រាជធានីភ្នំពេញ ៖ បុរសម្នាក់ស្រវឹងជោគជាំត្រូវបានសមត្ថកិច្ចចាប់វាយខ្នោះ បន្ទាប់ពីបើកបររថយន្តរ៉េហ្វ័រមួយគ្រឿង ក្នុងល្បឿនលឿន រួចក៏ជ្រុលទៅបុកគូទរថយន្តពីរគ្រឿងទៀត ដែលកំពុងឈប់រង់ចាំស្តុបបៃតង កាលពីវេលាម៉ោង៧និង៣០នាទីយប់ ខែកញ្ញា ឆ្នាំ២០១៨ ត្រង់ចំណុចទំនប់ត្រឡោកបែក កន្លែងលក់ងាវ តាមបណ្តោយផ្លូវ៥៩៨ ស្ថិតក្នុងបឹកកក់ទី១ ខណ្ឌទួលគោក ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសម្នាក់បើកបររថយន្តមួយគ្រឿងម៉ាកRAV4 ពណ៌ខ្មៅ ពាក់ស្លាកលេខ ភ្នំពេញ 2O-0349 ក្នុងស្ថានភាពស្រវឹងជោគជាំ តាមបណ្តោយផ្លូវ៥៩៨ ក្នុងទិសដៅពីត្បូងទៅជើង និងក្នុងល្បឿនលឿនមធ្យម ។ លុះមកដល់ចំណុចកើតហេតុរថយន្តបង្កខាងលើក៏បានជ្រុលចង្កូតទៅបុកគូទរថយន្តមួយគ្រឿងម៉ាកម៉ាស័រដា CX-3 ពណ៌ស ពាក់ស្លាកលេខ ភ្នំពេញ 2AU-9223 បើកបរដោយស្ត្រីម្នាក់ កំពុងតែឈប់រង់ចាំស្តុបបៃតង ហើយបង្កឲ្យរថយន្តម៉ាស័រដាCX-3 រុលទៅបុកខ្ទប់នឹងគូទរថយន្តមួយគ្រឿងទៀត ពណ៌ទឹកប្រាក់ បើកបរដោយបុរសម្នាក់កំពុងតែឈប់រង់ចាំស្តុបបៃតងដូចគ្នា បណ្តាលឲ្យរងការខូចខាតក្រពឹតផ្នែកខាងក្រោយ ។
ចំណែកឯរថយន្តម៉ាស័រដា CX-3 រងការខូចខាតក្រពឹតទាំងខាងមុខ និងខាងក្រោយដោយឡែករថយន្តបង្ករងការខូចខាតក្រពឹតផ្នែកខាងមុខ តែសំណាងល្អដែលមិនបង្កឲ្យមានអ្នករងរបួស ។
បន្ទាប់ពីកើតហេតុសមត្ថកិច្ចមូលដ្ឋាន និងសមត្ថកិច្ចជំនាញក៏បានចុះមកដល់ភាគីទាំងសងខាងក៏បានចុះមកធ្វើការដោះស្រាយគ្នាតែដោយអ្នកបើកបររថយន្តបង្កស្រវឹងជោគជាំនិយាយលែងដឹងរឿង ធ្វើឲ្យការដោះស្រាយគ្នាក្លាយទៅជាជម្លោះវាងបុរសដែលស្រវឹងខាងលើ និងភាគីរងគ្រោះទាំងពីរយ៉ាងតឹងសរសៃក ហើយបុរសដែលស្រវឹងជោគជាំខាងលើបានបញ្ចេញកាយវិការច្រងេងច្រងាង ថែមទាំងចង់បង្កជាហិង្សាដាក់ទៅលើភាគីរងគ្រោះថែមទៀតផង ។
ភ្លាមនេះសមត្ថកិច្ចមូលដ្ឋានដែលនៅកន្លែងកើតហេតុក៏បានព្យាយាមចាប់ឃាត់បុរសដែលជាអ្នកបើករថយន្តបង្កខាងលើ ព្រោះខ្លាចកើតទៅជាករណីហិង្សាតែហាមឃាត់បុរសដែលស្រវឹងរូបនេះមិនស្តាប់សមត្ថកិច្ចក៏សម្រេចចិត្តចាប់វាយខ្នោះបុរសដែលស្រវឹងជោគជាំខាងលើតែម្តងទៅ ។
ក្រោយពេលកើតហេតុសមត្ថកិច្ចជំនាញបានធ្វើការវាស់វែងយករថយន្តទាំងបីគ្រឿងខាងលើនិងអ្នកបើកបររថយន្តបង្កទៅកាន់ការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នាទៅតាមផ្លូវច្បាប់នៅពេលក្រោយ ៕
ចែករំលែកព័តមាននេះ