៌ខៀវ បើកបរដោយបុរស២នាក់នឹងស្ត្រីម្នាក់ ធ្វើដំណើរបញ្ច្រាសទិសដៅគ្នាមកចាប់ហ្វ្រាំងមិនទាន់ទៅបុកចំកាងរថយន្តចំហៀងខាងស្តាំ បង្ក បណ្តាលឲ្យបុរសម្នាក់អង្គុយនៅកណ្តាលរងរបួសបាក់ជើងឆ្វេងត្រូវបានបញ្ជូនទៅសង្គ្រោះនៅគ្លីនិក និង២នាក់រងរបួសស្រាល ហើយរថយន្តបង្កនៅតែមិនព្រមឈប់ក៏បានបន្ថែមល្បឿនកាន់តែលឿនបើករត់តាមផ្លូវឌួងងៀបក៏ត្រូវសមត្ថកិច្ចខណ្ឌមានជ័យនឹងប្រជាពលរដ្ឋដេញតាមឃាត់រហូតដល់ផ្លូវ ២០០៤ ចំណុចស្តុបវត្តអង្គតាមិញ សង្កាត់កាកាប១ ខណ្ឌពោធិ៍សែនជ័យ ក៏ត្រូវអ្នកបើករថយន្តបង្កឈប់រថយន្តចោល ចុះរត់គេចខ្លួនបាត់ស្រមោល បន្សល់ទុកតែរថយន្តឲ្យសមត្ថកិច្ចវាស់វែង ។
ក្រោយកើតហេតុជនរងគ្រោះត្រូវបានរថយន្តសង្គ្រោះដឹកយកទៅព្យាបាលភ្លាមៗចំណែកម៉ូតូ រងគ្រោះនឹងរថយន្តបង្កត្រូវបានកម្លាំងសមត្ថកិច្ចជំនាញនគរបាលចរាចរណ៍ផ្លូវគោកស្នងការដ្ធានរគបាលរាជធានីភ្នំពេញ ធ្វើការវាស់វែង យករថយន្តរួមទាំងមូតូរងគ្រោះទៅរក្សាទុកនឹងដោះស្រាយគ្នាតាមនីតិវិធី ៕
ចែករំលែកព័តមាននេះ