រញ៉េរញ៉ៃពេកចុះកាត់ខ្សែកាបនៅលើអាកាសដាក់ចូលក្នុងដីវិញ
- សៀមរាប
ខេត្តសៀមរាប ៖ អាជ្ញាធរខេត្តសៀមរាបសហការជាមួយមន្ទីរប្រៃសណីយ៍ និងទូរគមនាគមន៍ខេត្តបានចាប់ផ្តើមអនុវត្តន៍គម្រោងកាត់ខ្សែកាបលើអាកាសនៅតាមផ្លូវសំខាន់ៗចំនួន១១ខ្សែក្នុងក្រុងសៀមរាប ។ ការអនុវត្តគម្រោងនេះដើម្បីលើកសោភ័ណភាពក្រុង ខណៈមានការរិះគន់ពីប្រជាពលរដ្ឋកន្លងមកដែលថា ខ្សែភ្លើង ឬខ្សែកាបទាំងនោះធ្លាក់រញ៉េរញ៉ៃ ហើយខ្លះទៀតបានដាច់ធ្លាក់រប៉ាត់រប៉ាយតាមដងផ្លូវមួយចំនួនដែលអាចបង្កជាគ្រោះថ្នាក់ជាយថាហេតុដល់អ្នកធ្វើដំណើរផងដែរ…
ការអនុវត្តគម្រោងនេះដើម្បីលើកសោភ័ណភាពក្រុង ខណៈមានការរិះគន់ពីប្រជាពលរដ្ឋកន្លងមកដែលថា ខ្សែភ្លើង ឬខ្សែកាបទាំងនោះធ្លាក់រញ៉េរញ៉ៃ ហើយខ្លះទៀតបានដាច់ធ្លាក់រប៉ាត់រប៉ាយតាមដងផ្លូវមួយចំនួនដែលអាចបង្កជាគ្រោះថ្នាក់ជាយថាហេតុដល់អ្នកធ្វើដំណើរផងដែរ ។
ក្នុងឱកាសចុះអនុវត្តកាត់ខ្សែកាបលើអាកាសនោះលោក សុខ សីហា ប្រធានមន្ទីរប្រៃសណីយ៍ និងទូរគមនាគមន៍ខេត្ដសៀមរាបបានឱ្យដឹងនៅវេលាម៉ោង២និង៤៦នាទីរសៀល ថ្ងៃទី៣ ខែកញ្ញា ឆ្នាំ២០១៨ ថាមន្ទីរប្រៃសណីយ៍ និងទូរគមនាគមន៍ខេត្ដសៀមរាបយើងគ្រប់គ្រងទៅលើបណ្តាក្រុមហ៊ុនផ្តល់ទូរគមនាគមន៍ទាំងអស់ ដូច្នេះគឺវាទាក់ទងនឹងខ្សែ ។ ហើយខ្សែកាបនៅលើអាកាសកន្លងមកនៅក្នុងក្រុងសៀមរាបឃើញមានភាពរញ៉េរញ៉ៃច្រើនគឺមានកាត់ទទឹងផ្លូវខ្លះ កាត់តាមបណ្តោយផ្លូវខ្លះ គឺវាមានភាពរញ៉េរញ៉ៃ ។
លោកបានបញ្ជាក់ថា ក្រុមការងារចុះរៀបចំ និងកាត់ទម្លាក់ប្រព័ន្ធបណ្តាញខ្សែនៅលើអាកាសឱ្យមានសោភ័ណភាព សុវត្ថិភាព និងសណ្តាប់ធ្នាប់ របៀបរៀបរយសាធារណៈក្នុងក្រុងសៀមរាប គឺចាប់ផ្តើមដំណើរការកាត់គម្រោងទី១ គឺចាប់ពីផ្លូវលោកតាណឺយជាមុន និងចាប់ផ្លូវបន្តបន្ទាប់ទាំង១១ខ្សែ និងផ្លូវផ្សេងៗទៀតក្នុងក្រុង ។
ហើយក្រុមការងាររបស់សាលាខេត្តរួមជាមួយមន្ទីរប្រៃសណីយ៍ និងទូរគមនាគមន៍ខេត្ដសៀមរាបគម្រោងរបស់យើងគឺអនុវត្តន៍ចំនួន១១ផ្លូវសំខាន់នៅក្នុងក្រុងសៀមរាបមុនសិនរួមមានតាមបណ្ដោយផ្លូវជាតិលេខ៦ ផ្លូវលោកតាណឺយ និងតំបន់ផាប់ស្ទ្រីតជាដើម ។ល។
ជាក់ស្តែងគឺយើងនឹងធ្វើនៅក្នុងក្រុងទាំងអស់ដើម្បីឱ្យសណ្តាប់ធ្នាប់ខ្សែកាបអាកាសនេះចូលមកក្រោមដីវិញគឺមិនឱ្យមានភាពរញ៉េរញ៉ៃទៀតទេ គឺខ្សែនោះរត់នៅក្រោមដី ៕
ចែករំលែកព័តមាននេះ